ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠴᠠᠬᠠᠷ ᠰᠣᠶᠣᠯ
ᠬᠠᠨ ᠬᠠᠶᠢᠷᠬᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/7/8
ᠬᠠᠨ ᠬᠠᠶᠢᠷᠬᠠᠨ — ᠠᠭᠳᠤᠩᠭ᠎ᠠ ᠵᠤᠬᠢᠶᠠᠪᠠ ᠴᠡᠯᠮᠡᠭ ᠴᠡᠩᠭᠡᠷ ᠤᠭᠳᠠᠷᠭᠤᠢ ᠶᠢᠨ ᠦᠭᠡᠳᠡ ᠠᠴᠠ ᠵᠢᠰᠤ ᠪᠤᠯᠢᠶᠠᠯᠴᠠᠨ᠂ ᠴᠠᠯ ᠨᠤᠭᠤᠭᠠᠨ ᠬᠢᠯᠢᠩ ᠤᠨ ᠠᠳᠠᠯᠢ  ᠪᠠᠷ ᠬᠢᠯᠳᠦᠭᠡᠨᠡᠭᠰᠡᠨ ᠴᠡᠯᠡᠭᠡᠷ ᠠᠭᠤᠳᠠᠮ ᠳᠠᠯ᠎ᠠ ᠶᠢᠨ ᠳᠤᠮᠳᠠᠭᠤᠷ ᠱᠤᠭᠤᠮ ᠮᠡᠳᠦ ᠳᠤᠷᠠᠶᠢᠬᠤ ᠴᠠᠶᠢᠯᠭᠠᠨ ᠵᠠᠮ ᠢᠶᠠᠷ ᠠᠶᠠᠨᠴᠢᠨ ᠪᠤᠯᠤᠯᠳᠠᠢ ᠬᠤᠶᠠᠷ ᠮᠤᠷᠢᠳᠠᠨ ᠴᠤᠪᠤᠷᠠᠨ ᠶᠠᠪᠤᠨ᠎ᠠ᠃ ᠭᠠᠨᠭ᠍ᠳᠠᠭᠰᠠᠨ ᠳᠡᠭᠷᠢ ᠶᠢᠨ ᠴᠤᠷᠬᠢᠮ᠎ᠠ ᠨᠠᠷᠠᠨ ᠳᠠᠳᠠᠨ ᠤ ᠳᠠᠯᠤ ᠮᠦᠷ ᠠᠴᠠ ᠭᠠᠯ ᠰᠢᠯ ᠢᠶᠠᠷ ᠳᠦᠭᠡᠨᠡᠬᠦ‍ ᠰᠢᠭ ᠬᠠᠯᠠᠭᠠᠨ᠎ᠠ᠃ ᠵᠤᠨ ᠤ ᠬᠠᠯᠠᠭᠤᠨ ᠳᠤ ᠪᠦᠭᠴᠢᠭᠰᠡᠨ ᠮᠤᠷᠢᠳ ᠠᠮᠢ ᠳᠡᠮᠡᠴᠡᠬᠦ ᠳᠡᠭᠡᠨ ᠵᠤ ᠵᠦᠰᠦᠮᠠᠯ ᠰᠤᠷ ᠵᠢᠯᠤᠭᠤ  ᠶᠢ ᠰᠤᠩᠭᠠᠨ᠂ ᠵᠤᠵᠠᠭᠠᠯᠢᠭ ᠡᠪᠡᠷᠳᠦᠭᠰᠡᠨ ᠠᠯᠠᠭᠠᠨ ᠤ ᠵᠢᠷᠤᠭᠠᠳᠠᠰᠤ ᠶᠢ ᠬᠦᠯᠡᠶᠢᠯᠭᠡᠨ᠂ ᠵᠤᠤᠵᠠᠢ ᠳᠦᠯᠦᠷᠡᠳᠡᠯ᠎ᠡ ᠵᠤᠯᠠᠷᠠᠨ ᠢᠯᠠᠭᠠᠷᠬᠠᠨ᠎ᠠ᠃ ᠬᠠᠷᠢᠨ ᠵᠤᠭᠵᠠᠶᠢᠨ ᠳᠠᠳᠠᠵᠦ ᠠᠷᠠᠢ ᠴᠢᠮᠠᠢᠢ ᠳᠤᠭᠳᠠᠭᠠᠵᠦ ᠶᠠᠳᠠᠨ ᠪᠤᠳᠤᠯᠢᠭᠰᠠᠨ ᠰᠠᠮᠪᠠ ᠯᠠ ᠦᠪᠡᠷ ᠤᠨ ᠠᠯᠠᠭ᠎ᠠ ᠪᠨ ᠤᠰᠤᠳᠦᠵᠦ ᠴᠦᠪᠦᠷᠢᠬᠦᠳᠡᠭᠰᠡᠨ ᠢ ᠤᠪᠠᠶᠢᠯᠠᠬᠤ ᠴᠢᠯᠦᠭᠡ ᠦᠭᠡᠢ ᠵᠠᠮ ᠬᠦᠭᠡᠭᠡᠨ᠎ᠡ᠃ ᠠᠱᠢᠬᠦᠢ ᠰᠠᠶᠢᠬᠠᠨ ᠰᠡᠪᠬᠢᠮ᠎ᠡ ᠳᠤᠬᠢᠶᠠᠯ ᠪᠤᠯᠪᠠ᠃ ᠬᠠᠷᠠᠬᠠᠨ ᠴᠢᠳᠬᠤᠮᠠᠯ ᠫᠠᠯᠠᠨ ᠰᠢᠭ᠋ ᠴᠢᠯᠪᠡᠯᠵᠠᠨ ᠬᠦᠭᠡᠷᠠᠨ ᠳᠤᠨᠤᠷᠠᠭᠰᠠᠨ ᠤᠭᠳᠠᠷᠭᠤᠢ ᠶᠢᠨ ᠴᠡᠭᠡᠯ ᠳᠤ ᠭᠤᠤᠵᠢᠮᠠᠯ ᠨᠤᠤᠰᠤ ᠬᠡᠶᠢᠰᠬᠦ‍ ᠰᠢᠭ ᠴᠦ ᠦᠵᠡᠭᠳᠡᠮ᠎ᠡ ᠰᠡᠭᠯᠡᠷᠡᠭᠰᠡᠨ ᠦᠨᠦᠴᠢᠨ ᠴᠠᠭᠠᠨ ᠡᠬᠦᠯᠡ ᠰᠡᠮᠡᠷᠡᠭᠰᠡᠭᠡᠷ ᠪᠠᠶᠢᠵᠦ᠂ ᠡᠮᠤᠨᠡᠬᠢ ᠵᠠᠮ ᠢ ᠨᠢ ᠳᠤᠭᠤᠯᠭ᠎ᠠ ᠪᠠᠷ ᠪᠢᠯᠳᠠᠭᠰᠠᠨ ᠰᠢᠭ᠋ ᠰᠡᠬᠦᠳᠡᠷᠯᠡᠪᠡ᠃ ᠳᠦᠷ ᠴᠦ ᠬᠡᠰᠡᠨ ᠬᠠᠪᠤᠳᠠᠶᠢᠬᠠᠨ ᠰᠡᠷᠢᠬᠦᠴᠡᠭᠰᠡᠨ ᠰᠠᠮᠪᠠ᠂ ᠨᠠᠷᠢᠨ ᠰᠤᠯᠠᠪᠳᠤᠷ ᠨᠢᠷᠤᠭᠤ ᠪᠠᠨ ᠮᠤᠰᠬᠢᠯᠵᠠᠭᠤᠯᠤᠨ ᠤᠨᠢᠭᠠᠷ ᠨᠢᠳᠤ ᠪᠠᠨ ᠢᠷᠮᠡᠬᠦᠯᠦᠭᠰᠡᠨ ᠢᠶᠠᠨ ᠡᠩᠭᠡᠷ ᠢᠶᠠᠨ ᠵᠠᠳᠠᠭᠠᠶᠢᠯᠠᠵᠦ᠂ ᠮᠤᠷᠢ ᠰᠡᠭᠡᠬᠦᠯᠦᠨ ᠨᠦᠬᠦᠭᠡᠬᠢ ᠪᠠᠨ ᠬᠦᠢᠴᠡᠪᠡ᠃ — ᠳᠠᠮᠪᠢ ᠭᠤᠸᠠᠢ︕ ᠨᠠᠯᠢᠶᠠᠳ ᠳᠦᠬᠦᠴᠢᠭᠡᠯ᠎ᠡ ᠰᠢᠥ ᠳ᠋ᠠ᠃ ᠡᠨᠡ ᠬᠦ ᠢᠷᠵᠢᠭᠡᠷ ᠨᠤᠭᠤᠭᠠᠨ ᠳᠤᠷᠳᠤᠩ ᠳᠡᠭᠡᠷ᠎ᠡ ᠴᠠᠭᠠᠨ ᠳᠠᠨ᠎ᠠ ᠰᠠᠭᠤᠯᠭᠠᠭᠰᠠᠨ ᠰᠢᠭ᠋ ᠨᠢᠳᠤ ᠪᠤᠯᠢᠶᠠᠮ᠎ᠠ ᠬᠠᠷᠠᠭᠳᠠᠭᠠᠳ ᠪᠠᠶᠢᠳᠠᠭ ᠳᠠᠯᠠᠨ ᠳᠦᠷᠦᠬᠦᠦ ᠶᠢᠨ ᠳᠡᠷᠭᠡᠳᠡ ᠠᠮᠤᠰᠬᠢᠭᠡᠰᠠᠢ ᠭᠡᠳ ᠭᠤᠷᠢᠳᠠᠯᠳᠠᠶᠢᠶ᠎ᠠ ᠡᠪᠰᠢᠶᠡᠯᠭᠡᠪᠡ᠃ ᠳᠡᠬᠦᠨ ᠤ ᠡᠩᠭᠡᠷ ᠡᠪᠴᠢᠬᠦᠦ ᠪᠠᠨ ᠪᠡᠯᠭᠡᠴᠡᠭᠯᠠᠨ ᠨᠦᠮᠦᠭᠡᠯᠡᠵᠦ᠂ ᠡᠬᠦᠷᠦᠭᠰᠡᠨ ᠰᠢᠷᠢᠨ ᠪᠤᠭᠴᠤ ᠪᠠᠨ ᠬᠦᠷᠳᠡᠯ᠎ᠡ ᠪᠦᠭᠡᠷᠭᠡᠨ ᠳᠡᠭᠡᠨ ᠬᠠᠳᠤᠷᠤᠭᠰᠠᠨ ᠢ ᠦᠵᠡᠭᠰᠡᠨ ᠳᠠᠮᠪᠢ᠄ — ᠰᠠᠮᠪᠠ ᠮᠢᠨᠢ ᠡ︕ ᠳᠠᠪᠢᠭᠠᠳᠬᠠᠨ ᠭᠠᠵᠠᠷ ᠶᠠᠪᠤᠵᠦ ᠪᠠᠶᠢᠨ᠎ᠠ᠃ ᠳᠡᠷᠡ ᠤᠯᠠᠭᠠᠨ ᠬᠤᠷᠤᠬᠠᠢ ᠱᠢᠷᠤ ᠪᠠᠷ ᠪᠦᠷᠢᠭᠰᠡᠨ ᠳᠤᠪᠴᠢ ᠲᠠᠢ ᠳᠤᠭᠤᠷᠴᠤᠭ ᠰᠢᠭ᠋ ᠪᠤᠨᠳᠤᠶᠢᠬᠤ ᠳᠤᠰᠢ ᠶᠢᠨ ᠨᠠᠭᠠᠳᠤᠬᠢ ᠳᠤᠰᠬᠤᠨ ᠬᠦᠷᠪᠠᠯ ᠰᠠᠶ᠋ᠢ ᠵᠢᠷᠠᠨ ᠭᠠᠵᠠᠷ ᠪᠤᠯᠤᠨ᠎ᠠ ᠭᠡᠵᠦ ᠬᠡᠯᠡᠭᠡᠳ ᠳᠠᠬᠢᠨ᠄ ︽ᠳᠡᠬᠦᠦ ᠮᠢᠨᠢ ᠡ︕ ᠤᠨᠤᠭᠠᠨ ᠳᠤ ᠶᠠᠳᠠᠷᠠᠭᠤ᠂ ᠠᠶᠠᠨ ᠳᠤ ᠬᠤᠶᠢᠷᠭᠤ ᠶᠤᠮ ᠰᠢᠪ︾ ᠭᠡᠵᠦ ᠬᠡᠯᠡᠬᠦ ᠭᠡᠰᠡᠨ ᠦᠭᠡ ᠪᠠᠨ ᠪᠤᠷᠤᠭᠤᠯᠠᠨ ᠬᠤᠯᠠᠳᠴᠠᠢ᠃ — ᠡᠨᠡ ᠦᠷᠯᠦᠭᠡ᠂ ᠪᠤᠤᠴᠠᠩ ᠠᠴᠠ ᠮᠤᠷᠳᠠᠭᠠᠳ ᠳᠦᠷᠪᠠᠨ ᠮᠦᠴᠢ ᠮᠢᠨᠢ ᠶᠠᠪᠤᠬᠤ ᠳᠤᠳᠤᠮ ᠡᠪᠭᠡᠷᠡᠯᠳᠦᠨ ᠬᠦᠰᠢᠭᠡᠳ ᠭᠤᠷᠢ ᠦᠭᠡᠢ ᠭᠡᠰᠡᠨ ᠰᠠᠮᠪᠠ᠂ ᠤᠯᠠᠮ ᠮᠤᠰᠬᠢᠯᠵᠠᠨ ᠰᠢᠯᠢᠨ ᠬᠦᠵᠦᠬᠦᠦ ᠪᠠᠨ ᠳᠤᠤᠭᠠᠷᠭᠠᠪᠠ᠃ — ᠳᠡᠭᠡᠭᠡᠳ ᠯᠠ ᠪᠢᠵᠠ︕ ᠴᠢᠮᠠᠢᠢ ᠮᠤᠷᠢᠨ ᠳᠤ ᠪᠤᠳᠤᠯᠢᠭᠠᠳ ᠪᠠᠶᠢᠬᠤᠯᠠᠷ ᠬᠠᠷᠠᠬᠤ ᠳᠤᠳᠤᠮ ᠤᠷᠢᠳᠠ ᠤᠷᠢᠳᠠ  ᠶᠢᠨ ᠶᠠᠪᠤᠳᠠᠯ ᠰᠠᠨᠠᠭᠳᠠᠬᠤ ᠶᠤᠮ᠃ — ᠳᠠᠮᠪᠢ ᠭᠤᠸᠠᠢ᠂ ᠰᠤᠨᠢᠨ ᠶᠠᠭᠤ ᠶᠤᠮ︕ ᠬᠡᠯᠡᠭᠡᠴᠢ ᠁ — ᠳᠠᠨ ᠤ ᠦᠶ᠎ᠠ ᠶᠢᠨ ᠬᠢ ᠪᠠᠨ ᠶᠠᠷᠢᠭᠠᠳ ᠪᠠᠶᠢᠮᠠᠷ ᠬᠡᠷᠡᠭ ᠨᠠᠳᠠ ᠶᠠᠭᠤ ᠪᠠᠶᠢᠬᠤᠪ ᠭᠡᠵᠦ ᠦᠭᠡ ᠴᠤᠬᠤᠯᠵᠠᠭᠤᠯᠤᠭᠰᠠᠨ ᠳᠠᠮᠪᠢ᠂ ᠳᠡᠬᠦᠨ ᠤ ᠯᠠᠪᠯᠠᠬᠤ ᠠᠴᠠ ᠶᠠᠷᠰᠢᠭᠯᠠᠭᠰᠠᠨ ᠰᠢᠭ᠋ ᠢᠰᠭᠡᠷᠤᠨ ᠠᠶᠠᠯᠠᠭᠤᠯᠵᠦ᠂ ᠮᠤᠷᠢ ᠬᠡᠶᠢᠷᠭᠡᠬᠦᠯᠤᠨ ᠪᠡᠶ᠎ᠡ ᠦᠨᠳᠡᠶᠢᠯᠭᠡᠵᠡᠢ᠃ ᠳᠡᠬᠦᠨ ᠤ ᠮᠤᠷᠢ ᠪᠠᠨ ᠳᠠᠪᠢᠷᠠᠨ ᠬᠠᠳᠠᠷᠢᠭᠤᠯᠤᠨ᠂ ᠬᠠᠨᠠᠭᠠᠷ ᠮᠦᠷᠦ ᠪᠠᠨ ᠳᠡᠩᠭᠡᠯᠵᠡᠬᠦᠯᠦᠨ᠂ ᠵᠡᠬᠦᠭᠰᠡᠨ ᠰᠢᠷᠢᠨ ᠪᠤᠭᠴᠤ ᠪᠠᠨ ᠳᠡᠭᠰᠢᠯᠡᠬᠦ ᠨᠢ ᠬᠦᠷᠳᠡᠯ᠎ᠡ ᠪᠤᠳᠤᠯᠢᠭᠤ ᠬᠦᠮᠦᠨ ᠤ ᠬᠤᠷᠤ ᠶᠢ ᠮᠠᠭᠠᠵᠢᠬᠤ ᠮᠡᠳᠦ ᠪᠤᠯᠤᠨ ᠰᠠᠮᠪᠠ ᠶᠢ ᠳᠠᠴᠢᠶᠠᠳᠠᠭᠤᠯᠪᠠ᠃ ᠤᠤᠯ ᠨᠢ ᠳᠠᠮᠪᠢ ᠶᠢ ᠬᠦᠢᠴᠡᠵᠦ ᠢᠷᠡᠭᠡᠳ ᠳᠦᠷᠦᠭᠡ ᠬᠠᠪᠢᠷᠠᠭᠤᠯᠤᠨ ᠬᠦᠦᠬᠢᠬᠦᠯᠵᠦ ᠶᠠᠪᠤᠬᠤ ᠬᠡᠰᠡᠨ ᠴᠦ ᠱᠦᠬᠦᠷᠭᠡᠢ ᠰᠢᠨᠠᠭ᠎ᠠ ᠪᠠᠷ ᠤᠰᠤ ᠤᠤᠭᠤᠭᠰᠠᠨ ᠰᠢᠭ᠋ ᠬᠤᠭᠤᠰᠤᠷᠠᠪᠠ᠃ ᠭᠡᠪᠡᠴᠦ ᠳᠡᠬᠦᠨ ᠤ ᠬᠡᠯᠡᠭᠰᠡᠨ ᠢᠶᠠᠷ ᠵᠠᠮ  ᠤᠨ ᠵᠤᠭ᠎ᠠ ᠪᠤᠯᠭᠠᠮ᠎ᠠ ᠰᠡᠳᠦᠪ ᠤᠯᠤᠭᠰᠠᠨ ᠳᠠᠭᠠᠨ ᠳᠡᠮᠡᠢ ᠭᠤᠮᠤᠳᠠᠭᠰᠠᠨ ᠦᠭᠡᠢ᠃ ᠭᠠᠭᠴᠠ ᠬᠦ ᠳᠠᠮᠪᠢ ᠶᠢᠨ ᠭᠤᠶᠢᠭᠤᠷᠠᠭᠤᠯᠬᠤ ᠪᠠᠷ ᠪᠠᠷᠤᠭ ᠬᠦᠭᠡᠭᠡᠵᠦ ᠬᠦᠢᠴᠠᠨ ᠳᠡᠬᠦᠨ ᠤ ᠬᠤᠶᠢᠰᠢ ᠡᠷᠬᠢᠨ ᠬᠠᠷᠠᠵᠦ ᠦᠨᠳᠡᠶᠢᠯᠭᠡᠬᠦ ᠪᠠᠷ ᠬᠤᠴᠤᠷᠤᠰᠬᠢᠨ ᠪᠠᠶᠢᠵᠦ ᠶᠠᠪᠤᠭᠰᠠᠭᠠᠷ ᠠᠷᠪᠠᠨ ᠬᠡᠳᠦᠨ ᠭᠠᠵᠠᠷ ᠢ ᠳᠦᠳᠡᠯ ᠦᠭᠡᠢ ᠠᠭᠤᠳᠠᠯᠤᠭᠰᠠᠨ ᠪᠠᠶᠢᠪᠠ᠃ ᠴᠤᠬᠤᠮ ᠵᠢᠷᠠᠨ ᠭᠠᠵᠠᠷ ᠤᠨ ᠬᠢᠨᠢ ᠦᠵᠦᠬᠦᠷ ᠲᠤ ᠠᠭᠤᠯᠵᠠᠯᠳᠤᠪᠠ᠃ — ᠴᠢᠮᠠᠢᠢ ᠠᠶᠠᠨ ᠳᠤ ᠴᠠᠭᠠᠷᠠᠭᠤᠯᠵᠦ ᠠᠪᠬᠤ ᠪᠠᠷ ᠳᠦᠷᠦᠬᠦᠯᠡᠭᠡᠳ ᠪᠠᠶᠢᠯ᠎ᠠ ᠪᠢ᠃ ᠰᠠᠮᠪᠠ ᠮᠢᠨᠢ ᠤᠯᠠᠮ ᠶᠠᠳᠠᠷᠠᠭᠰᠠᠨ ᠪᠠᠶᠢᠬ᠎ᠠ᠃ ᠳᠠᠨᠠᠢ ᠬᠦᠷᠢᠶᠠᠨ ᠤ ᠦᠨᠦ ᠰᠤᠳᠪᠠ ᠶᠢᠨ ᠠᠪᠤ᠄ ︽ᠬᠤᠳᠠ ᠭᠠᠵᠠᠷ ᠤᠳᠠᠭᠠᠨ ᠰᠠᠭᠤᠵᠦ᠂ ᠬᠤᠶᠠᠩ ᠳᠤ ᠪᠠᠷᠢᠭᠳᠠᠬᠤ ᠠᠴᠠ ᠬᠤᠨᠢ ᠪᠠᠨ ᠳᠠᠭᠠᠵᠦ ᠬᠡᠯᠳᠦᠷᠢᠭᠰᠡᠨ ᠨᠢ ᠳᠡᠭᠡᠷ᠎ᠡ᠃ ᠰᠢᠯᠢ ᠶᠢᠨ ᠤᠭᠤᠨᠤ ᠰᠢᠭ᠋ ᠰᠤᠷᠤᠭᠰᠠᠨ ᠪᠢ ᠰᠢᠩᠭᠡᠯᠢᠭ ᠲᠤ ᠤᠷᠤᠭᠰᠠᠨ ᠳᠠᠯᠠᠨ ᠬᠡᠯᠡᠳᠦ ᠴᠡᠭᠴᠡᠦᠭᠡᠢ ᠰᠢᠭ ᠬᠤᠷᠢᠭᠳᠠᠬᠤ ᠠᠴᠠ ᠰᠢᠨ᠎ᠡ ᠠᠭᠠᠷ  ᠢᠶᠠᠨ ᠠᠮᠠ ᠮᠡᠳᠡᠨ ᠳᠠᠳᠠᠶ᠎ᠠ︾ ᠭᠡᠯ᠎ᠡ ᠭᠡᠪᠡ ᠦᠦ︖ — ᠳᠡᠷᠡ ᠨᠠᠰᠤᠳᠠᠨ ᠳᠡᠭᠡᠵᠦ ᠪᠠᠶᠢᠭᠠᠳ ᠬᠠᠷᠢᠭᠰᠠᠨ᠂ ᠭᠡᠪᠡᠴᠦ ᠪᠢ ᠁ ᠲᠠᠨ ᠤ ᠬᠡᠯᠡᠭᠰᠡᠨ ᠰᠠᠶ᠋ᠢ ᠶᠢᠨ ᠬᠢ  ᠶᠢ ᠴᠢᠨᠢ ᠶᠠᠷᠢᠭᠤᠯᠬᠤ ᠬᠡᠰᠡᠨ ᠦᠭᠡᠢ ᠶᠤᠮ ᠪᠤᠯ︖ ᠬᠠᠨ ᠬᠠᠶᠢᠷᠬᠠᠨ ᠢ ᠨᠠᠭᠠᠰᠢ ᠨᠢ ᠬᠡᠵᠢᠶ᠎ᠠ ᠢᠷᠡᠳᠡᠭ ᠪᠤᠯᠪᠠ ᠦᠦ ᠭᠡᠳ ᠪᠠᠶᠢᠨ᠎ᠠ᠃ — ᠬᠠᠨ ᠬᠠᠶᠢᠷᠬᠠᠨ ᠭᠡᠬᠦ ᠠᠴᠠ ᠤᠯᠠᠨ ᠶᠠᠭᠤᠮ᠎ᠠ ᠪᠤᠳᠤᠭᠳᠠᠯ᠎ᠠ᠃ — ᠶᠠᠭ ᠳᠠᠶᠢᠨ ᠤ ᠦᠶ᠎ᠠ ᠶᠢᠨ ᠬᠢ ᠪᠠᠨ ᠦᠦ᠂ ᠲᠠ ᠫᠠᠷᠲ᠋ᠢᠽᠠᠨ ᠤ ᠪᠠᠨ ᠳᠤᠬᠠᠢ ᠬᠡᠯᠡᠵᠦ ᠪᠠᠶᠢᠨ᠎ᠠ ᠦᠦ︖ ᠰᠤᠨᠢᠨ ᠰᠠᠶᠢᠬᠠᠨ ᠶᠠᠭᠤᠮ᠎ᠠ ᠰᠤᠨᠤᠰᠴᠢᠬᠠᠬᠤ ᠰᠢᠭ᠋ ᠪᠤᠳᠤᠵᠦ᠂ ᠳᠡᠭᠡᠵᠦ ᠵᠢᠳᠬᠦᠬᠦᠯᠦᠭᠡᠳ ᠁ — ᠰᠠᠮᠪᠠ ᠮᠢᠨᠢ ᠫᠠᠷᠲ᠋ᠢᠽᠠᠨ ᠤ ᠳᠤᠬᠠᠢ ᠶᠠᠷᠢᠭᠠᠳ ᠪᠠᠶᠢᠬᠤ ᠴᠦ ᠶᠠᠭᠤ ᠪᠠᠶᠢᠬᠤᠪ᠃ ᠬᠠᠷᠢᠨ ᠁ ᠭᠡᠵᠦ ᠬᠡᠯᠡᠭᠡᠳ ᠳᠦᠷ ᠡᠭᠡᠳᠡᠷᠡᠵᠦ ᠠᠪᠤᠯ᠎ᠠ᠃ ᠳᠠᠬᠢᠨ ᠰᠠᠮᠪᠠ ᠶᠢ ᠱᠠᠯᠠᠬᠤ ᠪᠠᠷ ᠡᠷᠬᠢᠨ ᠳᠤᠭᠤᠷᠢᠨ ᠢ ᠠᠵᠢᠵᠦ ᠰᠢᠷᠳᠡᠪᠡ᠃ ᠳᠡᠭᠡᠭᠡᠳ ᠰᠡᠶᠢᠮᠡᠭᠡᠢ ᠱᠠ ᠪᠠᠷ ᠪᠦᠳᠡᠭᠡᠭᠰᠡᠨ ᠰᠢᠭ ᠰᠦᠮᠡᠯᠵᠡᠬᠦ ᠬᠤᠶᠢᠳᠤ ᠵᠦᠭ ᠤᠨ ᠠᠭᠤᠯᠠᠰ ᠢ ᠰᠢᠷᠪᠢᠨ ᠬᠠᠷᠠᠭᠰᠠᠨ ᠳᠠᠮᠪᠢ᠄ ︽ᠰᠠᠶ᠋ᠢ ᠶᠢᠨ ᠦᠡᠭᠭᠡᠷᠡᠭᠰᠡᠨ ᠤᠯᠠᠭᠠᠨ ᠬᠠᠳᠠᠳᠤ ᠠᠴᠠ ᠦᠭᠰᠦᠬᠦᠯᠦᠨ᠂ ᠬᠠᠨ᠎ᠠ ᠬᠠᠳᠠ ᠶᠢᠨ ᠭᠤᠤᠯ ᠢᠶᠠᠷ ᠳᠠᠮᠵᠢᠭᠤᠯᠤᠭᠰᠠᠭᠠᠷ᠂ ᠳᠡᠷᠳᠡᠭᠡ ᠰᠡᠬᠦᠶᠢᠨ ᠬᠠᠷᠠᠭᠳᠠᠬᠤ ᠬᠠᠨ ᠬᠠᠶᠢᠷᠬᠠᠨ ᠳᠤ ᠳᠤᠯᠭᠠᠪᠠᠯ᠂ ᠨᠢᠭᠡ ᠦᠯᠢᠭᠡᠷ ᠶᠠᠷᠢᠴᠢᠬᠠᠮᠠᠷ ᠪᠠᠶᠢᠨ᠎ᠠ︾ ᠭᠡᠪᠡ᠃ — ᠨᠡᠭᠡᠷᠡᠨ᠂ ᠳᠡᠭᠡᠯ ᠳ᠋ᠠ︕ — ᠬᠠᠷᠢᠨ ᠭᠡᠮ︕ ᠡᠮᠡᠭᠡᠯ ᠳᠡᠭᠡᠨ ᠪᠡᠭᠴᠡᠭᠡᠨᠡᠭᠡᠳ ᠪᠠᠶᠢᠳᠠᠭ ᠬᠤᠷᠢ ᠭᠠᠷᠤᠶᠢᠬᠠᠨ ᠨᠠᠰᠤᠳᠠᠢ ᠡᠷ᠎ᠡ ᠳᠤ ᠶᠠᠷᠢᠬᠤ ᠭᠡᠰᠡᠨ ᠠᠴᠠ ᠶᠤᠮ ᠦᠦ︖ ᠬᠠᠯᠠᠭᠤᠨ ᠳᠤ ᠠᠩᠭᠠᠭᠰᠠᠨ ᠠᠴᠠ ᠶᠤᠮ ᠦᠦ︖ ᠶᠠᠭᠤ ᠴᠦ ᠬᠡᠰᠡᠨ ᠬᠤᠭᠤᠯᠠᠢ ᠮᠢᠨᠢ ᠵᠠᠭᠠᠳᠤᠨᠠᠭᠠᠳ ᠪᠠᠶᠢᠨ᠎ᠠ ᠁ — ᠫᠦᠬᠦ︕ ᠨᠠᠮᠠᠢᠢ ᠪᠠᠰᠤᠵᠦ ᠪᠠᠶᠢᠨ᠎ᠠ ᠦᠦ︖ ᠪᠢ ᠴᠢᠨᠢ ᠳᠠᠭ᠎ᠠ ᠶᠢᠨ ᠤᠪᠤᠭᠠᠨ ᠤ ᠳᠠᠬᠢᠯᠭᠠᠨ ᠳᠤ ᠦᠷᠢᠶ᠎ᠠ ᠰᠤᠷᠢᠵᠦ ᠱᠠᠩ ᠠᠪᠴᠦ ᠪᠠᠶᠢᠭᠰᠠᠨ ᠶᠤᠮ︕ — ᠵᠠ᠂ ᠤᠤᠬᠠᠢ︕ ᠬᠤᠰᠢᠭᠤ ᠤᠪᠤᠭᠠᠨ ᠳᠠᠭᠠᠨ ᠮᠤᠷᠢ ᠤᠷᠤᠯᠳᠤᠭᠠᠵᠦ ᠳᠡᠷᠢᠬᠦᠨ ᠱᠠᠩ ᠠᠪᠴᠦ ᠪᠠᠶᠢᠯ᠎ᠠ ᠬᠡᠳᠡᠭ ᠪᠤᠯᠤᠭᠠᠰᠠᠢ᠂ ᠬᠠᠷᠢᠨ ᠴᠦ᠄ ︽ᠮᠠᠭᠤ ᠡᠮ ᠤᠤᠭᠤᠬᠤ ᠠᠴᠠ ᠰᠠᠶᠢᠨ ᠦᠭᠡᠨ ᠳᠤ ᠡᠪᠡᠳᠴᠢᠨ ᠠᠶᠠᠳᠠᠨ᠎ᠠ︾ ᠭᠡᠳᠡᠭᠴᠢᠯᠠᠨ ᠬᠤᠭᠤᠯᠠᠢ ᠮᠢᠨᠢ ᠡᠳᠡᠭᠡᠬᠦ ᠶᠠᠭᠤᠨ ᠤ ᠮᠠᠭᠠᠳ ᠭᠡᠵᠦ ᠦᠰᠬᠡᠬᠦᠯᠦᠭᠰᠡᠨ ᠳᠠᠮᠪᠢ᠂ ᠡᠮᠡᠭᠡᠯ ᠤᠨ ᠵᠦᠭᠡᠯᠡᠪᠴᠢ ᠪᠤᠯᠭᠠᠨ ᠳᠤᠬᠤᠭᠰᠠᠨ ᠳᠤᠯᠤᠨ ᠨᠤᠤᠷ ᠬᠢᠴᠠ ᠲᠠᠢ ᠡᠷᠢᠶᠠᠨ ᠦᠷᠮᠦᠭ ᠰᠢᠭ ᠢᠶᠠᠨ ᠠᠯᠠᠭᠯᠠᠬᠤ ᠳᠠᠷᠢᠶᠠᠨ  ᠤ ᠱᠠᠩᠰᠢ ᠶᠢᠨ ᠴᠠᠭᠠᠳᠤᠬᠢ ᠠᠳᠠᠷ ᠢ ᠨᠢᠳᠤᠯᠠᠨ᠄ — ᠵᠠ ᠪᠠᠶᠢᠵᠠ᠃ ᠡᠷᠡᠬᠦᠯ ᠭᠠᠵᠠᠷ ᠤᠨ ᠠᠮᠢᠰᠬᠤᠯ ᠡᠮ ᠭᠡᠳᠡᠭ ᠪᠢᠵᠠ᠃ ᠳᠡᠨᠳᠡ ᠳᠦᠷ ᠠᠮᠤᠰᠬᠢᠵᠦ᠂ ᠦᠪᠡᠷ  ᠤᠨ ᠬᠤᠭᠤᠯᠠᠢ ᠲᠠᠢ ᠪᠠᠨ ᠴᠢᠨᠤ ᠬᠤᠶᠠᠩ ᠢ ᠳᠤᠮᠨᠤᠶ᠎ᠠ ᠭᠡᠵᠦ ᠢᠨᠢᠶᠡᠮᠰᠦᠭᠯᠠᠨ ᠮᠤᠷᠢ ᠡᠷᠬᠢᠬᠦᠯᠦᠨ ᠵᠠᠮ ᠠᠴᠠ ᠭᠠᠷᠴᠠᠢ᠃ ᠨᠢᠷᠤᠭᠤ ᠬᠦᠡᠭᠭᠡᠷᠡᠭᠰᠡᠨ ᠮᠤᠷᠢᠳ ᠬᠦᠯᠦᠰᠤᠨ ᠦᠨᠦᠷ ᠠᠴᠠ ᠪᠠᠨ ᠰᠦᠷᠬᠦᠨ ᠡᠷᠬᠢᠭᠡᠳ᠂ ᠰᠠᠯᠬᠢᠨ ᠦᠭᠡᠳᠡ ᠬᠠᠷᠠᠵᠦ ᠵᠤᠭᠰᠤᠨ ᠬᠠᠨᠭ᠍ᠬᠤᠨ ᠠᠬᠢ ᠳᠡᠷᠢᠬᠦᠳᠡᠨ ᠬᠠᠨᠭ᠍ᠬᠤᠯᠤᠭᠰᠠᠨ ᠰᠤᠷᠭᠤᠭ ᠠᠭᠠᠷ ᠳᠠᠳᠠᠬᠤ ᠳᠠᠭᠠᠨ ᠪᠦᠭᠡᠮ ᠢᠯᠠᠭ᠎ᠠ ᠶᠢ ᠰᠤᠷᠤᠵᠦ ᠠᠪᠤᠭᠠᠳ ᠬᠦᠯ ᠴᠠᠪᠴᠢᠯᠠᠨ ᠳᠤᠷᠬᠢᠵᠦ ᠪᠠᠶᠢᠪᠠ᠃ ᠠᠮᠢᠰᠬᠤᠭ᠎ᠠ ᠳᠠᠷᠤᠭᠰᠠᠨ ᠮᠤᠷᠢᠳ ᠬᠠᠮᠠᠷ ᠰᠡᠷᠳᠡᠶᠢᠯᠭᠡᠨ ᠴᠢᠬᠢ ᠰᠤᠯᠪᠢᠵᠦ᠂ ᠬᠦᠯ ᠴᠢᠩᠭᠠᠷᠠᠨ ᠳᠠᠳᠠᠰᠢ ᠨᠡᠮᠡᠨ᠎ᠡ᠃ ᠠᠶᠠᠨ ᠤ ᠵᠤᠭ᠎ᠠ᠂ ᠦᠭᠡᠨ ᠤ ᠨᠠᠶᠢᠷᠠᠭ ᠪᠤᠯᠤᠭᠰᠠᠨ ᠬᠠᠨ ᠬᠠᠶᠢᠷᠬᠠᠨ ᠤ ᠦᠯᠢᠭᠡᠷ ᠢ ᠤᠯᠠᠭᠠᠨ ᠬᠠᠳᠠᠳᠤ ᠠᠴᠠ ᠡᠬᠢᠯᠠᠪᠠ᠄ — ᠵᠡ ᠳᠡᠭᠡᠪᠠᠯ᠂ ᠤᠨ ᠤᠨ ᠠᠴᠠ ᠤᠨᠴᠠ ᠬᠦᠢᠳᠡᠨ ᠡᠪᠤᠯ ᠪᠠᠶᠢᠪᠠ᠃ ᠤᠷᠤᠨ ᠨᠤᠳᠤᠭ ᠢᠶᠠᠨ ᠬᠠᠮᠠᠭᠠᠯᠠᠭᠰᠠᠨ ᠪᠢᠳᠡ᠂ ᠡᠨᠡ ᠳᠦᠬᠦᠮ ᠢᠶᠠᠷ ᠡᠳᠦᠷᠵᠢᠨ ᠰᠦᠨᠢᠵᠢᠨ ᠴᠠᠭᠳᠠᠨ ᠬᠡᠭᠵᠢᠬᠦᠯᠵᠦ ᠪᠠᠶᠢᠯ᠎ᠠ᠃ ᠳᠡᠭᠡᠬᠦ ᠳᠡᠭᠡᠨ ᠬᠠᠮᠢᠭ᠎ᠠ  ᠠᠴᠠ ᠬᠠᠮᠢᠭ᠎ᠠ ᠬᠦᠷᠬᠦ ᠳᠤ ᠬᠡᠳᠦ ᠦᠨᠳᠡᠶᠢᠯᠭᠡᠪᠡᠯ ᠬᠦᠷᠳᠡᠭ ᠢᠶᠠᠨ ᠰᠤᠬᠤᠷ ᠬᠦᠮᠦᠨ ᠤ ᠠᠯᠬᠤᠭ᠎ᠠ ᠳᠤᠭᠠᠯᠠᠨ ᠮᠡᠳᠡᠳᠡᠭ ᠰᠢᠭ ᠠᠨᠳᠠᠯ ᠦᠭᠡᠢ ᠪᠤᠯᠴᠢᠬᠠᠭᠰᠠᠨ ᠪᠠᠶᠢᠯ᠎ᠠ᠃ ᠳᠠᠶᠢᠨ ᠳᠠᠵᠢᠨ ᠬᠡᠳᠡᠭ ᠴᠡᠷᠢᠭ ᠬᠦᠮᠦᠨ ᠢ ᠳᠡᠶᠢᠮᠤ ᠮᠡᠷᠭᠡᠨ ᠪᠤᠯᠭᠠᠴᠢᠬᠠᠳᠠᠭ ᠶᠤᠮ ᠪᠠᠶᠢᠨ᠎ᠠ᠃ ᠤᠳᠤ ᠬᠠᠷᠢᠨ ᠴᠢ ᠦᠨᠡᠮᠰᠢᠬᠦ ᠦᠭᠡᠢ ᠪᠠᠶᠢᠵᠦ ᠴᠦ ᠪᠤᠯᠤᠯ ᠦᠭᠡᠢ︕ ᠳᠡᠭᠡᠪᠡᠴᠦ ᠁ ᠳᠡᠷᠡ ᠰᠦᠨᠢ᠂ ᠡᠨᠡ ᠤᠯᠠᠭᠠᠨ ᠬᠠᠳᠠᠳᠤ ᠠᠴᠠ ᠮᠤᠷᠳᠠᠯ᠎ᠠ᠃ ᠰᠦᠨᠢ ᠶᠢᠨ ᠰᠢᠭᠤᠷᠭ᠎ᠠ ᠨᠢᠳᠤ ᠨᠢᠭᠤᠷ ᠦᠭᠡᠢ ᠶᠢ ᠬᠡᠯᠡᠬᠦ ᠦᠦ᠃ ᠴᠤᠬᠤᠮ ᠮᠠᠨ ᠤ ᠡᠷᠳᠡᠮ ᠴᠦ ᠤᠷᠬᠤᠳᠠᠢ ᠪᠤᠯᠤᠯ᠎ᠠ᠃ ᠡᠨᠡ ᠬᠠᠪᠢ ᠪᠠᠷ ᠦᠭᠰᠦᠬᠦ ᠳᠤᠳᠤᠮ ᠤᠨᠤᠭᠠᠷᠢ ᠮᠤᠷᠢᠳ ᠰᠢᠭᠤᠷᠭᠠᠨ ᠳᠤ ᠭᠤᠶᠠᠳᠠᠭᠤᠯᠤᠨ ᠪᠤᠴᠠᠵᠦ ᠤᠷᠤᠭᠤᠳᠠᠬᠤ ᠭᠡᠳ ᠤᠨᠤᠭᠰᠠᠨ ᠬᠦᠮᠦᠰ ᠴᠦ ᠠᠷᠤ ᠪᠦᠭᠡᠷᠭᠡ ᠠᠴᠠ ᠪᠠᠨ ᠮᠤᠯᠳᠤ ᠦᠯᠢᠶᠡᠭᠳᠡᠬᠦ ᠭᠡᠳ ᠮᠤᠷᠢ ᠪᠠᠨ ᠵᠠᠯᠠᠵᠦ ᠶᠠᠪᠤᠭ᠎ᠠ ᠪᠢᠳᠡ ᠳᠡᠷᠭᠡ ᠴᠢᠷᠦᠭᠰᠡᠨ ᠬᠦᠮᠦᠨ ᠰᠢᠭ ᠤᠷᠤᠭᠰᠢ ᠳᠦᠷᠢᠰᠬᠢᠭᠡᠳ ᠪᠠᠶᠢᠯ᠎ᠠ᠃ ᠡᠨᠡ ᠬᠠᠪᠢ ᠴᠦᠮ ᠳᠡᠭᠡᠨ ᠵᠠᠭᠤᠷᠠᠳᠤ ᠶᠢᠨ ᠤᠷᠤᠨ ᠪᠠᠶᠢᠭᠰᠠᠨ ᠪᠤᠯᠬᠤᠷ ᠮᠠᠨ ᠤ ᠪᠤᠶᠤ ᠭᠤᠮᠢᠨᠳᠠᠩ ᠤᠨ ᠰᠦᠰᠦᠭᠳᠡᠳ ᠵᠦᠡᠭᠳᠡᠭᠡᠨ ᠨᠢᠭᠤᠴᠠ ᠪᠠᠶᠢᠭᠰᠠᠨ᠃ ᠳᠡᠭᠡᠬᠦᠯᠠᠷ ᠪᠤᠤᠴᠠᠩ  ᠳᠤ ᠡᠬᠦᠷᠯᠡᠭᠰᠡᠨ ᠮᠤᠩᠭᠤᠯ ᠤᠷᠪᠠᠮᠠᠯ ᠢᠶᠠᠷ ᠰᠢᠷᠪᠤᠰᠤ ᠪᠤᠯᠭᠠᠭᠰᠠᠨ ᠠᠷᠪᠠᠨ ᠳᠦᠷᠪᠡᠳᠦᠭᠡᠷ ᠴᠤᠪᠤᠭ᠎ᠠ ᠭᠡᠳᠡᠭ ᠳᠡᠭᠡᠷᠡᠮ ᠤᠨ ᠳᠡᠭᠡᠷ᠎ᠡ ᠭᠤᠮᠢᠨᠳᠠᠩ ᠤᠨ ᠮᠠᠰᠢᠨ ᠲᠠᠢ ᠳᠡᠭᠡᠷᠡᠮ ᠤᠨ ᠳᠦᠭᠵᠢᠷᠡᠵᠦ ᠪᠠᠶᠢᠬᠤ ᠶᠢ ᠮᠡᠳᠡᠪᠡ᠃ ᠡᠳᠦᠷ ᠨᠢ ᠶᠡᠭᠡ ᠴᠡᠷᠢᠭ ᠤᠨ ᠳᠤᠷᠰᠢᠭᠤᠯ ᠤᠨ ᠬᠡᠰᠡᠭ ᠲᠠᠢ ᠠᠭᠤᠯᠵᠠᠭᠰᠠᠨ ᠪᠤᠯᠬᠤᠷ ᠳᠡᠳᠡᠨ ᠳᠤ ᠬᠡᠯᠡᠵᠦ᠂ ᠶᠡᠭᠡ ᠴᠡᠷᠢᠭ  ᠲᠡᠭᠡᠨ ᠬᠡᠯᠡᠬᠦ ᠭᠡᠵᠦ ᠶᠠᠭᠠᠷᠠᠨ ᠪᠤᠴᠠᠭᠰᠠᠨ ᠨᠢ ᠳᠡᠷᠡ᠃ ᠡᠬᠦᠷᠭᠡ ᠪᠠᠨ ᠪᠡᠶᠡᠯᠡᠬᠦᠯᠦᠭᠰᠡᠨ ᠪᠢᠳᠡ ᠦᠦᠷ ᠤᠨ ᠭᠤᠵᠤᠩ ᠭᠡᠭᠡ ᠪᠠᠷ ᠤᠷᠪᠤᠭ ᠲᠤ ᠬᠦᠷᠦᠯ᠎ᠠ᠃ ᠪᠢᠳᠡ ᠮᠤᠷᠢᠳ  ᠢᠶᠠᠨ ᠠᠮᠠᠷᠠᠭᠤᠯᠬᠤ ᠶᠢᠨ ᠢᠯᠳᠠᠷ᠎ᠠ ᠴᠠᠭ ᠤᠨ ᠪᠠᠶᠢᠳᠠᠯ ᠢ ᠳᠠᠩᠰᠠᠨ᠂ ᠠᠵᠢᠯᠯᠠᠬᠤ ᠪᠠᠷᠢᠭᠠᠳᠠ ᠳᠤ ᠬᠠᠮᠵᠢᠵᠦ᠂ ᠬᠦᠨᠡᠰᠦᠨ ᠤ ᠳᠡᠷᠭᠡ ᠨᠦᠭᠦᠳ ᠢ ᠠᠷᠤ ᠳᠠᠯ᠎ᠠ ᠤᠷᠤᠭᠤ ᠭᠠᠷᠭᠠᠵᠦ ᠠᠮᠵᠢᠭᠠᠳ᠂ ᠠᠷᠠᠳ ᠲᠤ ᠬᠡᠯᠡᠵᠦ᠂ ᠳᠠᠷᠢᠶ᠎ᠠ ᠳᠦᠮᠦᠰᠦ ᠶᠢ ᠵᠤᠭᠤᠷᠢᠯᠠᠭᠤᠯᠪᠠ᠃ ᠡᠳᠦᠷ ᠬᠤᠨᠤᠭ ᠤᠨ ᠶᠤᠰᠤᠭᠠᠷ ᠳᠤᠭᠠᠯᠠᠪᠠᠯ ᠦᠨᠵᠢᠭᠰᠡᠨ ᠤᠬᠠᠭᠠᠨ ᠲᠠᠢ ᠶᠤᠮ᠃ ᠮᠠᠨ ᠤ ᠤᠯᠤᠭᠰᠠᠨ ᠮᠡᠳᠡᠭᠡ ᠬᠤᠳᠠᠯ ᠪᠤᠯᠤᠭᠰᠠᠨ ᠰᠢᠭ᠋ ᠳᠠᠭ ᠪᠠᠶᠢᠯ᠎ᠠ᠃ ᠦᠦᠷ ᠢᠶᠠᠷ ᠤᠡᠭᠭᠤᠶᠢᠭᠰᠠᠨ ᠳᠡᠭᠷᠢ ᠮᠠᠨᠳᠤᠬᠤ ᠨᠠᠷᠠᠨ ᠲᠠᠢ ᠠᠳᠠᠭᠠᠷᠬᠠᠨ ᠵᠠᠳᠠᠷᠠᠵᠦ ᠪᠠᠶᠢᠯ᠎ᠠ᠃ ᠰᠡᠮᠡᠷᠭᠡᠢ ᠰᠠᠮᠪᠠᠢ ᠶᠢᠨ ᠴᠠᠭᠠᠨ᠎ᠠ ᠳᠡᠬᠦᠵᠢᠯᠡᠭᠳᠡᠭᠰᠡᠨ ᠮᠦᠡᠭᠬᠦᠨ ᠳᠤᠯᠢ ᠮᠡᠳᠦ ᠴᠠᠶᠢᠪᠤᠷᠳᠠᠭᠰᠠᠨ ᠨᠠᠷᠢᠨ ᠵᠢᠪᠠᠷᠳᠤ ᠤᠭᠳᠠᠷᠭᠤᠢ ᠳᠤ ᠭᠤᠷᠪᠠᠨ ᠳᠠᠪᠬᠤᠷ ᠬᠦᠷᠢᠶᠡᠯᠡᠭᠳᠡᠵᠦ᠂ ᠢᠯᠴᠢ ᠴᠦ ᠦᠭᠡᠢ ᠰᠢᠯᠪᠠᠯᠵᠠᠨ᠎ᠠ᠃ ᠦᠷᠯᠦᠭᠡ ᠶᠢᠨ ᠰᠢᠭᠤᠷᠭᠠᠨ ᠳᠤ ᠴᠤᠬᠢᠭᠳᠠᠨ ᠡᠮᠡᠭᠡᠯ ᠳᠡᠭᠡᠨ ᠡᠪᠭᠡᠷᠡᠨ ᠤᠷᠤᠬᠤ ᠰᠢᠬᠠᠮ ᠪᠤᠯᠤᠭᠰᠠᠨ ᠮᠤᠷᠢᠳ᠂ ᠰᠢᠵᠢᠮ ᠳᠡᠭᠡᠨ ᠳᠤᠶᠢᠯᠠᠵᠦ ᠰᠢᠪᠬᠠᠷᠳᠠᠳᠠᠯ᠎ᠠ ᠵᠠᠨᠴᠢᠭᠤᠯᠤᠭᠰᠠᠨ ᠡᠮᠨᠢᠭ ᠤᠳ ᠮᠡᠳᠦ ᠴᠡᠴᠡᠷᠡᠯᠳᠦᠵᠦ ᠪᠠᠶᠢᠪᠠ᠃ ᠭᠡᠳᠡᠯ᠎ᠡ ᠪᠠᠶᠢᠨ᠎ᠠ ᠦᠦ︕ ᠢᠷᠸ᠎ᠠ ᠶᠢᠨ ᠳᠤᠬᠢᠶ᠎ᠠ ᠪᠤᠯᠪᠠ᠂ ᠬᠠᠷᠠᠭᠤᠯ ᠤᠨ ᠪᠠᠴᠢᠮ ᠮᠡᠳᠡᠭᠡ ᠪᠠᠷ ᠶᠠᠭᠤᠨ ᠤ ᠡᠮᠤᠨ᠎ᠠ ᠤᠷᠪᠤᠭ ᠤᠨ ᠤᠷᠢᠳᠤᠬᠢ ᠤᠷᠤᠢ ᠳᠡᠭᠡᠷ᠎ᠡ ᠭᠠᠷᠴᠦ ᠦᠵᠠᠯ᠎ᠠ᠃ ᠬᠦᠷ ᠴᠠᠰᠤᠨ ᠳᠤ ᠰᠦᠬᠦᠳᠴᠦ ᠬᠦᠴᠢᠷᠳᠡᠭᠰᠡᠨ ᠭᠤᠮᠢᠨᠳᠠᠩ ᠤᠨ ᠮᠠᠰᠢᠨ ᠨᠤᠭᠤᠳ ᠮᠤᠲ᠋ᠤᠷ ᠢᠶᠠᠨ ᠬᠦᠴᠦᠯᠠᠨ ᠬᠦᠷᠴᠢᠬᠢᠨᠡᠬᠦᠯᠵᠦ᠂ ᠮᠠᠨ ᠤ ᠰᠤᠷᠠᠭ ᠢ ᠮᠡᠳᠡᠭᠰᠡᠨ ᠪᠤᠯᠤᠯᠳᠠᠢ ᠨᠠᠳᠠ ᠤᠷᠤᠭᠤ ᠤᠪᠤᠰ ᠤᠪᠤᠰ ᠬᠦᠳᠡᠯᠵᠦ. ᠪᠠᠶᠢᠯ᠎ᠠ᠃ ᠦᠵᠡᠰᠡ ᠴᠠᠰᠤᠳᠤ ᠭᠠᠵᠠᠷ ᠳᠡᠪᠳᠡᠭᠰᠡᠨ ᠮᠠᠰᠢᠨ  ᠤ ᠤᠪᠤᠯᠵᠠᠬᠤ ᠨᠢ ᠴᠠᠭᠠᠨ ᠢᠰᠡᠭᠡᠢ ᠳᠡᠭᠡᠷ᠎ᠡ ᠪᠦᠭᠳᠦᠯᠵᠡᠬᠦ ᠦᠮᠡᠭᠡᠢ ᠬᠤᠷᠤᠬᠠᠢ ᠶᠢᠨ ᠠᠳᠠᠯᠢ ᠪᠠᠷ ᠤᠤᠯ ᠭᠠᠵᠠᠷ  ᠠᠴᠠ ᠪᠠᠨ ᠰᠠᠯᠤᠯ ᠦᠭᠡᠢ ᠪᠠᠷ ᠦᠳᠦᠭ ᠳᠦᠳᠦᠭ ᠬᠠᠷᠠᠭᠳᠠᠨ᠂ ᠮᠠᠰᠢᠨ ᠤ ᠮᠥᠨ ᠴᠢᠨᠠᠷ ᠢᠶᠠᠨ ᠠᠯᠳᠠᠵᠠᠢ᠃ ᠨᠢᠭᠡ ᠦᠵᠡᠬᠦ ᠳᠤ ᠡᠬᠦᠷ ᠤᠨ ᠵᠦᠭᠡᠢ ᠪᠤᠳᠠᠷᠠᠭᠰᠠᠨ ᠰᠢᠭ᠋ ᠴᠦ ᠳᠦᠡᠭᠬᠢᠨᠡᠪᠡᠴᠦ᠂ ᠵᠦᠭᠡᠢ ᠶᠢᠨ ᠠᠳᠠᠯᠢ ᠪᠠᠷ ᠰᠢᠭᠤᠳ ᠳᠤᠪᠳᠤᠯᠬᠤ ᠠᠶᠤᠯ ᠦᠭᠡᠢ ᠨᠢ ᠬᠠᠪᠤᠯᠢᠭ ᠪᠠᠶᠢᠯ᠎ᠠ᠃ ᠭᠠᠭᠴᠠ ᠬᠡᠳᠦ ᠬᠡᠳᠦᠨ ᠵᠠᠮ ᠳᠤᠪᠳᠤᠯᠤᠭᠰᠠᠨ ᠳᠠᠶᠢᠰᠤᠨ᠂ ᠮᠦᠴᠡᠭᠡᠷᠭᠡᠬᠦ ᠡᠳᠡᠭᠡᠳ ᠦᠭᠡᠢ ᠶᠠᠪᠤᠭ᠎ᠠ ᠨᠢ ᠢᠯᠡᠷᠭᠡᠢ᠃ ᠭᠡᠪᠡᠴᠦ ᠳ᠋ᠠᠯᠢᠨ ᠵᠢᠩᠽᠢ ᠠᠴᠠ ᠠᠷᠪᠠᠭᠠᠳ ᠮᠠᠰᠢᠨ ᠭᠠᠷᠴᠦ ᠮᠠᠨ ᠤ ᠪᠠᠷᠠᠭᠤᠨ ᠬᠤᠶᠢᠳᠤᠬᠢ ᠴᠠᠭᠠᠨ ᠪᠤᠮᠪᠠ ᠬᠡᠳᠡᠭ ᠭᠠᠵᠠᠷ ᠦᠭᠡᠳᠡ ᠰᠤᠭᠤᠷᠠᠬᠤ ᠳᠤ ᠬᠠᠰᠢᠶᠠᠳᠤ ᠶᠢᠨ ᠳᠡᠨᠳᠡᠬᠢ ᠮᠠᠰᠢᠨ ᠤ ᠵᠠᠷᠢᠮ ᠨᠢ ᠪᠠᠷ᠎ᠠ ᠦᠭᠡᠢ ᠪᠤᠯᠵᠦ ᠪᠠᠶᠢᠪᠠ᠃ ᠮᠠᠨ ᠢ ᠶᠡᠭᠡ ᠴᠡᠷᠢᠭ ᠭᠡᠵᠦ ᠠᠨᠳᠠᠭᠤᠷᠠᠨ ᠰᠦᠷᠳᠡᠭᠰᠡᠨ ᠪᠤᠶᠤ ᠡᠰᠡᠬᠦᠯ᠎ᠠ ᠴᠦᠭᠡᠨ ᠳᠤᠨᠢ ᠪᠠᠰᠤᠮᠵᠢᠯᠠᠭᠰᠠᠨ ᠢ ᠪᠤᠤ ᠮᠡᠳᠡ᠃ ᠬᠠᠨ᠎ᠠ ᠬᠠᠳᠠ ᠶᠢᠨ ᠭᠤᠤᠯ ᠢᠶᠠᠷ ᠬᠠᠪᠴᠢᠬᠤ ᠬᠤᠮᠤᠷᠠᠭ᠎ᠠ ᠪᠤᠯᠭᠠᠬᠤ ᠰᠠᠨᠠᠭᠠᠳᠠᠢ ᠨᠢ ᠢᠪ ᠢᠯᠠ᠃ ᠪᠢᠳᠡ᠂ ᠶᠡᠭᠡ ᠴᠡᠷᠢᠭ ᠤᠨ ᠳᠤᠷᠰᠢᠭᠤᠯ ᠤᠨ ᠬᠡᠰᠡᠭ ᠲᠠᠢ ᠠᠭᠤᠯᠵᠠᠨ᠂ ᠬᠠᠨ ᠬᠠᠶᠢᠷᠬᠠᠨ ᠤ ᠤᠷᠴᠢᠮ ᠪᠠᠶᠢᠭᠰᠠᠨ ᠶᠡᠭᠡ ᠴᠡᠷᠢᠭ ᠲᠡᠭᠡᠨ ᠮᠡᠳᠡᠭᠡ ᠦᠭᠬᠦᠭᠰᠡᠨ ᠪᠤᠯᠬᠤᠷ ᠠᠭᠠᠵᠢᠭᠤᠬᠠᠨ ᠪᠠᠶᠢᠪᠠ᠃ ᠮᠠᠨ ᠤ ᠳᠦᠰᠢᠭ ᠭᠡᠪᠡᠯ ᠳᠡᠷᠡ ᠬᠠᠷᠠᠭᠳᠠᠵᠦ ᠪᠠᠶᠢᠭ᠎ᠠ ᠳᠦᠰᠢᠶᠠᠳᠤ ᠶᠢᠨ ᠤᠨᠴᠠ ᠠᠭᠤᠯᠠ ᠪᠠᠶᠢᠯ᠎ᠠ ᠭᠡᠵᠦ ᠳᠠᠰᠢᠭᠤᠷ ᠵᠠᠩᠭᠠᠨ ᠤᠷᠪᠤᠭ ᠤᠨ ᠴᠢᠭ  ᠲᠤ ᠵᠢᠭᠠᠭᠰᠠᠨ ᠳᠠᠮᠪᠢ᠄ ︽ᠳᠡᠷᠡ ᠡᠳᠦᠷ ᠤᠨ ᠭᠡᠨᠡᠨ ᠭᠡᠭᠴᠢ ᠶᠢ ᠶᠠᠷᠢᠰᠢ ᠦᠭᠡᠢ︾ ᠭᠡᠳ ᠵᠤᠬᠢᠰᠬᠤ ᠰᠢᠭ᠋ ᠳᠤᠭᠤᠢ ᠪᠤᠯᠤᠨ ᠬᠠᠨ ᠬᠠᠶᠢᠷᠬᠠᠨ ᠵᠦᠭ ᠰᠢᠨᠤᠯᠳᠠᠶᠢᠶ᠎ᠠ ᠬᠠᠷᠠᠪᠠ᠃ ᠪᠢᠳᠡ ᠨᠢᠭᠡᠪᠦᠷᠢ ᠨᠢᠵᠡᠭᠡᠳ ᠮᠠᠰᠢᠨ ᠲᠠᠢ ᠪᠠᠶᠢᠯᠳᠤᠬᠤ ᠬᠤᠮᠤᠷᠭᠠᠨ ᠳᠤ ᠤᠷᠤᠯ᠎ᠠ᠃ ᠮᠠᠨ ᠢ ᠳᠦᠰᠢᠶᠠᠳᠤ ᠶᠢᠨ ᠪᠠᠯ  ᠢᠶᠠᠷ ᠪᠠᠭᠤᠳᠠᠯ᠎ᠠ ᠴᠠᠭᠠᠨ ᠪᠤᠮᠪᠠ ᠪᠠᠷ ᠬᠡᠷᠦᠵᠦ ᠳᠤᠪᠳᠤᠯᠤᠭᠰᠠᠨ ᠮᠠᠰᠢᠨ ᠨᠤᠭᠤᠳ ᠤᠯᠠᠮ ᠮᠦᠷᠦᠶᠢᠴᠡᠵᠦ ᠭᠠᠷᠤᠯ᠎ᠠ᠃ ᠮᠠᠨ ᠤ ᠬᠤᠷᠳᠤᠨ ᠬᠦᠯᠦᠭ ᠤᠳ ᠮᠢᠨᠢ ᠳᠡᠭᠡᠰᠦᠳᠠᠨ ᠢᠷᠡᠬᠦ ᠳᠠᠶᠢᠰᠤᠨ ᠤ ᠰᠤᠮᠤᠨ ᠳᠤᠤᠭᠤᠷ ᠰᠢᠨ᠎ᠡ ᠴᠠᠷᠬᠢ ᠳᠠᠳᠠᠭᠤᠯᠤᠨ ᠰᠤᠨᠵᠦ ᠪᠠᠶᠢᠯ᠎ᠠ᠃ ᠵᠤᠳ ᠳᠤᠷᠬᠤᠨ ᠭᠡᠴᠡᠬᠦᠦ ᠪᠠᠶᠢᠭᠰᠠᠨ ᠨᠢ ᠳᠠᠶᠢᠰᠤᠨ ᠢ ᠬᠤᠷᠢᠭᠯᠠᠬᠤ ᠪᠠᠶᠢᠭᠠᠯᠢ  ᠶᠢᠨ ᠳᠤᠳᠬᠠᠷ ᠪᠤᠯᠵᠦ ᠮᠠᠨ ᠳᠤ ᠳᠤᠰᠠ ᠪᠤᠯᠵᠦ ᠪᠠᠶᠢᠯ᠎ᠠ᠃ ᠭᠡᠪᠡᠴᠦ ᠮᠠᠰᠢᠨ ᠤ ᠺᠠᠫᠢᠨ ᠳᠡᠭᠡᠷ᠎ᠡ ᠠᠴᠠ ᠱᠦᠬᠦᠷᠳᠡᠯᠡᠨ ᠰᠦᠷᠴᠢᠯᠡᠬᠦ ᠫᠦᠯᠧᠮᠶᠦᠲ ᠤᠨ ᠰᠤᠮᠤᠨ ᠪᠤᠷᠤᠭ᠎ᠠ ᠨᠢ ᠴᠢᠬᠢᠨ ᠳᠤ ᠬᠠᠳᠠᠵᠦ ᠡᠪ ᠦᠭᠡᠢ ᠪᠠᠶᠢᠪᠠ᠃ ᠶᠠᠭ ᠮᠠᠨ ᠢ ᠳᠠᠶᠢᠰᠤᠨ ᠤ ᠫᠤᠤ ᠶᠢᠨ ᠤᠪᠤᠤ ᠲᠠᠢ ᠤᠨᠤᠭᠤᠷᠤᠯᠳᠤᠨ ᠦᠡᠭᠭᠡᠷᠡᠬᠦ ᠦᠶ᠎ᠠ ᠮᠠᠨ ᠤ ᠬᠢ ᠠᠴᠠ ᠨᠢᠭᠡ ᠮᠤᠷᠢ ᠠᠯᠠᠭᠳᠠᠵᠦ ᠬᠦᠮᠦᠨ ᠨᠢ ᠶᠠᠪᠠᠭᠠᠷᠠᠪᠠ᠃ ᠨᠠᠮᠠᠢᠢ ᠫᠠᠯ ᠪᠠᠭᠤᠭᠠᠳ ᠶᠠᠪᠤᠳᠠᠯ᠎ᠠ᠂ ᠳᠡᠷᠭᠡᠳᠡ ᠮᠢᠨᠢ ᠳᠠᠪᠬᠢᠵᠦ ᠪᠠᠶᠢᠭᠰᠠᠨ ᠰᠠᠩᠵᠠᠢ ᠭᠡᠳᠡᠭ ᠪᠠᠶᠢᠯᠳᠤᠭᠴᠢ ᠭᠠᠯᠯᠠᠵᠦ ᠪᠠᠶᠢᠭᠰᠠᠨ ᠫᠤᠤ ᠪᠠᠨ ᠡᠬᠦᠷᠦᠮᠡᠭᠴᠡ ᠮᠤᠷᠢ ᠪᠠᠨ ᠤᠷᠭᠠᠨ ᠳᠤ ᠰᠠᠭᠤᠯᠭᠠᠬᠤ ᠰᠢᠭ᠋ ᠬᠦᠴᠦᠳᠠᠢ ᠬᠡᠯᠪᠡᠷᠢᠨ ᠪᠡᠶ᠎ᠡ ᠪᠦᠭᠳᠦᠶᠢᠬᠦ ᠨᠢ ᠦᠵᠡᠭᠳᠡᠪᠡ ᠁ ᠪᠢᠳᠡ ᠳᠠᠶᠢᠰᠤᠨ ᠤ ᠬᠤᠮᠤᠷᠠᠭ᠎ᠠ ᠠᠴᠠ ᠮᠤᠯᠳᠤᠷᠠᠨ ᠠᠭᠤᠯᠠ ᠳᠠᠪᠠᠪᠠ᠃ ᠰᠠᠩᠵᠠᠢ ᠪᠠᠷ ᠳᠡᠬᠦᠷᠦᠬᠦᠯᠵᠦ ᠮᠡᠨᠳᠦ ᠭᠠᠷᠤᠭᠰᠠᠨ ᠠᠵᠢᠯᠯᠠᠬᠤ ᠪᠠᠷᠢᠭᠠᠳᠠ ᠶᠢᠨ ᠬᠢᠳᠡᠳ ᠨᠦᠬᠦᠷ᠂ ᠦᠪᠡᠷ ᠤᠨ ᠮᠤᠷᠢ ᠪᠠᠨ ᠠᠯᠠᠭᠤᠯᠤᠭᠰᠠᠨ ᠳᠤ ᠬᠠᠷᠠᠰᠬᠤ ᠪᠤᠯᠪᠠᠴᠦ ᠮᠤᠩᠭᠤᠯ ᠪᠠᠶᠢᠯᠳᠤᠭᠴᠢ ᠶᠢᠨ ᠡᠷᠡᠯᠭᠡᠭ ᠵᠤᠷᠢᠭ ᠲᠤ ᠱᠠᠭᠰᠢᠷᠠᠨ ᠬᠠᠨ᠎ᠠ ᠬᠠᠳᠠ ᠶᠢᠨ ᠭᠤᠤᠯ ᠢᠶᠠᠷ ᠵᠡᠬᠦᠨᠰᠢ ᠴᠤᠪᠤᠷᠠᠬᠤ ᠳᠠᠶᠢᠰᠤᠨ ᠤ ᠮᠠᠰᠢᠨ ᠢ ᠬᠤᠷᠤᠭᠤ ᠳᠠᠷᠤᠨ ᠵᠢᠷᠠᠨ ᠭᠤᠷᠪᠠ ᠪᠤᠯᠳᠠᠯ᠎ᠠ ᠳᠤᠭᠠᠯᠠᠪᠠ᠃ ᠳᠡᠭᠡᠭᠡᠳ ᠫᠢᠭ᠋ ᠳᠦᠬᠦᠷᠠᠩ ᠬᠦᠮᠦᠨ ᠪᠢᠰᠢ ᠪᠤᠯ ᠶᠡᠭᠡ ᠫᠤᠤ ᠠᠴᠢᠭᠰᠠᠨ ᠮᠠᠰᠢᠨ ᠨᠤᠭᠤᠳ ᠬᠠᠨ ᠬᠠᠶᠢᠷᠬᠠᠨ ᠤ ᠵᠦᠭ ᠳᠠᠪᠬᠢᠯᠳᠤᠨ ᠰᠢᠭᠤᠷᠭᠠᠨ ᠤ ᠳᠤᠮᠳᠠᠭᠤᠷ ᠵᠢᠯᠡᠶᠢᠪᠠ᠃ — ᠮᠠᠨ ᠤ ᠶᠡᠭᠡ ᠴᠡᠷᠢᠭ ᠵᠦᠭᠡᠷ ᠦᠦ︖ ᠭᠡᠰᠡᠨ ᠰᠠᠮᠪᠠ᠂ ᠶᠠᠭ ᠤᠳᠤ ᠪᠤᠯᠵᠦ ᠪᠠᠶᠢᠬᠤ ᠰᠢᠭ᠋ ᠰᠤᠴᠢᠰᠬᠢᠨ ᠦᠷᠪᠦᠯᠵᠡᠵᠦ ᠠᠰᠠᠭᠤᠪᠠ᠃ ᠳᠡᠭᠡᠬᠦ ᠳᠤ ᠬᠠᠨᠠᠭᠠᠷ ᠦᠨᠳᠤᠷ ᠬᠠᠨ ᠬᠠᠶᠢᠷᠬᠠᠨ ᠤ ᠤᠨᠢᠶᠠᠷᠳᠤᠬᠤ ᠠᠴᠠ ᠪᠠᠨ ᠤᠯᠠᠮ ᠳᠤᠳᠤᠷᠠᠬᠤ ᠨᠤᠶᠠᠨ ᠤᠷᠬᠢᠯ  ᠢ ᠬᠠᠷᠠᠵᠦ ᠬᠦᠯᠢᠷᠡᠭᠰᠡᠨ ᠳᠠᠮᠪᠢ᠂ ᠳᠡᠬᠦᠨ ᠤ ᠦᠭᠡᠳᠡ ᠠᠴᠠ᠄ ︽ᠵᠦᠭᠡᠷ ᠪᠠ ᠵᠡᠳᠭᠡᠷ ᠲᠠᠢ ᠨᠢ︾ ᠳᠡᠨᠳᠡ ᠪᠠᠨ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠠᠶᠢᠯ᠎ᠠ᠃ ᠭᠡᠪᠡᠴᠦ᠂ ᠮᠠᠨ ᠤ ᠫᠠᠷᠲ᠋ᠢᠽᠠᠨ ᠤ ᠬᠢᠨ ᠵᠡᠭᠡᠰᠦᠳᠠᠢ ᠶᠢᠨ ᠤᠷᠤᠢ ᠪᠠᠷ ᠳᠠᠮᠵᠢᠨ ᠳᠤᠭᠤᠭᠰᠢ ᠪᠠᠭᠤᠵᠦ ᠶᠠᠪᠤᠯ᠎ᠠ ᠭᠡᠵᠦ ᠦᠭᠡ ᠪᠠᠨ ᠦᠷᠬᠦᠯᠵᠢᠯᠡᠬᠦᠯᠵᠠᠢ᠃ — ᠮᠠᠨ ᠢ ᠳᠡᠶᠢᠰᠢ ᠨᠢ ᠠᠬᠢᠬᠤ ᠳᠤᠳᠤᠮ ᠰᠢᠭᠤᠷᠭᠠᠨ ᠨᠡᠮᠡᠭᠳᠡᠵᠦ ᠪᠠᠶᠢᠯ᠎ᠠ᠃ ᠤᠯᠠᠮ ᠵᠢᠭᠳᠡᠢ ᠬᠠᠴᠢᠨ ᠪᠤᠯᠵᠦ᠂ ᠳᠠᠶᠢᠰᠤᠨ ᠤ ᠦᠡᠭᠭᠡᠷᠡᠭᠰᠡᠨ ᠮᠦᠷ ᠲᠤ ᠠᠳᠤᠭᠤᠨ ᠰᠡᠭ ᠭᠡᠪᠳᠡᠵᠦ ᠪᠠᠶᠢᠪᠠ᠃ ᠮᠠᠨ ᠤ ᠶᠡᠭᠡ ᠴᠡᠷᠢᠭ ᠳᠠᠶᠢᠰᠤᠨ ᠤ ᠮᠡᠳᠡᠭᠡ ᠶᠢ ᠤᠯᠤᠭᠠᠳ ᠠᠷᠠᠳ ᠤᠨ ᠠᠳᠤᠭᠤ ᠨᠤᠭᠤᠳ ᠢ ᠪᠠᠷᠳᠠᠭ᠎ᠠ ᠪᠠᠷᠢᠭᠤᠯᠵᠦ ᠪᠠᠶᠢᠵᠠᠢ᠃ ᠶᠠᠭ ᠶᠡᠭᠡ ᠵᠠᠮ ᠤᠨ ᠳᠡᠷᠭᠡᠳᠡ ᠪᠠᠶᠢᠭᠰᠠᠨ ᠠᠳᠤᠭᠤᠨ ᠤ ᠬᠡᠳᠦᠨ ᠠᠵᠢᠷᠭ᠎ᠠ ᠠᠳᠤᠭᠤ ᠨᠢ᠂ ᠤᠯᠠᠨ ᠮᠠᠰᠢᠨ ᠤ ᠳᠠᠭᠤᠨ ᠢᠶᠠᠷ ᠦᠷᠬᠦᠵᠦ ᠠᠭᠤᠯᠠ ᠦᠭᠡᠳᠡ ᠬᠤᠮᠢᠷᠠᠯᠳᠤᠨ᠂ ᠤᠯᠠᠨ ᠲᠠᠢ ᠪᠠᠨ ᠨᠡᠶᠢᠯᠡᠵᠠᠢ᠃ ᠳᠡᠭᠡᠬᠦᠯᠠᠷ ᠰᠢᠭᠤᠷᠭᠠᠨ ᠳᠤᠮᠳᠠᠭᠤᠷ ᠠᠳᠡᠬᠦᠷᠡᠭᠰᠡᠨ ᠳᠠᠶᠢᠰᠤᠨ ᠪᠦᠰᠡᠯᠠᠨ ᠳᠦᠷᠢᠵᠦ ᠤᠷᠤᠵᠠᠢ᠃ ᠳᠡᠭᠡᠭᠡᠳ ᠵᠤᠵᠢᠭ ᠰᠢᠭ᠋ ᠢᠳᠡᠰᠢᠯᠡᠳᠡᠭ ᠬᠦᠭᠰᠢᠨ ᠬᠡᠬᠦᠦ ᠨᠦᠭᠦᠳ ᠤᠨ ᠵᠠᠷᠢᠮ ᠨᠢ ᠬᠢᠯᠢᠰ ᠠᠪᠳᠠᠭᠰᠠᠨ ᠨᠢ ᠳᠡᠷᠡ ᠪᠠᠶᠢᠵᠠᠢ᠃ ᠳᠡᠨᠳᠡ  ᠠᠴᠠ ᠴᠠᠭᠠᠰᠢ ᠨᠢ ᠶᠠᠪᠤᠬᠤ ᠳᠤ ᠵᠢᠪᠠᠷ ᠶᠡᠭᠡ᠂ ᠭᠡᠪᠡᠴᠦ ᠳᠠᠷᠢ ᠶᠢᠨ ᠬᠡᠨᠭᠰᠢᠬᠦᠦ ᠦᠨᠦᠷᠳᠡᠬᠦ‍ ᠰᠢᠭ ᠪᠤᠯᠤᠭᠠᠳ ᠪᠠᠶᠢᠪᠠ᠃ ᠬᠠᠷᠠᠩᠭᠤᠶᠢᠯᠠᠨ ᠪᠦᠷᠬᠦᠭᠳᠡᠵᠦ ᠰᠢᠭᠤᠷᠭᠠᠯᠠᠬᠤ ᠶᠢᠨ ᠵᠠᠭᠤᠷ᠎ᠠ ᠬᠠᠶᠠ ᠨᠢᠭᠡ ᠬᠡᠶᠢᠬᠦ ᠳᠤ ᠬᠠᠨ ᠬᠠᠶᠢᠷᠬᠠᠨ ᠤ ᠪᠠᠶᠢᠴᠠ ᠮᠡᠳᠡᠭᠳᠡᠨ ᠠᠰᠬ᠎ᠠ ᠬᠠᠳᠠ ᠨᠤᠷᠠᠬᠤ ᠰᠢᠭ᠋, ᠠᠶᠤᠮᠰᠢᠭᠳᠤ ᠠᠨᠢᠷ ᠦᠷᠬᠦᠯᠵᠢᠯᠠᠨ ᠬᠦᠯᠳᠡᠬᠦᠦ ᠬᠦᠷᠦᠰᠦ ᠶᠢ ᠳᠤᠩᠰᠤᠯᠭᠠᠬᠤ ᠳᠤᠤᠯᠢᠶᠠᠨ ᠳᠦᠷᠦᠬᠦᠴᠢ ᠶᠢᠨ ᠺᠠᠫᠢᠨ ᠳᠡᠭᠡᠷ᠎ᠡ ᠠᠴᠠ ᠫᠤᠤᠳᠠᠭᠰᠠᠨ ᠲᠠᠢ ᠠᠳᠠᠯᠢ ᠰᠤᠨᠤᠰᠳᠠᠵᠦ ᠪᠠᠶᠢᠪᠠ᠃ ᠡᠶᠢᠮᠤ ᠦᠶ᠎ᠠ ᠬᠦᠮᠦᠨ ᠤ ᠪᠠ ᠦᠪᠡᠷ ᠤᠨ ᠬᠢ ᠶᠢ ᠢᠯᠭᠠᠬᠤ ᠪᠠᠷᠢᠮᠳᠠ ᠦᠭᠡᠢ ᠪᠤᠯᠪᠠᠴᠦ ᠮᠠᠨ ᠤ ᠶᠡᠭᠡ ᠴᠡᠷᠢᠭ ᠲᠤ ᠮᠢᠨᠤᠮᠢᠶᠤᠲ ᠴᠦ ᠪᠠᠶᠢᠭᠠᠳᠤᠢ ᠴᠠᠭ ᠪᠤᠯᠬᠤᠷ ᠮᠠᠰᠢᠨ ᠤ ᠳᠡᠭᠡᠷ᠎ᠡ ᠭᠤᠵᠤᠯᠵᠠᠵᠦ ᠪᠠᠶᠢᠭᠰᠠᠨ ᠶᠡᠭᠡ ᠫᠤᠤ ᠨᠢ ᠰᠠᠭᠤᠷᠢᠨ  ᠳᠠᠭᠠᠨ ᠤᠡᠭᠬᠢᠯᠳᠠᠭᠤᠯᠤᠨ ᠨᠢᠷᠭᠡᠬᠦᠯᠵᠦ ᠪᠠᠶᠢᠬᠤ ᠨᠢ ᠦᠵᠡᠭᠳᠡᠬᠦ ᠮᠡᠳᠦ ᠡᠯᠳᠡᠪ ᠤᠨ ᠪᠤᠳᠤᠯ ᠳᠤ ᠬᠦᠷᠭᠡᠵᠦ ᠪᠢᠯᠡ᠃ ᠠᠶᠤᠯ ᠳᠦᠭᠰᠢᠬᠦᠷᠢ ᠳᠤᠬᠢᠶᠠᠯᠳᠤᠬᠤ ᠳᠤ ᠠᠨᠳᠠ ᠳᠠᠨᠢᠯ ᠢᠶᠠᠨ ᠪᠤᠳᠤᠨ᠎ᠠ ᠭᠡᠵᠦ ᠦᠨᠡᠨ ᠰᠢᠥ᠃ ᠤᠷᠵᠢᠳᠤᠷ ᠰᠦᠨᠢ ᠳᠤᠷᠰᠢᠭᠤᠯ ᠤᠨ ᠬᠡᠰᠡᠭ ᠢ ᠡᠷᠢᠵᠦ ᠤᠴᠢᠬᠤ ᠦᠶ᠎ᠠ ᠪᠠᠶᠠᠨ ᠭᠤᠤ ᠭᠡᠳᠡᠭ ᠳᠤᠰᠬᠤᠨ ᠤ ᠵᠠᠬ᠎ᠠ ᠳᠤ ᠮᠠᠨᠠᠭᠠᠴᠢᠨ ᠤ  ᠪᠠᠨ ᠤᠷᠤᠨ ᠳᠤ ᠵᠤᠭᠰᠤᠵᠦ ᠪᠠᠶᠢᠭᠰᠠᠨ ᠬᠤᠶᠠᠳᠤᠭᠠᠷ ᠰᠤᠮᠤᠨ ᠳᠠᠷᠤᠭ᠎ᠠ ᠶᠢ ᠬᠡᠨ ᠠᠴᠠ ᠴᠦ ᠡᠮᠤᠨ᠎ᠠ ᠪᠤᠳᠤᠵᠦ ᠭᠠᠷᠤᠯ᠎ᠠ ᠪᠢ᠃ ᠳᠡᠷᠡ ᠮᠢᠨᠢ ᠨᠠᠮᠠᠢᠢ ᠳᠠᠨᠢᠭᠠᠳ᠄ ︽ᠮᠠᠨᠠᠭᠠᠨ ᠤ ᠬᠦᠮᠦᠨ ᠢ ᠳᠦᠷ ᠪᠦᠯᠢᠶᠡᠰᠭᠡ ᠭᠡᠳ ᠤᠷᠤᠨ  ᠳᠤᠨᠢ ᠵᠤᠭᠰᠤᠭᠠᠳ ᠴᠢᠮᠠᠢᠢ ᠢᠷᠡᠬᠦ ᠪᠠᠷ ᠰᠤᠴᠢᠯ᠎ᠠ︾ ᠭᠡᠵᠦ ᠬᠡᠯᠡᠭᠡᠳ ᠨᠠᠳᠠ ᠲᠠᠢ ᠬᠠᠮᠳᠤ ᠤᠷᠤᠭᠰᠠᠨ ᠶᠤᠮ᠃ ᠳᠡᠭᠡᠭᠡᠳ ᠬᠤᠪᠴᠠᠰᠦᠨ ᠳᠠᠭᠠᠨ ᠨᠠᠭᠠᠯᠳᠤᠭᠰᠠᠨ ᠴᠠᠰᠦ ᠶᠢ ᠭᠦᠪᠢᠬᠦ ᠳᠡᠭᠡᠨ ᠭᠤᠵᠤᠯᠢᠭ ᠳᠤᠭᠤᠷᠢᠭ ᠳᠦᠪᠯᠡᠬᠦᠨ ᠴᠢᠷᠠᠢ ᠪᠠᠨ ᠪᠠᠷᠤᠶᠢᠯᠭᠠᠨ ᠰᠢᠩᠭᠡᠨ ᠬᠠᠷ᠎ᠠ ᠬᠦᠮᠦᠰᠭᠡ ᠪᠠᠨ ᠵᠠᠩᠬᠢᠳᠤᠨ᠂ ᠮᠠᠯᠠᠭᠠᠢ ᠶᠢᠨ ᠰᠤᠷ ᠲᠤ ᠪᠠ ᠬᠦᠮᠦᠰᠭᠡ  ᠳᠡᠭᠡᠨ ᠪᠠᠷᠢᠯᠳᠤᠭᠰᠠᠨ ᠴᠠᠩ ᠢ ᠡᠪᠦᠭᠡᠨ ᠬᠦᠮᠦᠨ ᠤ ᠰᠠᠬᠠᠯ ᠤᠨ ᠮᠦᠰᠦ ᠶᠢ ᠡᠮᠵᠡᠭᠯᠡᠨ ᠠᠷᠢᠯᠭᠠᠳᠠᠭ ᠰᠢᠭ᠋ ᠰᠡᠮᠭᠡᠨ  ᠢᠶᠠᠷ ᠬᠦᠨᠳᠡᠵᠦ ᠪᠠᠶᠢᠭᠠᠳ ᠮᠢᠨᠤ ᠶᠠᠷᠢᠭᠰᠠᠨ ᠢ ᠪᠠᠰᠤᠮᠵᠢᠯᠠᠵᠦ ᠪᠢᠯᠡ᠃ ᠮᠢᠨᠤ ᠦᠭᠡᠳᠡ ᠠᠴᠠ ᠡᠷᠢᠶᠠᠯᠠᠯ ᠦᠭᠡᠢ ᠬᠡᠯᠡᠭᠰᠡᠨ ᠪᠤᠶᠤ ᠡᠰᠡᠬᠦᠯ᠎ᠠ ᠶᠡᠭᠡ ᠴᠡᠷᠢᠭ ᠤᠨ ᠳᠤᠷᠰᠢᠭᠤᠯ ᠤᠨ ᠬᠡᠰᠡᠭ ᠢ ᠬᠠᠷᠢᠭᠤᠴᠠᠭᠰᠠᠨ ᠳᠠᠭᠠᠨ ᠦᠦ︖ ᠪᠤᠤ ᠮᠡᠳᠡ᠂ ᠳᠡᠭᠡᠭᠡᠳ᠄ ︽ᠰᠢᠯᠤᠭᠤᠨ ᠴᠠᠭᠠᠨ ᠬᠤᠰᠢᠭᠤᠨ ᠤ ᠠᠯᠳᠠᠡᠭᠠᠳᠠᠰᠤ ᠨᠠᠭᠤᠷ ᠠᠴᠠ᠂ ᠡᠨᠡ ᠵᠤᠨ ᠴᠠᠭᠠᠨ ᠳᠠᠪᠤᠰᠤ ᠳᠡᠭᠡᠷᠡᠮᠳᠡᠭᠰᠡᠨ ᠳᠡᠳᠡ ᠬᠠᠭᠤᠴᠢᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠬᠤ ᠭᠡᠵᠦ ᠪᠠᠶᠢᠯᠬᠦᠢ᠃ ᠪᠢ ᠪᠤᠯ ᠬᠦᠬᠡᠬᠤᠳᠠ ᠳ᠋ᠠᠠᠲ᠋ᠦ᠋ᠡᠭ ᠤᠨ ᠬᠠᠷ᠎ᠠ ᠭᠡᠷ ᠤᠳ ᠲᠤ ᠪᠠᠶᠢᠬᠤ ᠳᠠᠭᠠᠨ ᠦᠯᠵᠠᠢ ᠲᠠᠢ ᠡᠳᠦᠷ ᠶᠤᠯᠪᠤᠡᠭ ᠬᠤᠭᠤᠯᠠᠨ ᠤ ᠤᠬᠢᠶᠠᠳᠠᠰᠤ ᠬᠠᠷᠠᠵᠦ᠂ ᠢᠷᠸ᠎ᠠ ᠶᠢᠨ ᠮᠠᠭᠤ ᠡᠳᠦᠷ ᠲᠡᠭᠡᠨ ᠴᠠᠬᠢᠯᠭᠠᠨ ᠰᠢᠷᠡᠭᠡ ᠵᠠᠶᠢᠳᠠᠯᠠᠵᠦ ᠪᠠᠶᠢᠭᠰᠠᠨ ᠬᠦᠮᠦᠨ ᠪᠤᠯᠬᠤᠷ ᠪᠦᠷ ᠮᠡᠳᠡᠨ᠎ᠡ᠃ ᠤᠳᠤ ᠮᠠᠨ ᠤ ᠨᠠᠢᠮᠠᠨ ᠵᠠᠮ ᠤᠨ ᠴᠡᠷᠢᠭ ᠤᠳ ᠪᠡᠭᠡᠵᠢᠩ ᠪᠠ ᠪᠤᠭᠤᠳᠤ ᠶᠢᠨ ᠳᠡᠮᠤᠷ ᠵᠠᠮ ᠤᠳ ᠢ ᠭᠡᠷᠴᠢᠯ᠎ᠠ ᠭᠡᠰᠡᠨ᠃ ᠳᠡᠭᠡᠪᠠᠯ ᠳ᠋ᠠᠲ᠋ᠦ᠋ᠡᠭ ᠤᠨ ᠾᠸᠥ ᠴᠢᠤᠸᠠᠨ ᠤ ᠨᠡᠬᠦᠷᠠᠰᠤ ᠬᠤᠮᠰᠠᠳᠠᠬᠤ ᠨᠢ ᠯᠠᠪᠳᠠᠢ᠃ ᠨᠤᠭᠤᠭ᠎ᠠ ᠴᠠᠭ᠎ᠠ ᠳᠠᠷᠤᠬᠤ ᠳᠠᠪᠤᠰᠤ ᠪᠠᠨ ᠤᠯᠤᠭᠰᠠᠨ ᠳᠡᠳᠡ ᠬᠦᠷᠵᠠᠩ ᠳᠠᠭ ᠳᠡᠭᠡᠷᠡᠮᠳᠡᠬᠦ ᠪᠠᠷ ᠢᠷᠡᠨ᠎ᠡ ᠪᠠᠶᠢᠨ᠎ᠠ ᠰᠢᠥ᠃ ᠴᠠᠬᠠᠷ ᠨᠤᠳᠤᠭ ᠲᠤ ᠭᠤᠮᠢᠨᠳᠠᠩ ᠤᠨ ᠮᠠᠰᠢᠨ ᠲᠠᠢ ᠳᠡᠭᠡᠷᠡᠮ ᠲᠠᠢ ᠪᠠᠶᠢᠯᠳᠤᠵᠦ ᠪᠠᠶᠢᠭᠠᠳ ᠳᠠᠮᠢᠷ ᠢ ᠨᠢ ᠮᠡᠳᠡᠭᠰᠡᠨ᠃ ᠠᠵᠠᠳ ᠪᠤᠯᠭᠠᠵᠦ ᠪᠠᠶᠢᠭᠠᠳ ᠤᠤᠯᠭᠠᠯᠠᠨ ᠳᠤᠪᠳᠤᠯᠳᠠᠭ ᠵᠤᠷᠰᠢᠯ  ᠢ ᠨᠢ ᠡᠵᠡᠮᠰᠢᠭᠰᠡᠨ᠃ ᠶᠠᠭᠤᠨ ᠳᠤᠨᠢ ᠰᠦᠷᠳᠡᠬᠦ ᠪᠤᠢ︖︾ ᠭᠡᠰᠡᠨ ᠶᠤᠮ ᠰᠠᠨ᠃ ᠳᠡᠷᠡ ᠵᠤᠨ ᠨᠢ ᠮᠠᠨ ᠤ ᠫᠠᠷᠲ᠋ᠢᠽᠠᠨ ᠶᠡᠭᠡ ᠴᠡᠷᠢᠭ ᠤᠨ ᠬᠠᠮᠳᠤ ᠦᠭᠡᠷᠴᠢᠨ ᠤᠪᠤᠭ᠎ᠠ ᠪᠠᠷ ᠰᠠᠭᠤᠷᠢᠯᠠᠨ ᠭᠤᠮᠢᠨᠳᠠᠩ ᠲᠠᠢ ᠪᠠᠶᠢᠯᠳᠤᠬᠤ ᠳᠤ ᠰᠠᠷᠬᠢ ᠶᠢᠨ ᠭᠤᠤ ᠭᠡᠳᠡᠭ ᠭᠠᠵᠠᠷ ᠴᠠᠭ ᠲᠠᠭᠠᠨ ᠪᠠᠭᠤᠳᠠᠯᠯᠠᠵᠦ ᠶᠠᠪᠤᠭᠰᠠᠨ ᠶᠤᠮ᠃ ᠳᠡᠨᠳᠡ ᠬᠤᠰᠤᠨ ᠤ ᠦᠯᠵᠢᠷᠡᠭᠰᠡᠨ ᠳᠡᠷᠡᠰᠦ ᠲᠠᠢ ᠳᠠᠭᠰᠢᠷᠠᠨ ᠢᠯᠵᠡᠷᠡᠭᠰᠡᠨ ᠦᠮᠡᠭᠡᠢ ᠯᠠᠭ ᠢ ᠭᠠᠷ ᠢᠶᠠᠷ ᠢᠶᠠᠨ ᠮᠠᠯᠳᠠᠵᠦ᠂ ᠪᠤᠳᠠᠬᠢᠶᠠᠷᠠᠭᠰᠠᠨ ᠤᠰᠤᠨ ᠳᠤ ᠮᠠᠩᠬᠢᠷ ᠬᠤᠯᠢᠭᠰᠠᠨ ᠬᠤᠨᠤᠭ ᠪᠤᠳᠠᠭ᠎ᠠ ᠴᠢᠨᠠᠵᠦ ᠦᠯᠯᠠᠨ ᠶᠠᠪᠤᠬᠤ ᠳᠠᠭᠠᠨ ᠳᠤᠳᠤᠨᠤ  ᠪᠠᠷ ᠳᠠᠨᠢᠯᠴᠠᠭᠰᠠᠨ ᠶᠤᠮᠰᠠᠨ᠃ ᠳᠡᠷᠡ ᠮᠢᠨᠢ ᠬᠤᠨᠭ᠍ᠬᠢᠯᠳᠤᠭ ᠱᠠᠬᠠᠢ ᠪᠠᠨ ᠬᠤᠯᠬᠢᠬᠤ ᠪᠠᠷ ᠰᠠᠭᠠᠯᠳᠤᠷᠭᠠᠯᠠᠨ ᠤᠶᠠᠭᠠᠳ ᠬᠤᠸᠠ ᠮᠤᠷᠢ ᠪᠠᠨ ᠢᠨᠴᠠᠭᠠᠬᠤ ᠪᠠᠷ ᠨᠠᠮᠠᠢᠢ ᠭᠤᠮᠢᠨᠳᠠᠩ ᠠᠴᠠ ᠠᠪᠴᠢᠷᠠᠭᠰᠠᠨ ᠮᠠᠯ ᠶᠤᠮ ᠭᠡᠳ ᠦᠪᠡᠷ ᠤᠨ ᠮᠠᠦ᠋ᠽᠸᠧᠷ ᠢᠶᠠᠨ ᠵᠦᠯᠬᠦᠬᠦ ᠳᠤ ᠭᠤᠮᠢᠨᠳᠠᠩ ᠠᠴᠠ ᠮᠤᠰᠬᠢᠭᠰᠠᠨ ᠭᠡᠵᠦ ᠬᠡᠯᠡᠭᠡᠳ ᠦᠪᠡᠷ ᠤᠨ ᠰᠢᠯᠵᠠᠷᠬᠠᠢ ᠡᠪᠴᠢᠬᠦᠦ ᠪᠠᠨ ᠭᠤᠮᠢᠨᠳᠠᠩ ᠢᠶᠠᠷ ᠡᠷᠡᠬᠦᠳᠡᠬᠦᠯᠬᠦ ᠳᠤ ᠰᠤᠷᠪᠢ ᠳᠤᠭᠳᠠᠭᠰᠠᠨ ᠶᠤᠮ ᠭᠡᠵᠦ ᠬᠤᠷᠤᠰᠳᠠᠭ ᠪᠠᠶᠢᠯ᠎ᠠ᠃ ᠳᠡᠭᠡᠭᠡᠳ ᠶᠤᠮ ᠦᠦ︖ ᠡᠰᠡᠬᠦᠯ᠎ᠠ ᠪᠠᠶᠠᠨ ᠭᠤᠤ ᠳᠤ ᠠᠭᠤᠯᠵᠠᠯᠳᠤᠭᠠᠳ ᠬᠠᠮᠳᠤ ᠮᠤᠷᠳᠠᠭᠰᠠᠨ ᠠᠴᠠ ᠶᠤᠮ ᠦᠦ︖ ᠮᠢᠨᠤ ᠨᠢᠳᠤᠨ ᠳᠤ ᠢᠯᠡ ᠪᠤᠯᠤᠭᠠᠳ ᠪᠠᠶᠢᠭᠰᠠᠨ ᠢ ᠶᠠᠭᠤ ᠬᠡᠯᠡᠬᠦ ᠪᠤᠢ ᠁ — ᠳᠡᠷᠡ ᠯᠦᠭᠯᠡᠶᠢᠵᠦ ᠬᠠᠷᠠᠭᠳᠠᠵᠦ ᠪᠠᠶᠢᠭ᠎ᠠ ᠬᠠᠨ ᠬᠠᠶᠢᠷᠬᠠᠨ ᠪᠤᠯ ᠬᠠᠳᠠᠨ ᠵᠤᠷᠢᠭᠳᠤ ᠪᠠᠭᠠᠳᠤᠷ ᠤᠨ ᠮᠢᠨᠢ ᠬᠤᠪᠢᠯᠭᠠᠨ ᠮᠥᠨ᠃ ᠬᠠᠨᠠᠭᠠᠷ ᠦᠨᠳᠤᠷ ᠳᠠᠷᠬᠠᠨ ᠤᠷᠬᠢᠯ ᠳᠤᠨᠢ ᠬᠠᠷᠬᠢᠰ ᠭᠤᠮᠢᠨᠳᠠᠩ ᠬᠠᠯᠳᠠᠵᠦ ᠴᠢᠳᠠᠭᠠᠳᠤᠢ ᠪᠠᠶᠢᠵᠦ ᠪᠢᠯᠡ᠃ ᠳᠡᠬᠦᠨ ᠤ ᠠᠷᠢᠭᠤᠨ ᠤᠷᠬᠢᠯ ᠨᠢ ᠠᠯᠤᠰ ᠤᠨ ᠠᠪᠠᠭ᠎ᠠ ᠶᠢᠨ ᠰᠢᠯᠢ ᠶᠢ ᠦᠡᠭᠭᠡᠶᠢᠨ ᠰᠢᠷᠳᠡᠳᠡᠭ᠃ ᠠᠰᠬ᠎ᠠ ᠪᠠᠷᠳᠠᠭ᠎ᠠ ᠪᠠᠷ ᠢᠶᠠᠨ ᠠᠷᠠᠳ ᠳᠦᠮᠡᠨ ᠢᠶᠠᠨ ᠳᠠᠶᠢᠰᠤᠨ ᠠᠴᠠ ᠬᠠᠮᠠᠭᠠᠯᠠᠬᠤ ᠪᠤᠭᠤᠮᠳᠠ ᠪᠤᠯᠵᠦ ᠠᠤᠭ᠎ᠠ ᠰᠦᠷᠯᠢᠭ ᠢᠶᠠᠷ ᠢᠶᠠᠨ ᠠᠳᠠᠭᠠᠳᠠᠨ ᠭᠤᠮᠢᠨᠳᠠᠩ ᠢ ᠬᠠᠰᠢᠵᠦ ᠪᠠᠶᠢᠭᠰᠠᠨ᠃ ᠳᠡᠷᠡ ᠤᠳᠤ ᠪᠢᠳᠡᠨ ᠤ ᠦᠭᠡᠳᠡ ᠠᠴᠠ ᠬᠠᠯᠠᠶᠢᠨ ᠬᠠᠷᠠᠵᠦ ᠪᠠᠶᠢᠨ᠎ᠠ︕ ᠬᠠᠷᠠᠩᠭᠤᠢ ᠰᠢᠭᠤᠷᠭᠠᠨ ᠳᠤᠮᠳᠠᠭᠤᠷ ᠡᠭᠡ ᠤᠷᠤᠨ ᠢᠶᠠᠨ ᠪᠠᠳᠤᠯᠠᠨ ᠡᠷᠭᠡ ᠴᠢᠯᠦᠭᠡ  ᠪᠠᠨ ᠤᠯᠬᠤ ᠪᠠᠷ ᠳᠡᠮᠡᠴᠡᠵᠦ ᠪᠠᠶᠢᠭᠰᠠᠨ ᠨᠠᠳᠠ ᠬᠠᠨ ᠬᠠᠶᠢᠷᠬᠠᠨ ᠮᠢᠨᠢ ᠪᠠᠶᠢᠭᠠᠯᠢ ᠶᠢᠨ ᠪᠠᠬᠢᠯᠠᠯᠳᠠ ᠰᠢᠭ ᠴᠦ ᠤᠮᠤᠭᠰᠢᠭᠤᠯᠵᠦ ᠪᠠᠶᠢᠭᠰᠠᠨ ᠳ᠋ᠠ᠃ ᠤᠳᠤ ᠴᠦ ᠬᠡᠰᠡᠨ ᠳᠠᠪᠬᠤᠷ ᠤᠳᠬ᠎ᠠ ᠪᠦᠷᠢᠯᠳᠦᠭᠡᠳ ᠮᠢᠨᠤ ᠶᠠᠷᠢᠬᠤ ᠬᠡᠰᠡᠨ ᠦᠯᠢᠭᠡᠷ ᠤᠨ ᠤᠬᠢ ᠪᠤᠯᠤᠭᠠᠳ ᠪᠠᠶᠢᠭ᠎ᠠ ᠨᠢ ᠡᠨᠡ︕ — ᠲᠠᠨ ᠤ ᠶᠠᠷᠢᠬᠤ ᠦᠯᠢᠭᠡᠷ ᠢ ᠰᠤᠨᠤᠰᠴᠦ ᠶᠠᠪᠤᠭᠠᠳ ᠡᠴᠢᠨᠠᠨ ᠭᠠᠵᠠᠷ ᠠᠭᠤᠳᠠᠯᠠᠭᠰᠠᠨ ᠢᠶᠠᠨ ᠴᠦ ᠮᠡᠳᠡᠭᠰᠡᠨ ᠦᠭᠡᠢ ᠦᠡᠭᠭᠡᠷᠡᠯ᠎ᠡ᠃ ᠳᠠᠮᠪᠢ ᠭᠤᠸᠠᠢ ᠴᠠᠭᠠᠰᠢ ᠨᠢ ᠶᠠᠷᠢᠭᠠᠷᠠᠢ᠃ — ᠬᠠᠨ ᠬᠠᠶᠢᠷᠬᠠᠨ ᠤ ᠬᠠᠪᠴᠢᠯ ᠤᠳ ᠲᠤ ᠪᠠᠶᠢᠭᠰᠠᠨ ᠮᠠᠨ ᠤ ᠶᠡᠭᠡ ᠴᠡᠷᠢᠭ ᠳᠤᠷᠰᠢᠭᠤᠯ ᠤᠨ ᠬᠡᠰᠡᠭ ᠤᠨ ᠮᠡᠳᠡᠭᠡ ᠪᠠᠷ ᠪᠡᠯᠡᠳᠭᠡᠯ ᠲᠠᠢ ᠪᠠᠶᠢᠵᠦ᠂ ᠳᠡᠷᠡ ᠬᠠᠪᠢ ᠶᠢᠨ ᠠᠳᠤᠭᠤ ᠨᠤᠭᠤᠳ ᠢ ᠪᠡᠷᠭᠡ ᠪᠠᠷᠳᠠᠭᠠᠨ ᠳᠤ ᠰᠢᠯᠵᠢᠬᠦᠯᠦᠭᠰᠡᠨ ᠪᠠᠶᠢᠵᠠᠢ᠃ ᠬᠠᠨ ᠬᠠᠶᠢᠷᠬᠠᠨ ᠢ ᠪᠤᠯᠳᠤ ᠳᠤᠨᠢ ᠪᠦᠰᠡᠯᠠᠨ ᠳᠤᠪᠳᠤᠯᠤᠭᠰᠠᠨ ᠳᠠᠶᠢᠰᠤᠨ ᠤ ᠴᠢᠮᠡᠭᠡ ᠪᠠᠷ ᠵᠢᠡᠡᠰᠠᠭᠠᠯ ᠳᠤ ᠤᠷᠤᠵᠠᠢ ᠃ ᠦᠨᠡᠨ ᠳᠡᠭᠡᠨ ᠨᠢᠭᠡᠯᠭᠡᠨ ᠬᠤᠷᠢᠶ᠎ᠠ ᠴᠡᠷᠢᠭ ᠪᠠᠶᠢᠭᠰᠠᠨ ᠪᠤᠯᠪᠠᠴᠦ ᠰᠢᠭᠤᠷᠭᠠᠨ ᠤ ᠳᠤᠮᠳᠠᠭᠤᠷ ᠵᠢᠱᠢᠵᠦ ᠭᠠᠷᠤᠭᠰᠠᠨ ᠦᠭᠡᠢ ᠪᠠᠷ ᠮᠤᠩᠬᠠᠷᠠᠭᠰᠠᠨ ᠭᠤᠮᠢᠨᠳᠠᠩ ᠳᠡᠭᠡᠷᠡᠮ ᠭᠠᠭᠴᠠ ᠬᠦ ᠤᠯᠠᠨ ᠮᠤᠷᠢᠳ ᠤᠨ ᠴᠠᠷᠬᠢ ᠪᠠᠷ ᠳᠦᠷᠢᠮᠭᠡᠶᠢᠯᠠᠨ ᠳᠠᠪᠰᠢᠵᠦ ᠮᠠᠨ ᠤ ᠴᠡᠷᠢᠭ ᠤᠨ ᠪᠠᠶᠢᠭᠰᠠᠨ ᠠᠶᠢᠯ ᠠᠴᠠ ᠰᠤᠷᠠᠭᠯᠠᠵᠠᠢ᠃ ᠳᠡᠭᠡᠬᠦ ᠳᠤ ᠮᠠᠨᠠᠶᠢᠬᠢᠨ ᠠᠷᠠᠳ᠄ ︽ᠠ ᠮᠡᠳᠡᠬᠦ ᠦᠭᠡᠢ᠂ ᠭᠠᠭᠴᠠ ᠮᠠᠨ ᠤ ᠬᠤᠳᠠᠨ ᠤ ᠨᠢᠭᠡ ᠬᠤᠷᠢᠶ᠎ᠠ ᠴᠡᠷᠢᠭ ᠪᠠᠶᠢᠭᠰᠠᠨ ᠪᠠᠶᠢᠯ᠎ᠠ︾ ᠭᠡᠬᠦᠴᠢᠯᠠᠨ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠬᠡᠯᠡᠳᠡᠭ ᠠᠵᠢ᠃ ᠤᠯᠠᠨ ᠮᠤᠷᠢᠨ ᠤ ᠴᠡᠷᠬᠢ ᠪᠠᠷ ᠡᠵᠡᠷᠭᠡᠭᠯᠠᠨ ᠳᠠᠪᠰᠢᠬᠤ ᠳᠠᠶᠢᠰᠤᠨ ᠮᠠᠰᠢᠨ ᠢᠶᠠᠨ ᠤᠡᠭᠬᠢᠯᠳᠤᠭᠤᠯᠬᠤ ᠦᠭᠡᠢ ᠪᠤᠯᠪᠠᠯ ᠡᠷᠬᠢ ᠭᠠᠨᠭ᠍ᠭ᠎ᠠ ᠳᠤ ᠮᠤᠬᠤᠷᠳᠠᠨ ᠶᠠᠪᠠᠭᠠᠨ ᠴᠡᠷᠢᠭ ᠢᠶᠠᠨ ᠠᠰᠬᠠᠵᠦ ᠭᠠᠷᠴᠠᠢ᠃ ᠳᠡᠭᠡᠭᠡᠳ ᠴᠢᠨᠤ ᠰᠠᠶ᠋ᠢᠬᠠᠨ ᠠᠰᠠᠭᠤᠭᠰᠠᠨ ︽ᠵᠦᠭᠡᠷ ᠦᠦ︖︾ ᠭᠡᠳᠡᠭ ᠰᠢᠷᠭᠠᠭᠤ ᠳᠤᠯᠤᠯᠳᠤᠭᠠᠨ ᠪᠤᠯᠤᠭᠰᠠᠨ ᠶᠤᠮ᠃ ᠳᠠᠶᠢᠰᠤᠨ ᠤ ᠶᠠᠪᠠᠭᠠᠨ ᠴᠡᠷᠢᠭ ᠲᠡᠭᠡᠨ ᠵᠠᠮ ᠨᠡᠭᠡᠭᠡᠬᠦ ᠬᠡᠰᠡᠨ ᠶᠡᠭᠡ ᠫᠤᠤ ᠶᠢᠨ ᠰᠤᠮᠤ ᠠᠭᠤᠯᠠ ᠦᠭᠡᠳᠡ ᠰᠦᠷᠬᠢᠷᠡᠬᠦ  ᠳᠤ᠂ ᠳᠠᠶᠢᠰᠤᠨ ᠤ ᠳᠠᠪᠰᠢᠯᠳᠠ ᠶᠢ ᠡᠰᠡᠷᠬᠦᠴᠡᠬᠦ ᠮᠠᠨ ᠤ ᠶᠡᠭᠡ ᠴᠡᠷᠢᠭ ᠤᠨ ᠭᠷᠠᠨᠠᠲ ᠤᠨ ᠳᠡᠯᠪᠡᠷᠡᠯᠳᠡ᠂ ᠠᠯᠠᠨ ᠪᠠᠶᠢᠯᠳᠤᠬᠤ ᠬᠤᠶᠠᠷ ᠡᠳᠡᠭᠡᠳ ᠤᠨ ᠱᠤᠤᠬᠢᠶᠠᠨ ᠨᠡᠶᠢᠯᠡᠯᠳᠦᠭᠡᠳ ᠳᠦᠮᠠᠨ ᠠᠳᠤᠭᠤᠨ ᠤ ᠳᠦᠪᠡᠷᠭᠡᠨ ᠪᠤᠶᠤ ᠬᠠᠭᠤᠷᠠᠢ ᠦᠶᠡᠷ ᠤᠨ ᠦᠵᠦᠭᠦᠷ ᠰᠢᠭ ᠳᠦᠰᠦᠷ ᠤᠨ ᠭᠠᠵᠠᠷ ᠨᠠᠯᠠᠵᠦ ᠪᠠᠶᠢᠵᠠᠢ᠃ ᠦᠨᠳᠤᠷ ᠠᠭᠤᠯᠠ ᠶᠢᠨ ᠤᠷᠤᠢ ᠠᠴᠠ ᠬᠦᠨ ᠵᠠᠪᠠ ᠤᠷᠤᠭᠤ ᠪᠦᠮᠪᠦᠷᠢᠬᠦᠯᠦᠭᠰᠡᠨ ᠦᠭᠡᠷ ᠴᠢᠯᠠᠭᠤᠨ ᠤ ᠳᠤᠶᠢᠯᠠᠯᠳᠠ᠂ ᠠᠰᠬ᠎ᠠ ᠬᠠᠳᠠ ᠶᠢ ᠳᠠᠭᠠᠷᠢᠯᠠᠨ ᠬᠦᠴᠦᠨ ᠨᠡᠮᠡᠭᠳᠡᠭᠡᠳ ᠠᠶᠤᠩᠭᠠᠨ ᠳᠤ ᠬᠠᠳᠠ ᠨᠤᠷᠠᠬᠤ ᠮᠡᠳᠦ ᠠᠶᠤᠮᠰᠢᠭᠳᠠᠢ ᠨᠢᠷᠴᠢᠬᠢᠨᠠᠨ ᠠᠭᠠᠷ ᠢ ᠬᠤᠶᠢᠯᠠᠷᠠᠭᠤᠯᠤᠨ ᠰᠢᠪᠳᠤᠷᠬᠤ ᠶᠢᠨ ᠰᠠᠴᠠᠭᠤ ᠠᠭᠤᠯᠠ ᠠᠪᠠᠷᠢᠬᠤ ᠳᠠᠶᠢᠰᠤᠨ ᠳᠤ ᠨᠢᠭᠡ ᠳᠠᠯ᠎ᠠ ᠶᠢᠨ ᠳᠠᠶᠢᠰᠤᠨ ᠪᠤᠯᠵᠠᠢ᠃ ᠢᠯᠠᠩᠭᠤᠶ᠎ᠠ ᠳᠡᠰᠬᠢᠮ᠎ᠠ ᠬᠦᠢᠳᠡᠨ ᠨᠢ ᠳᠠᠯ᠎ᠠ ᠭᠠᠵᠠᠷ ᠦᠰᠴᠦ ᠳᠤᠳᠤᠭᠠᠳᠤ ᠶᠢᠨ ᠳᠠᠶᠢᠨ ᠳᠤ ᠤᠯᠠᠮ ᠦᠯᠴᠢᠷᠰᠢᠭᠰᠡᠨ ᠮᠠᠨ ᠤ ᠬᠢᠨ ᠳᠤ ᠵᠢᠷ ᠤᠨ ᠬᠡᠷᠡᠭ ᠪᠤᠯᠪᠠᠴᠦ ᠬᠦᠶᠦᠮᠠᠯ ᠠᠪᠰᠠᠨ ᠳᠠᠭᠠᠨ ᠳᠡᠭᠡᠭᠡᠭᠳᠡᠵᠦ ᠦᠬᠦᠯ ᠢᠶᠠᠨ ᠡᠷᠢᠵᠦ ᠢᠷᠡᠭᠰᠡᠨ ᠭᠤᠮᠢᠨᠳᠠᠩ ᠳᠡᠭᠡᠷᠡᠮ ᠳᠤ ᠯᠠ ᠳᠡᠭᠷᠢ ᠶᠢᠨ ᠬᠢᠯᠢᠩ ᠮᠡᠳᠦ ᠠᠵᠢ᠃ ᠮᠠᠨ ᠤ ᠶᠡᠭᠡ ᠴᠡᠷᠢᠭ ᠪᠤᠯ ᠦᠪᠡᠷ ᠠᠴᠠ ᠪᠠᠨ ᠬᠡᠳᠦᠨ ᠬᠤᠪᠢ ᠠᠬᠠᠳᠠᠬᠤ ᠬᠦᠴᠦᠷᠭᠡᠭ ᠳᠠᠶᠢᠰᠤᠨ ᠲᠠᠢ ᠪᠠᠶᠢᠯᠳᠤᠭᠰᠠᠨ ᠨᠢ ᠭᠠᠷᠴᠠᠭ᠎ᠠ ᠦᠭᠡᠢ ᠪᠤᠯᠪᠠᠴᠦ ᠭᠠᠵᠠᠷ ᠤᠨ ᠪᠠᠶᠢᠴᠠ ᠶᠢ ᠠᠰᠢᠭᠯᠠᠨ ᠬᠠᠨ ᠬᠠᠶᠢᠷᠬᠠᠨ ᠢᠶᠠᠷ ᠦᠮᠦᠭ ᠪᠤᠯᠭᠠᠨ ᠴᠢᠳᠠᠭᠰᠠᠨ ᠪᠤᠯᠬᠤᠷ ᠳᠠᠶᠢᠰᠤᠨ ᠤ ᠳᠠᠪᠰᠢᠯᠳᠠ ᠶᠢ ᠨᠢᠴᠤᠭᠠᠨ ᠪᠠᠶᠢᠵᠠᠢ᠃ ᠭᠡᠳᠡᠯ᠎ᠡ ᠵᠢᠷᠠᠨ ᠭᠤᠷᠪᠠᠨ ᠮᠠᠰᠢᠨ ᠳᠤ ᠠᠴᠢᠭᠳᠠᠵᠦ ᠢᠷᠡᠭᠰᠡᠨ ᠭᠤᠮᠢᠨᠳᠠᠩ ᠤᠨ ᠳᠠᠶᠢᠰᠤᠨ ᠬᠤᠶᠠᠷ ᠮᠢᠩᠭᠠᠭᠠᠳ ᠬᠦᠮᠦᠨ ᠤ ᠳᠤᠭᠠᠨ ᠳᠠᠭᠠᠨ ᠡᠷᠳᠦᠵᠦ᠂ ᠵᠡᠪᠰᠡᠭ ᠤᠨ ᠬᠤᠷᠴᠠ  ᠳᠠᠭᠠᠨ ᠪᠠᠯᠮᠠᠳ ᠳᠠᠭᠠᠷᠢᠯᠳᠠ ᠵᠤᠬᠢᠶᠠᠵᠦ ᠪᠠᠶᠢᠵᠠᠢ᠃ ᠳᠡᠭᠡᠬᠦ ᠳᠤ ᠮᠠᠨ ᠤ ᠶᠡᠭᠡ ᠴᠡᠷᠢᠭ ᠤᠨ ᠬᠤᠷᠢᠶ᠎ᠠ ᠶᠠᠮᠤᠨ ᠤ ᠡᠳᠡᠭᠡᠳ ᠨᠢ ᠠᠨᠠᠩ ᠭᠡᠳᠡᠭ ᠬᠠᠪᠴᠢᠯ ᠳᠤ ᠳᠠᠶᠢᠰᠤᠨ  ᠤ ᠺᠤᠮᠠᠨᠳᠠ ᠪᠠᠶᠢᠬᠤ ᠶᠢ ᠰᠠᠭᠤᠳᠠᠯ ᠤᠨ ᠵᠢᠵᠢᠭ ᠮᠠᠰᠢᠨ ᠢᠶᠠᠷ ᠤᠯᠵᠦ ᠮᠡᠳᠡᠵᠠᠢ᠃ ᠳᠡᠭᠡᠭᠡᠳ ᠺᠤᠮᠠᠨᠳᠠ ᠶᠢ ᠰᠤᠯᠠᠷᠠᠭᠤᠯᠬᠤ ᠶᠠᠪᠤᠳᠠᠯ ᠢ ᠳᠡᠬᠦᠨ ᠤ ᠤᠶᠢᠷᠠᠯᠴᠠᠭ᠎ᠠ ᠪᠠᠶᠢᠬᠤ ᠬᠠᠶᠢᠭᠤᠯ ᠤᠨ ᠡᠬᠦᠷᠭᠡ ᠬᠦᠢᠴᠡᠳᠭᠡᠬᠦ ᠬᠤᠶᠠᠳᠤᠭᠠᠷ ᠰᠤᠮᠤᠨ ᠳᠠᠷᠤᠭ᠎ᠠ ᠳᠤ ᠳᠤᠰᠢᠶᠠᠭᠰᠠᠨ ᠠᠵᠢ᠃ ᠬᠤᠷᠢᠶ᠎ᠠ ᠶᠠᠮᠤᠨ ᠤ ᠳᠤᠰᠢᠶᠠᠯ ᠢ ᠠᠪᠤᠭᠰᠠᠨ ᠳᠡᠷᠡ ᠰᠤᠮᠤᠨ ᠳᠠᠷᠤᠭ᠎ᠠ ᠦᠪᠡᠷ ᠢᠶᠠᠨ ᠪᠡᠶᠡᠯᠡᠬᠦᠯᠬᠦ ᠶᠢᠨ ᠳᠦᠯᠦᠭᠡ ᠶᠠᠳᠠᠷᠠᠭᠤᠯᠢᠭ ᠪᠠᠶᠢᠯᠳᠤᠭᠴᠢ ᠠᠴᠠ ᠪᠠᠨ ᠤᠷᠳᠤ ᠫᠤᠤ ᠠᠪᠴᠦ᠂ ᠬᠡᠳᠦᠨ ᠬᠦᠮᠤᠨ ᠲᠠᠢ ᠬᠠᠮᠳᠤ ᠪᠠᠷ ᠰᠠᠭᠤᠳᠠᠯ ᠤᠨ ᠵᠢᠵᠢᠭ ᠮᠠᠰᠢᠨ ᠤᠷᠤᠭᠤ ᠤᠶᠢᠷᠠᠳᠤᠵᠦ ᠤᠴᠢᠵᠠᠢ᠃ ᠠᠭᠤᠯᠠ  ᠶᠢᠨ ᠨᠤᠭᠤᠯᠤᠭ᠎ᠠ ᠪᠠᠷ ᠭᠡᠳᠡᠵᠦ ᠤᠴᠢᠬᠤ ᠬᠦᠮᠦᠰ ᠢ ᠮᠡᠳᠡᠭᠰᠡᠨ ᠦᠭᠡᠢ ᠪᠠᠶᠢᠭᠰᠠᠨ ᠳᠠᠶᠢᠰᠤᠨ ᠤ ᠬᠤᠷᠢᠶᠠᠨ ᠳᠠᠷᠤᠭ᠎ᠠ ᠨᠢ ᠦᠪᠡᠷ ᠤᠨ ᠭᠠᠯ ᠤᠨ ᠬᠦᠴᠦᠨ ᠳᠤ ᠤᠮᠤᠷᠬᠠᠭᠯᠠᠨ ᠮᠠᠨ ᠤ ᠴᠡᠷᠢᠭ ᠠᠴᠠ ᠠᠮᠢᠳᠤ ᠬᠡᠯᠡ ᠪᠠᠶᠢᠪᠠᠯ ᠴᠢᠩᠭ᠎ᠠ ᠦᠴᠢᠭᠯᠡᠨ ᠦᠨᠡᠨ ᠬᠦᠴᠦᠨ ᠢ ᠤᠯᠠᠯᠠᠬᠤ ᠪᠠᠷ ᠶᠠᠭᠠᠷᠠᠨ᠎ᠠ᠃ ᠠᠴᠢᠶᠠᠨ ᠤ ᠮᠠᠰᠢᠨ ᠤ ᠺᠠᠫᠢᠨ ᠢᠶᠠᠷ ᠺᠤᠮᠠᠨᠳᠠ ᠶᠢᠨ ᠳᠠᠪᠴᠠᠩ ᠬᠢᠭᠰᠡᠨ ᠳᠠᠶᠢᠰᠤᠨ ᠤ ᠬᠤᠷᠢᠶᠠᠨ ᠳᠠᠷᠤᠭ᠎ᠠ ᠦᠪᠡᠷ  ᠤᠨ ᠴᠡᠷᠢᠭ ᠤᠨ ᠠᠭᠤᠯᠠ ᠠᠪᠠᠷᠢᠭᠰᠠᠭᠠᠷ ᠪᠠᠶᠢᠬᠤ ᠳᠠᠭᠠᠨ ᠬᠦᠯᠢᠭᠡᠷ ᠮᠦᠰᠦᠨ ᠠᠭᠤᠯᠠ ᠶᠢ ᠳᠠᠪᠠᠵᠦ ᠶᠠᠳᠠᠨ ᠭᠤᠯᠭᠤᠷᠢᠵᠦ ᠪᠠᠶᠢᠬᠤ ᠰᠢᠭ᠋ ᠤᠬᠤᠷᠢᠨ ᠪᠠᠭᠤᠵᠦ᠂ ᠠᠷᠤ ᠳᠠᠭᠠᠨ ᠫᠤᠤ ᠪᠠᠷᠢᠭᠰᠠᠨ ᠳᠠᠷᠤᠭ᠎ᠠ ᠶᠢᠨ ᠢᠶᠠᠨ ᠬᠦᠴᠦ ᠪᠠᠷ ᠳᠠᠬᠢᠨ ᠠᠪᠠᠷᠢᠬᠤ ᠳᠤ ᠬᠢᠯᠢᠩᠨᠠᠨ ᠤᠯᠠᠮ ᠭᠡᠭᠰᠡᠯᠵᠡᠵᠦ ᠪᠠᠶᠢᠪᠠ᠃ ᠳᠡᠷᠡ ᠦᠶ᠎ᠠ ᠳᠤᠳᠤᠭᠠᠳᠤ ᠶᠢᠨ ᠳᠠᠶᠢᠨ ᠪᠤᠯᠤᠭᠰᠠᠨ ᠠᠴᠠ ᠨᠠᠭᠠᠰᠢ ᠭᠤᠮᠢᠨᠳᠠᠩ ᠤᠨ ᠤᠳᠠᠭ᠎ᠠ ᠳᠠᠷᠠᠭᠠᠯᠠᠨ ᠬᠠᠯᠳᠠᠬᠤ ᠳᠤ ᠳᠠᠶᠢᠰᠤᠨ ᠤ ᠵᠡᠷᠯᠢᠭ ᠰᠤᠮᠤᠨ ᠳᠤ ᠬᠤᠯᠴᠤᠷᠠᠵᠦ ᠢᠷᠡᠭᠰᠡᠨ ᠴᠢᠪᠴᠢᠮ᠎ᠠ ᠬᠠᠳᠠ ᠲᠠᠢ ᠬᠠᠨ ᠬᠠᠶᠢᠷᠬᠠᠨ ᠪᠤᠯ ᠳᠦᠭ ᠳᠦᠮᠡᠨ ᠤᠨ ᠤ ᠳᠤᠷᠰᠢᠳᠠ ᠤᠷᠤᠰᠢᠭᠰᠠᠨ ᠦᠪᠡᠷᠮᠢᠴᠡ ᠰᠦᠷᠯᠢᠭ ᠢᠶᠠᠨ ᠬᠠᠮᠠᠭᠠᠯᠠᠭᠰᠠᠨ ᠰᠢᠭ᠋ ᠢᠶᠠᠷ ᠠᠷᠠᠳ ᠤᠨ ᠪᠠᠶᠢᠯᠳᠤᠭᠴᠢ ᠶᠢ ᠬᠤᠨᠭ᠍ᠬᠢᠯ ᠳᠠᠭᠠᠨ ᠠᠭᠤᠯᠵᠦ ᠵᠡᠷᠯᠢᠭ ᠠᠷᠢᠶᠠᠳᠠᠨ ᠠᠴᠠ ᠠᠴᠢᠷ ᠦᠷ᠎ᠠ  ᠪᠠᠨ ᠰᠤᠭᠤᠪᠴᠢᠯᠠᠨ ᠬᠠᠮᠠᠭᠠᠯᠠᠵᠦ ᠪᠠᠶᠢᠬᠤ ᠮᠡᠳᠦ ᠪᠠᠷ ᠡᠨᠡ ᠰᠢᠷᠭᠠᠭᠤ ᠳᠤᠯᠤᠯᠳᠤᠭᠠᠨ ᠳᠤ ᠪᠦᠳᠦᠮᠠᠯ ᠪᠠᠬᠢᠯᠠᠯᠳᠠ ᠪᠤᠯᠵᠦ ᠪᠠᠶᠢᠯ᠎ᠠ᠃ ᠬᠠᠳᠠ ᠴᠢᠯᠠᠭᠤ᠂ ᠵᠠᠷ ᠵᠡᠪᠰᠡᠭ ᠤᠨ ᠠᠯᠢ ᠳᠤᠬᠢᠷᠠᠮᠵᠢᠳᠠᠢ ᠪᠠᠷ ᠳᠠᠶᠢᠰᠤᠨ ᠤ ᠬᠡᠷᠡᠯ ᠮᠠᠩᠨᠠᠢ ᠦᠭᠡᠳᠡ ᠬᠠᠷᠢᠭᠤ ᠪᠠᠷᠢᠵᠦ ᠪᠠᠶᠢᠪᠠ᠃ ᠳᠠᠶᠢᠰᠤᠨ ᠬᠡᠳᠦᠢ ᠪᠠᠷ ᠵᠤᠵᠠᠭᠠᠨ ᠬᠦᠴᠦᠨ ᠲᠠᠢ ᠪᠤᠯᠪᠠᠴᠦ ᠠᠰᠢᠭᠳᠤ ᠵᠢᠡᠡᠰᠠᠭᠠᠯ ᠢᠶᠠᠨ ᠠᠯᠳᠠᠭᠰᠠᠨ ᠳᠤᠯᠠ ᠳᠠᠪᠰᠢᠯᠳᠠ ᠪᠦᠷᠢ ᠳᠡᠭᠡᠨ ᠠᠷᠠᠳ ᠤᠨ ᠴᠡᠷᠢᠭ ᠤᠨ ᠡᠮᠤᠨ᠎ᠠ ᠠᠷᠢᠭᠤᠨ ᠬᠠᠶᠢᠷᠬᠠᠨ ᠤ ᠬᠦᠷᠦᠰᠦᠨ ᠳᠤ ᠪᠤᠵᠠᠷ ᠨᠦᠵᠢ ᠨᠢᠯᠤᠵᠦ ᠮᠢᠬᠠᠨ ᠳᠤᠯᠤᠮ ᠤᠳ ᠳᠡᠰᠬᠡᠶᠢᠷᠠᠯᠳᠤᠨ ᠪᠤᠯᠠᠢ ᠤᠷᠬᠢᠭᠤᠯᠵᠦ ᠪᠠᠶᠢᠵᠠᠢ᠃ ᠠᠰᠬ᠎ᠠ ᠬᠠᠳᠠ ᠬᠤᠯᠴᠤᠷᠠᠨ ᠡᠮᠳᠡᠷᠡᠪᠡᠴᠦ ᠬᠠᠳᠠᠨ ᠪᠠᠬᠢᠯᠠᠯᠳᠠ ᠲᠠᠢ ᠪᠠᠶᠢᠯᠳᠤᠭᠴᠢᠳ ᠤᠨ ᠭᠠᠨᠭ᠌ ᠪᠤᠯᠤᠳ ᠰᠦᠰᠦ  ᠶᠢ ᠬᠡᠷᠬᠢᠨ ᠰᠢᠨᠳᠠᠷᠠᠭᠤᠯᠬᠤ ᠠᠵᠢ᠃ ᠤᠤᠯ ᠨᠢ ᠮᠠᠨ ᠤ ᠬᠠᠶᠢᠭᠤᠯ ᠤᠨ ᠨᠢᠭᠡᠨ ᠰᠠᠯᠠᠭ᠎ᠠ ᠶᠢ ᠺᠤᠮᠠᠨᠳᠠᠯᠠᠭᠰᠠᠨ ᠬᠤᠶᠠᠳᠤᠭᠠᠷ ᠰᠤᠮᠤᠨ ᠳᠠᠷᠤᠭ᠎ᠠ᠂ ᠬᠤᠷᠢᠶᠠᠨ ᠶᠠᠮᠤᠨ ᠤ ᠳᠤᠰᠢᠶᠠᠯ ᠢ ᠳᠦᠬᠦᠷᠠᠩ ᠪᠡᠶᠡᠯᠡᠬᠦᠯᠵᠦ᠂ ᠳᠠᠶᠢᠰᠤᠨ ᠤ ᠤᠬᠤᠷᠢᠯᠳᠠ ᠶᠢᠨ ᠪᠦᠷᠢᠶ᠎ᠠ ᠶᠢ ᠬᠤᠷᠳᠤᠯᠠᠭᠰᠠᠨ ᠪᠠᠶᠢᠵᠠᠢ᠃ ᠭᠠᠪᠰᠢᠭᠠᠢ ᠪᠤᠶᠤ ᠬᠠᠶᠢᠭᠤᠯ ᠤᠨ ᠠᠵᠢᠯ ᠢ ᠵᠡᠷᠭᠡᠴᠡᠬᠦᠯᠦᠨ ᠬᠦᠢᠴᠡᠳᠭᠡᠭᠰᠡᠨ ᠳᠡᠬᠦᠨ ᠢ ᠬᠠᠭᠤᠴᠢᠨ ᠤᠷᠤᠨ ᠳᠠᠭᠠᠨ ᠢᠷᠡᠬᠦ ᠦᠶ᠎ᠠ ᠳᠠᠶᠢᠰᠤᠨ ᠤ ᠮᠠᠰᠢᠨ ᠨᠢ ᠭᠡᠨᠡᠳᠡᠬᠦᠯᠦᠨ ᠳᠤᠪᠳᠤᠯᠬᠤ ᠳᠤᠬᠢᠶᠠᠯᠳᠤᠵᠠᠢ᠃ ᠳᠠᠬᠢᠨ ᠭᠡᠨᠡᠳᠳᠡ ᠶᠢᠨ ᠬᠤᠪᠢᠷᠠᠯ ᠳᠤ ᠤᠷᠤᠵᠦ᠂ ᠨᠢᠭᠡᠨᠳᠡ ᠬᠠᠪᠴᠢᠭᠳᠠᠭᠰᠠᠨ ᠳᠤᠯᠠ ᠪᠠᠶᠢᠯᠳᠤᠭᠴᠢᠳ ᠢᠶᠠᠨ ᠵᠦᠭᠯᠡᠬᠦᠯᠦᠨ ᠪᠠᠶᠢᠯᠳᠤᠵᠠᠢ ᠁ ᠰᠢᠩᠭᠡᠬᠦ ᠨᠠᠷᠠᠨ ᠤ ᠬᠠᠮᠳᠤ ᠰᠢᠩᠭᠡᠷᠡᠭᠰᠡᠨ ᠳᠠᠭᠠᠷᠢᠯᠳᠠ᠂ ᠰᠤᠪᠤᠷᠠᠬᠤ ᠨᠠᠷᠠᠨ ᠤ ᠬᠠᠮᠳᠤ ᠰᠤᠨᠵᠢᠷᠠᠭᠰᠠᠨ ᠫᠤᠤᠳᠠᠯᠳᠠ  ᠪᠠᠷ ᠳᠤᠯᠤᠯᠳᠤᠭᠠᠨ ᠳᠠᠭᠤᠰᠬᠤ ᠳᠤ ᠬᠦᠷᠴᠠᠢ᠃ ᠬᠦᠯᠳᠡᠬᠦᠦ ᠴᠡᠳᠡᠭ ᠠᠭᠤᠯᠠ ᠵᠠᠪᠠ ᠳᠤ ᠳᠠᠶᠢᠰᠤᠨ ᠤ ᠤᠬᠤᠷᠢᠯᠳᠠ  ᠶᠢᠨ ᠪᠦᠷᠢᠶ᠎ᠠ ᠳᠤᠷᠬᠢᠳᠠᠯ᠎ᠠ ᠬᠢᠨᠭᠰᠢᠭᠡᠨᠡᠵᠠᠢ᠃ ᠨᠢᠭᠡᠨᠳᠡ ᠪᠡᠭᠡᠷᠡᠵᠦ ᠪᠡᠷᠪᠡᠶᠢᠯᠳᠦᠭᠰᠡᠨ ᠴᠡᠷᠢᠭ ᠢᠶᠠᠷ ᠢᠶᠠᠨ ᠮᠢᠬᠠᠨ ᠳᠤᠯᠤᠮ ᠢᠶᠠᠨ ᠳᠡᠬᠦᠯᠭᠡᠭᠰᠡᠨ ᠳᠠᠶᠢᠰᠤᠨ ᠤ ᠺᠤᠮᠠᠨᠳᠠ ᠨᠢᠭᠡᠨ ᠦᠶ᠎ᠠ ᠱᠤᠪᠤᠭᠠᠷᠠᠯᠳᠤᠭᠠᠳ ᠬᠠᠯᠢᠭᠤᠳᠠᠢ ᠶᠢᠨ ᠰᠦᠮ᠎ᠡ ᠵᠦᠭ ᠪᠤᠰᠤᠳ ᠢᠶᠠᠨ ᠵᠠᠮᠴᠢᠯᠠᠨ ᠳᠦᠷᠦᠬᠦᠯᠡᠵᠠᠢ᠃ ᠬᠠᠯᠢᠭᠤᠳᠠᠢ ᠶᠢᠨ ᠰᠦᠮ᠎ᠡ ᠶᠢᠨ ᠬᠤᠸᠠᠷᠠᠭ ᠤᠳ ᠢ ᠳᠤᠭᠠᠡᠭ ᠳᠤᠨᠢ ᠬᠤᠷᠢᠵᠦ᠂ ᠱᠠᠪᠢ ᠨᠠᠷ ᠤᠨ ᠪᠠᠶᠢᠰᠢᠩ ᠢ ᠡᠵᠡᠷᠭᠡᠭᠯᠡᠭᠰᠡᠨ ᠳᠠᠶᠢᠰᠤᠨ ᠰᠦᠮ᠎ᠡ ᠶᠢᠨ ᠬᠠᠭᠠᠯᠭ᠎ᠠ ᠪᠠ ᠯᠠᠮᠠ ᠨᠠᠷ ᠤᠨ ᠳᠦᠯᠡᠰᠢ ᠶᠢ ᠬᠠᠭᠤᠷᠠᠶᠢᠯᠠᠨ ᠳᠦᠯᠡᠵᠦ᠂ ᠠᠪᠳᠠᠷ᠎ᠠ ᠬᠤᠷᠭᠤ ᠶᠢ ᠬᠤᠭᠤᠰᠤᠯᠠᠨ ᠪᠠᠯᠢᠩ ᠳᠠᠬᠢᠯ ᠢ ᠦᠯᠡᠳᠡᠭᠡᠯ ᠦᠭᠡᠢ ᠢᠳᠡᠵᠠᠢ᠃ ᠪᠠᠰᠠ ᠤᠯᠠᠨ ᠮᠠᠰᠢᠨ ᠢᠶᠠᠨ ᠰᠦᠮ᠎ᠡ ᠶᠢᠨ ᠭᠤᠷᠤ ᠶᠢ ᠳᠠᠭᠠᠭᠤᠯᠤᠨ ᠳᠤᠳᠤᠷᠯᠠᠨ ᠪᠠᠬᠢᠯᠡᠭᠡᠳ ᠳᠦᠷᠪᠠᠨ ᠵᠦᠭ ᠨᠠᠢᠮᠠᠨ ᠵᠤᠪᠬᠢᠰ ᠲᠤ ᠬᠠᠯᠢᠭᠤᠳᠠᠢ  ᠶᠢᠨ ᠰᠦᠮ᠎ᠡ ᠶᠢᠨ ᠳᠤᠩᠴᠢᠳ ᠤᠨ ᠵᠤᠯᠠ ᠠᠴᠠ ᠢᠯᠭᠠᠷᠠᠮ᠎ᠠ ᠴᠠᠬᠢᠯᠭᠠᠨ ᠳ᠋ᠸᠡᠭ ᠠᠰᠠᠭᠠᠵᠠᠢ᠃ ᠮᠠᠨ ᠤ ᠦᠳᠦᠭᠡᠬᠦ ᠭᠡᠰᠡᠭ ᠬᠦᠮᠦᠰ ᠢ ᠰᠦᠨᠢ ᠶᠢᠨ ᠳᠠᠭᠠᠷᠢᠯᠳᠠ ᠭᠡᠵᠦ ᠠᠶᠤᠨ᠂ ᠫᠦᠯᠧᠮᠢᠶᠤᠲ ᠢᠶᠠᠨ ᠬᠡᠯᠬᠢᠬᠦᠯᠦᠨ ᠫᠤᠤᠳᠠᠵᠦ ᠪᠠᠶᠢᠭᠰᠠᠨ ᠃ ᠪᠢᠳᠡ ᠶᠡᠭᠡ ᠴᠡᠷᠢᠭ ᠢ ᠡᠷᠢᠨ ᠤᠴᠢᠬᠤ ᠳᠠᠭᠠᠨ ᠵᠢᠩᠨᠡᠬᠦᠷ ᠤᠨ ᠬᠠᠪᠬᠠᠭᠠᠰᠤ ᠶᠢ ᠠᠪᠤᠭᠰᠠᠨ ᠭᠡᠷ ᠲᠤ ᠪᠠᠷᠢᠭᠰᠠᠨ ᠱᠦᠯᠦᠨ ᠳᠤᠰᠤᠨ ᠳ᠋ᠸᠡᠭ ᠤᠨ ᠭᠡᠷᠡᠯ ᠰᠢᠭ ᠰᠦᠳᠡᠭᠡᠨᠡᠬᠦ ᠴᠠᠬᠢᠯᠭᠠᠨ ᠳ᠋ᠸᠡᠭ ᠢ ᠰᠢᠭᠤᠷᠭᠠᠨ ᠳᠤᠳᠤᠭᠤᠷ ᠬᠠᠷᠠᠵᠦ᠂ ᠵᠡᠯ᠎ᠡ ᠫᠤᠤᠵᠢᠩ ᠰᠢᠭ᠋ ᠳᠠᠷᠴᠢᠬᠢᠨᠠᠬᠤ ᠫᠦᠯᠧᠮᠢᠶᠤᠲ ᠤᠨ ᠴᠢᠮᠡᠭᠡ ᠶᠢ ᠳᠤᠭᠤᠯᠵᠦ ᠶᠠᠪᠤᠯ᠎ᠠ᠃ ᠳᠠᠶᠢᠰᠤᠨ ᠤ ᠰᠦᠷ ᠮᠠᠨᠳᠤᠭᠤᠯᠤᠭᠰᠠᠨ ᠰᠦᠮ᠎ᠡ ᠶᠢᠨ ᠭᠤᠷᠤ ᠠᠴᠠ ᠤᠨᠠᠯ ᠮᠦᠷᠬᠦᠯ ᠬᠢᠪᠠᠴᠦ ᠬᠠᠭᠠᠰ ᠡᠳᠦᠷ ᠲᠤ ᠬᠦᠷᠴᠦ ᠪᠤᠯᠬᠤ ᠭᠠᠵᠠᠷ ᠤᠳ ᠲᠤ ᠬᠤᠨᠤᠭᠰᠠᠨ ᠶᠡᠭᠡ ᠴᠡᠷᠢᠭ ᠤᠨ ᠮᠠᠨᠠᠭᠠᠴᠢᠨ ᠠᠴᠠ ᠪᠤᠰᠤᠳ ᠨᠢ ᠮᠠᠨ ᠤ ᠦᠭᠡᠳᠡ ᠠᠴᠠ ᠬᠠᠮᠠᠷ ᠳᠠᠳᠠᠨ ᠳᠤᠭ ᠨᠤᠶᠢᠷ ᠲᠠᠭᠠᠨ ᠪᠠᠶᠢᠯᠴᠠᠪᠠ᠃ ᠬᠠᠷᠢᠨ ᠰᠤᠨᠤᠰᠬᠤ ᠳᠤ ᠳᠠᠶᠢᠰᠤᠨ ᠤ ᠺᠤᠮᠠᠨᠳᠠ ᠨᠤᠭᠤᠳ ᠨᠢ ᠮᠤᠩᠭᠤᠯ ᠯᠠᠮᠠ ᠨᠠᠷ ᠲᠤ ᠶᠡᠭᠡᠮᠰᠦᠭ ᠯᠠᠷᠵᠢᠶ᠎ᠠ ᠦᠵᠡᠬᠦᠯᠬᠦ ᠭᠡᠰᠡᠨ ᠰᠢᠭ ᠢᠶᠠᠷ ᠦᠬᠦᠳᠡᠯ ᠤᠳ ᠠᠴᠠ ᠪᠠᠨ ᠡᠷᠬᠢᠮᠯᠠᠨ ᠭᠠᠷᠭᠠᠭᠰᠠᠨ ᠨᠢᠭᠡᠨ ᠬᠡᠬᠦᠷ ᠲᠤ ᠵᠤᠯᠠ ᠪᠠᠷᠢᠭᠤᠯᠤᠨ ᠰᠦᠨᠡᠰᠦ ᠳᠤᠨᠢᠯᠤᠭᠤᠯᠬᠤ ᠶᠢᠨ ᠳᠦᠯᠦᠭᠡ ᠠᠯᠪᠠᠨ ᠤ ᠢᠷᠤᠭᠡᠯ ᠬᠤᠷᠠᠭᠤᠯᠤᠭᠰᠠᠨ ᠭᠡᠳᠡᠭ᠃ ᠴᠤᠬᠤᠮ ᠴᠠᠪᠠ ᠶᠢᠨ ᠦᠭᠡᠢ ᠢᠷᠤᠭᠡᠯ ᠠᠪᠬᠤ ᠶᠢ ᠪᠠᠷᠤᠭ ᠦᠵᠡᠭᠡᠳᠦᠢ ᠯᠠᠮᠠ ᠨᠠᠷ ᠬᠡᠳᠦᠢ ᠪᠠᠷ ᠵᠤᠭᠴᠢᠨ ᠤᠮᠵᠠᠳ ᠤᠨ ᠳᠤᠬᠢᠷᠠᠯᠳᠠ ᠦᠭᠡᠢ ᠪᠤᠯᠪᠠᠴᠦ ᠶᠤᠰᠤᠴᠢᠯᠠᠨ ᠬᠦᠢᠴᠡᠳᠭᠡᠭᠰᠡᠨ ᠭᠡᠳᠡᠭ᠃ ᠮᠠᠷᠭᠠᠳᠠ ᠨᠢ ᠬᠠᠷ᠎ᠠ ᠦᠷᠯᠦᠭᠡᠬᠦᠷ ᠪᠤᠰᠤᠭᠰᠠᠨ ᠳᠠᠶᠢᠰᠤᠨ ᠬᠤᠶᠠᠷ ᠮᠠᠰᠢᠨ ᠳᠦᠬᠦᠷᠠᠩ ᠠᠴᠢᠭᠰᠠᠨ ᠮᠢᠬᠠᠨ ᠳᠤᠯᠤᠮ ᠢᠶᠠᠨ ᠰᠢᠭᠤᠳᠠᠶᠢᠴᠢᠯᠠᠨ ᠳᠠᠷᠤᠭᠤᠯᠤᠨ ᠪᠦᠳᠡᠭᠡᠵᠦ᠂ ᠰᠢᠭᠤᠳ ᠰᠢᠯᠤᠭᠤᠨ ᠪᠤᠴᠠᠭᠰᠠᠨ ᠪᠠᠶᠢᠪᠠ᠃ ᠮᠠᠰᠢᠨ ᠳᠠᠭᠠᠨ ᠦᠮᠦᠭ ᠪᠤᠯᠬᠤ ᠳᠤᠰᠢᠶᠠᠯ  ᠲᠠᠢ ᠭᠠᠷᠴᠦ ᠢᠷᠡᠭᠰᠡᠨ ᠠᠷᠪᠠᠨ ᠳᠦᠷᠪᠡᠳᠦᠭᠡᠷ ᠴᠤᠪᠤᠭ᠎ᠠ ᠶᠢᠨ ᠮᠤᠷᠢᠳᠤ ᠳᠡᠭᠡᠷᠡᠮ ᠨᠢ ᠮᠠᠨ ᠤ ᠦᠯᠢᠭᠡᠷ ᠤᠨ ᠤᠷᠤᠰᠢᠯ ᠪᠦᠯᠦᠭ ᠲᠤ ᠭᠠᠷᠤᠭᠰᠠᠨ ᠤᠯᠠᠭᠠᠨ ᠬᠠᠳᠠᠳᠤ ᠶᠢᠨ ᠳᠡᠨᠳᠡ ᠨᠢᠳᠤ ᠴᠠᠪᠴᠢᠯᠠᠬᠤ ᠦᠭᠡᠢ ᠪᠤᠯᠤᠭᠰᠠᠨ ᠵᠠᠩ ᠤᠪᠤᠭᠳᠤ ᠬᠤᠷᠢᠶᠠᠨ ᠳᠠᠷᠤᠭ᠎ᠠ ᠳᠠᠭᠠᠨ ᠭᠠᠰᠢᠭᠤᠳᠠᠨ ᠭᠤᠨᠢᠭᠳᠤ ᠰᠤᠷᠭᠠᠮᠵᠢ ᠪᠠᠷ ᠨᠢ ᠭᠠᠨᠵᠤᠭ᠎ᠠ ᠳᠠᠭᠠᠨ ᠬᠤᠭᠤᠰᠤᠨ ᠳᠠᠯᠢᠩ ᠳᠤᠬᠤᠵᠦ᠂ ᠭᠠᠷ ᠲᠠᠭᠠᠨ ᠡᠪᠭᠡᠭᠰᠡᠨ ᠬᠤᠶᠢᠪᠢ ᠪᠠᠷᠢᠵᠦ ᠪᠤᠴᠠᠭᠰᠠᠨ ᠭᠡᠳᠡᠭ᠃ ᠬᠠᠨ ᠬᠠᠶᠢᠷᠬᠠᠨ ᠤ ᠠᠨᠠᠩ ᠭᠡᠳᠡᠭ ᠬᠠᠪᠴᠢᠯ ᠳᠤ ᠪᠤᠴᠠᠵᠦ ᠢᠷᠡᠬᠦ ᠳᠡᠭᠡᠨ ᠳᠠᠶᠢᠰᠤᠨ ᠤ ᠮᠠᠰᠢᠨ ᠳᠤ ᠬᠠᠪᠴᠢᠭᠳᠠᠭᠰᠠᠨ ᠬᠤᠶᠠᠳᠤᠭᠠᠷ ᠰᠤᠮᠤᠨ ᠳᠠᠷᠤᠭ᠎ᠠ ᠪᠤᠯ ᠬᠤᠷᠴᠠ ᠳᠦᠷᠭᠡᠨ ᠪᠦᠭᠡᠳ ᠴᠤᠴᠠᠭᠠᠰᠢ ᠦᠭᠡᠢ ᠪᠠᠷ ᠪᠠᠶᠢᠯᠳᠤᠭᠴᠢᠳ ᠢᠶᠠᠨ ᠬᠢᠷ᠎ᠠ ᠦᠭᠡᠳᠡ ᠳᠠᠪᠠᠭᠤᠯᠤᠨ ᠦᠪᠡᠷ ᠢᠶᠠᠨ ᠳᠠᠶᠢᠰᠤᠨ ᠲᠠᠢ ᠳᠤᠯᠤᠯᠳᠠᠨ ᠪᠠᠶᠢᠭᠠᠳ ᠨᠢᠭᠡᠨ ᠳᠦᠨᠳᠦᠭᠡᠷ ᠬᠠᠳᠠ ᠶᠢᠨ ᠳᠡᠷᠭᠡᠳᠡ ᠬᠦᠷᠴᠠᠢ᠃ ᠳᠠᠬᠢᠨ ᠴᠠᠭᠠᠰᠢ ᠤᠬᠤᠷᠢᠬᠤ ᠭᠡᠪᠡᠯ ᠤᠯᠠᠮ ᠳᠦᠭᠰᠢᠬᠦᠷᠢᠳᠠᠢ ᠪᠤᠯᠵᠠᠢ᠃ ᠳᠡᠷᠡ ᠪᠤᠯ ᠮᠤᠨᠳᠠᠵᠦ ᠤᠷᠳᠤ ᠫᠤᠤ ᠲᠠᠢ ᠪᠠᠶᠢᠭᠰᠠᠨ ᠪᠤᠯᠬᠤᠷ ᠳᠠᠶᠢᠰᠤᠨ ᠠᠴᠠ ᠳᠤᠩᠳᠠᠷᠠᠭᠤᠯᠤᠨ ᠬᠠᠰᠢᠪᠠ᠃ ᠭᠡᠨᠡᠳᠳᠡ ᠤᠷᠳᠤ ᠫᠤᠤ ᠶᠢᠨ ᠢᠶᠠᠨ ᠰᠤᠮᠤ ᠦᠭᠡᠢ ᠪᠤᠯᠤᠭᠰᠠᠨ ᠢ ᠮᠡᠳᠡᠭᠡᠳ ᠮᠠᠦ᠋ᠽᠧᠷ ᠤᠨ ᠰᠤᠮᠤ ᠶᠢ ᠪᠠᠷᠳᠠᠮ ᠨᠤᠭᠤ ᠭᠠᠵᠠᠷ ᠳᠠᠶᠢᠰᠤᠨ ᠢ ᠢᠷᠡᠳᠡᠯ᠎ᠡ ᠳᠤᠭᠤᠢ ᠬᠡᠪᠳᠡᠵᠦ ᠪᠠᠶᠢᠬᠤ ᠳᠠᠭᠠᠨ ᠰᠡᠳᠬᠢᠯ ᠰᠢᠭᠤᠳᠴᠦ ᠪᠡᠯᠡᠳᠭᠡᠭᠰᠡᠨ ᠶᠤᠮ ᠪᠠᠶᠢᠨ᠎ᠠ᠃ ᠠᠮᠢᠳᠤ ᠬᠡᠯᠡ ᠪᠠᠷᠢᠬᠤ ᠳᠤᠰᠢᠶᠠᠯ ᠲᠠᠢ ᠢᠷᠡᠭᠰᠡᠨ ᠳᠠᠶᠢᠰᠤᠨ ᠤᠨᠴᠠ ᠪᠠᠷ ᠢᠶᠠᠨ ᠦᠯᠡᠳᠡᠭᠰᠡᠨ ᠨᠢᠭᠡᠯᠭᠡᠨ ᠬᠦᠮᠦᠨ ᠢ ᠪᠠᠰᠤᠮᠵᠢᠯᠠᠨ ᠤᠬᠤᠷᠢᠬᠤ ᠵᠠᠮ ᠢ ᠬᠠᠰᠢᠨ ᠭᠠᠯᠯᠠᠵᠦ ᠤᠯᠠᠮ ᠤᠶᠢᠷᠠᠳᠤᠨ ᠢᠷᠠᠵᠠᠢ ᠃ ᠳᠡᠭᠡᠳᠡᠯ᠎ᠡ ᠮᠠᠦ᠋ᠽᠧᠷ ᠢᠶᠠᠨ ᠬᠠᠷᠠᠭᠠᠯᠠᠨ ᠫᠤᠤᠳᠠᠵᠦ ᠳᠠᠶᠢᠰᠤᠨ ᠢ ᠬᠡᠪᠳᠡᠰᠬᠢᠬᠦ ᠵᠠᠭᠤᠷ᠎ᠠ ᠬᠤᠸᠠ ᠮᠤᠷᠢᠨ ᠳᠠᠭᠠᠨ ᠨᠠᠶᠢᠳᠠᠵᠦ ᠠᠭᠤᠯᠠ ᠦᠭᠡᠳᠡ ᠳᠠᠪᠬᠢᠭᠤᠯᠵᠠᠢ᠃ ᠬᠠᠪᠢᠷᠭ᠎ᠠ ᠳᠠᠯ᠎ᠠ   ᠠᠴᠠ ᠨᠢ ᠬᠠᠰᠢᠨ ᠫᠤᠤᠳᠠᠵᠦ ᠪᠠᠶᠢᠭᠰᠠᠨ ᠳᠠᠶᠢᠰᠤᠨ ᠶᠠᠪᠠᠭᠠᠯᠠᠨ ᠪᠠᠷᠢᠪᠴᠢᠯᠠᠬᠤ ᠪᠠᠷ ᠮᠤᠷᠢ ᠶᠢ ᠨᠢ ᠫᠤᠤᠳᠠᠵᠠᠢ᠃ ᠬᠢᠷ᠎ᠠ ᠳᠤ ᠭᠠᠷᠤᠭᠰᠠᠨ ᠪᠠᠶᠢᠯᠳᠤᠭᠴᠢᠳ ᠨᠢ ᠦᠪᠡᠷ ᠤᠨ ᠳᠠᠷᠤᠭ᠎ᠠ ᠶᠢ ᠪᠠᠨ ᠦᠮᠦᠭᠯᠡᠨ ᠠᠪᠬᠤ  ᠭᠡᠳ ᠠᠯᠢ ᠪᠤᠯᠬᠤ ᠪᠠᠷ ᠳᠤᠰᠠᠯᠠᠵᠠᠢ᠃ ᠭᠠᠭᠴᠠ ᠨᠠᠶᠢᠳᠠᠯᠭ᠎ᠠ ᠪᠤᠯᠤᠭᠰᠠᠨ ᠮᠤᠷᠢᠨ ᠤ ᠪᠠᠨ ᠬᠦᠯ ᠤᠳ ᠢ ᠳᠠᠰᠤ ᠫᠤᠤᠳᠠᠭᠤᠯᠤᠭᠰᠠᠨ ᠳᠡᠷᠡ᠂ ᠬᠠᠳᠠ ᠴᠢᠯᠠᠭᠤ ᠪᠠᠷ ᠬᠠᠯᠬᠠᠯᠠᠨ ᠬᠦᠷ ᠴᠠᠰᠤᠨ ᠳᠤ ᠬᠦᠯ ᠠᠯᠳᠠᠭᠰᠠᠭᠠᠷ ᠪᠠᠶᠢᠵᠦ᠂ ᠴᠠᠪᠴᠢᠮ᠎ᠠ ᠡᠩᠭᠡᠷ ᠲᠤ ᠰᠢᠬᠠᠭᠳᠠᠵᠠᠢ᠃ ᠤᠳᠤ ᠳᠠᠷᠤᠭ᠎ᠠ ᠶᠢᠨ ᠢᠶᠠᠨ ᠳᠤᠰᠢᠶᠠᠯ ᠢᠶᠠᠷ ᠬᠢᠷ᠎ᠠ ᠳᠤ ᠭᠠᠷᠤᠭᠰᠠᠨ ᠪᠠᠶᠢᠯᠳᠤᠭᠴᠢᠳ ᠳᠡᠬᠦᠨ ᠤ ᠤᠯᠠᠮ ᠭᠠᠭᠴᠠᠭᠠᠷᠳᠠᠨ ᠳᠠᠶᠢᠰᠤᠨ ᠳᠤ ᠰᠢᠬᠠᠭᠳᠠᠭᠰᠠᠨ ᠢ ᠦᠵᠡᠭᠡᠳ ᠤᠯᠠᠮ ᠭᠡᠮᠰᠢᠪᠠ᠃ ᠭᠡᠪᠡᠴᠦ ᠴᠠᠪᠴᠢᠮ᠎ᠠ ᠡᠩᠭᠡᠷ ᠤᠷᠤᠭᠤ ᠭᠠᠯᠯᠠᠬᠤ ᠠᠷᠭ᠎ᠠ ᠦᠭᠡᠢ ᠪᠤᠯᠵᠦ ᠳᠦᠨᠳᠦᠭᠡᠷ ᠬᠠᠳᠠᠨ ᠳᠤ ᠳᠤᠯᠵᠦ ᠢᠷᠡᠭᠰᠡᠨ ᠳᠠᠶᠢᠰᠤᠨ ᠢ ᠬᠤᠷᠢᠭᠯᠠᠵᠦ ᠠᠯᠤᠰ ᠢᠶᠠᠷ ᠳᠤᠰᠠᠯᠠᠵᠠᠢ᠃ ᠬᠠᠪᠢᠷᠭ᠎ᠠ ᠳᠠᠯ᠎ᠠ ᠠᠴᠠ ᠨᠢ ᠤᠶᠢᠷᠠᠳᠤᠨ ᠰᠢᠬᠠᠬᠤ ᠳᠠᠶᠢᠰᠤᠨ ᠠᠴᠠ ᠬᠡᠳᠦᠨ ᠬᠦᠮᠦᠨ ᠤ ᠳᠤᠩᠳᠠᠷᠠᠨ ᠤᠨᠠᠬᠤ ᠶᠢ ᠦᠵᠡᠭᠡᠳ ᠳᠠᠶᠢᠰᠤᠨ ᠤ ᠪᠦᠷᠢᠶ᠎ᠠ ᠳᠤᠤᠭᠠᠷᠬᠤ ᠪᠠᠷ ᠤᠡᠭᠭᠤᠶᠢᠴᠢᠬᠠᠭᠰᠠᠨ ᠪᠠᠶᠢᠪᠠ᠃ ᠬᠢᠷ᠎ᠠ  ᠳᠤ ᠭᠠᠷᠤᠭᠰᠠᠨ ᠳᠡᠳᠡ ᠬᠠᠪᠢᠷᠭ᠎ᠠ ᠳᠠᠯ᠎ᠠ ᠶᠢᠨ ᠳᠠᠶᠢᠰᠤᠨ ᠢ ᠴᠠᠪᠴᠢᠮ᠎ᠠ ᠡᠩᠭᠡᠷ ᠠᠴᠠ ᠭᠠᠷᠴᠦ ᠢᠷᠡᠬᠦ ᠳᠤ ᠪᠠᠷᠢᠪᠴᠢᠯᠠᠭᠰᠠᠨ ᠪᠤᠯᠤᠯᠳᠠᠢ᠂ ᠬᠦᠮᠦᠨ ᠳᠠᠭᠤᠭᠰᠠᠨ ᠦᠭᠡᠢ ᠳᠤᠯᠠ ᠳᠡᠳᠡ ᠳᠠᠶᠢᠰᠤᠨ ᠢ ᠤᠬᠤᠷᠢᠬᠤ ᠳᠤᠨᠢ ᠪᠠᠰᠠ ᠴᠦᠭᠡᠷᠡᠬᠦᠯᠵᠠᠢ᠃1947 ᠳ᠋ᠤᠭᠠᠷ ᠤᠨ ᠤ 12 ᠳ᠋ᠤᠭᠠᠷ ᠰᠠᠷ᠎ᠠ ᠶᠢᠨ 1 ᠤ ᠦᠷᠯᠦᠭᠡᠬᠦᠷ ᠪᠠᠷᠳᠠᠭ᠎ᠠ ᠠᠪᠴᠦ ᠭᠤᠮᠢᠨᠳᠠᠩ ᠲᠠᠢ ᠪᠠᠶᠢᠯᠳᠤᠬᠤ ᠪᠠᠷ ᠪᠡᠯᠡᠳᠭᠡᠭᠰᠡᠨ ᠮᠠᠨ ᠤ ᠳᠦᠯᠦᠪᠯᠡᠭᠡ ᠳᠠᠶᠢᠰᠤᠨ ᠤ ᠳᠤᠭᠤᠯᠭᠠᠨ ᠰᠦᠰᠦ ᠪᠠᠷ ᠬᠤᠭᠤᠰᠤᠨ ᠪᠤᠯᠪᠠ᠃ ᠦᠴᠦᠭᠡᠳᠦᠷᠭᠡᠨ ᠮᠠᠰᠢᠨ ᠬᠤᠯᠬᠢᠭᠰᠠᠨ ᠳᠠᠶᠢᠰᠤᠨ ᠤ ᠮᠦᠷ ᠢ ᠰᠦᠨᠢ ᠶᠢᠨ ᠰᠢᠭᠤᠷᠭ᠎ᠠ ᠬᠡᠵᠢᠶᠠᠨ ᠤ ᠠᠷᠢᠭᠤᠳᠬᠠᠨ᠂ ᠵᠢᠭᠤᠳᠠᠭᠰᠠᠨ ᠳᠠᠶᠢᠰᠤᠨ ᠤ ᠳᠠᠭᠰᠢᠷᠠᠭᠤᠯᠤᠭᠰᠠᠨ ᠬᠦᠶᠦᠳᠡᠯ ᠢ ᠴᠦ ᠬᠡᠰᠡᠨ ᠦᠷᠯᠦᠭᠡ ᠶᠢᠨ ᠰᠢᠭᠤᠷᠭ᠎ᠠ ᠴᠡᠪᠡᠷᠯᠠᠵᠦ ᠪᠠᠶᠢᠪᠠ᠃ ᠬᠠᠨ ᠬᠠᠶᠢᠷᠬᠠᠨ ᠤ ᠰᠦᠷᠯᠢᠭ ᠤᠷᠬᠢᠯ ᠤᠳ ᠲᠠᠭᠠᠨ ᠰᠦ ᠡᠷᠬᠦᠭᠰᠡᠨ ᠮᠠᠯᠴᠢᠳ᠂ ᠠᠷᠠᠳ ᠤᠨ ᠴᠡᠷᠢᠭ ᠤᠨ ᠨᠤᠳᠤᠭ ᠢᠶᠠᠨ ᠬᠠᠮᠠᠭᠠᠯᠠᠵᠦ ᠪᠠᠶᠢᠬᠤ ᠳᠤ ᠪᠠᠶᠠᠰᠤᠨ ᠬᠠᠯᠢᠭᠤᠳᠠᠢ ᠶᠢᠨ ᠰᠦᠮ᠎ᠡ ᠠᠴᠠ ᠵᠢᠭᠤᠳᠠᠭᠰᠠᠨ ᠳᠠᠶᠢᠰᠤᠨ ᠤ ᠠᠷᠤ ᠠᠴᠠ ᠤᠰᠤ ᠰᠠᠴᠤᠵᠦ ᠪᠠᠶᠢᠯ᠎ᠠ ᠭᠡᠳᠡᠭ ᠢ ᠨᠢᠭᠤᠷ ᠢᠶᠠᠨ ᠬᠦᠯᠳᠡᠭᠡᠭᠡᠳ ᠠᠶᠢᠯ ᠳᠤ ᠰᠤᠪᠢᠯᠠᠵᠦ ᠪᠠᠶᠢᠭᠰᠠᠨ ᠮᠠᠨ  ᠤ ᠨᠢᠭᠡ ᠪᠠᠶᠢᠯᠳᠤᠭᠴᠢ ᠦᠵᠡᠵᠦ ᠭᠡᠨ᠎ᠡ ᠪᠢᠯᠡ᠃ ᠳᠡᠨᠳᠡᠬᠢ ᠮᠠᠯᠴᠢᠳ ᠢᠶᠠᠷ ᠰᠠᠴᠤᠯᠢ ᠡᠷᠬᠦᠬᠦᠯᠳᠡᠭ ᠰᠢᠯᠤᠭᠤᠨ ᠴᠠᠭᠠᠨ ᠬᠤᠰᠢᠭᠤᠨ ᠤ ᠨᠠᠢᠮᠠᠳᠤᠭᠠᠷ ᠰᠤᠮᠤᠨ ᠳᠤ ᠰᠢᠳᠦᠭᠳᠡᠭᠰᠡᠨ ᠬᠠᠨ ᠬᠠᠶᠢᠷᠬᠠᠨ ᠤ ᠨᠢᠷᠤᠭᠤᠳ ᠦᠪᠴᠢ ᠴᠠᠶᠢᠯᠵᠠᠵᠠᠢ᠃ ᠳᠡᠬᠦᠨ ᠤ ᠨᠢᠭᠡᠨ ᠵᠢᠯᠠᠭ᠎ᠠ ᠳᠤ ᠠᠷᠠᠳ  ᠤᠨ ᠪᠠᠶᠢᠯᠳᠤᠭᠴᠢ ᠬᠦᠯᠳᠡᠬᠦᠦ ᠴᠢᠯᠠᠭᠤ ᠬᠤᠪᠬᠤᠯᠤᠨ ᠠᠪᠴᠢᠷᠠᠵᠦ᠂ ᠳᠦᠷ ᠵᠠᠭᠤᠷ᠎ᠠ ᠶᠢᠨ ᠵᠠᠪᠰᠠᠷ ᠯᠠᠪᠠᠷᠢᠯᠠᠭᠰᠠᠨ ᠳᠠᠪᠴᠠᠩ ᠲᠠᠢ ᠰᠤᠪᠤᠷᠭᠠᠯᠠᠭᠰᠠᠨ ᠤᠪᠤᠭ᠎ᠠ ᠪᠤᠰᠬᠠᠵᠦ ᠳᠠᠯᠪᠢᠪᠠ᠃ ᠳᠡᠭᠡᠬᠦ ᠳᠤ ᠦᠴᠦᠭᠡᠳᠦᠷ ᠰᠤᠮᠤᠨ ᠳᠠᠷᠤᠭ᠎ᠠ ᠳᠠᠭᠠᠨ ᠫᠤᠤ ᠪᠠᠨ ᠦᠭᠬᠦᠭᠡᠳ ᠤᠳᠤ ᠪᠤᠯᠳᠠᠯ᠎ᠠ ᠤᠯᠵᠦ ᠠᠪᠤᠭᠠᠳᠤᠢ ᠪᠠᠶᠢᠭᠰᠠᠨ ᠳᠡᠷᠡ ᠪᠠᠶᠢᠯᠳᠤᠭᠴᠢ ᠳᠦᠨᠳᠦᠭᠡᠷ ᠬᠠᠳᠠᠨ ᠤ ᠳᠡᠨᠳᠡ ᠠᠴᠠ ᠴᠢᠯᠠᠭᠤ ᠬᠤᠪᠬᠤᠯᠠᠵᠦ ᠪᠠᠶᠢᠭᠰᠠᠨ ᠬᠦᠮᠦᠨ  ᠤ ᠤᠯᠤᠭᠰᠠᠨ ᠫᠤᠤ ᠠᠴᠠ ᠦᠪᠡᠷ ᠤᠨ ᠫᠤᠤ ᠪᠠᠨ ᠳᠠᠨᠢᠵᠠᠢ᠃ ᠳᠡᠭᠡᠭᠡᠳ ᠵᠢᠭᠤᠷᠠᠭᠰᠠᠨ ᠪᠠ ᠦᠭᠡᠢ ᠶᠢ ᠮᠡᠳᠡᠬᠦ ᠪᠠᠷ ᠮᠠᠰᠢᠨ ᠶᠢ ᠨᠡᠭᠡᠭᠡᠵᠦ᠂ ᠳᠤᠳᠤᠷ᠎ᠠ ᠠᠴᠠ ᠨᠢ ᠪᠢᠴᠢᠬᠠᠨ ᠬᠠᠭᠤᠳᠠᠰᠤ ᠤᠯᠤᠭᠠᠳ ᠦᠯᠦ ᠮᠡᠳᠡᠬᠦ ᠶᠢᠨ ᠡᠷᠭᠡ ᠪᠠᠷ ᠤᠡᠭᠰᠢᠵᠦ ᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠳᠡᠭᠡᠭᠰᠢ ᠳᠤᠰᠢᠶᠠᠵᠠᠢ᠃ ᠠᠨᠠᠩ ᠤᠨ ᠬᠠᠪᠴᠢᠯ ᠳᠤ ᠡᠩᠨᠡᠭᠰᠡᠨ ᠶᠡᠭᠡᠮᠰᠦᠭ ᠵᠢᠡᠡᠰᠠᠭᠠᠯ ᠦᠭᠡᠳᠡ ᠠᠴᠠ ᠠᠭᠤᠯᠠ ᠶᠢᠨ ᠨᠦᠭᠡᠯᠭᠡᠨ ᠴᠦ ᠭᠡᠰᠡᠨ ᠡᠷᠬᠢᠮ ᠪᠤᠯᠪᠠᠰᠤᠷᠠᠯ ᠳᠤ ᠡᠮᠭᠡᠨᠢᠬᠦ ᠬᠦᠭᠵᠢᠮ ᠤᠨ ᠠᠳᠠᠯᠢ ᠪᠠᠷ ᠤᠶᠠᠷᠠᠯᠳᠠᠶ᠎ᠠ ᠬᠠᠤᠬᠢᠨ᠎ᠠ᠃ ᠶᠠᠭ ᠴᠠᠪᠴᠢᠮ᠎ᠠ ᠡᠩᠭᠡᠷ  ᠤᠨ ᠳᠡᠭᠡᠬᠦᠷ ᠤᠷᠢᠶᠠᠯᠳᠤᠨ ᠪᠤᠷᠵᠠᠩᠳᠠᠬᠤ ᠮᠦᠡᠭᠬᠦᠨ ᠴᠠᠭᠠᠨ ᠴᠠᠰᠤ ᠴᠦ ᠬᠡᠰᠡᠨ ᠡᠭᠡ ᠤᠷᠤᠨᠴᠢ ᠬᠦᠮᠦᠰ ᠤᠨ ᠭᠤᠨᠢᠭ ᠢ ᠳᠤᠬᠤᠨᠢᠭᠤᠯᠤᠨ ᠳᠠᠶᠢᠳᠬᠠᠷᠠᠭᠤᠯᠬᠤ ᠮᠡᠳᠦ ᠪᠠᠷ ᠠᠶᠠᠷᠬᠠᠨ ᠬᠢᠯᠠᠭᠠᠯᠠᠵᠦ ᠳᠤᠭᠤᠭᠰᠢ ᠪᠠᠭᠤᠨ᠎ᠠ᠃ ᠳᠡᠷᠡ  ᠨᠢ ᠮᠠᠨ ᠤ ᠳᠠᠶᠢᠴᠢᠳ ᠤᠨ ᠠᠩᠬᠢ ᠶᠢᠨ ᠬᠠᠶᠢᠷ᠎ᠠ ᠠᠴᠠ ᠳᠤᠰᠤᠯᠤᠭᠤᠯᠬᠤ ᠬᠠᠯᠠᠭᠤᠨ ᠨᠢᠯᠪᠤᠰᠤ ᠳᠤ ᠳᠤᠬᠢᠶᠠᠯᠳᠤᠮᠠᠭᠴᠠ ᠪᠦᠮᠪᠦᠯᠵᠠᠨ ᠳᠤᠰᠤᠯᠤᠭᠰᠠᠭᠠᠷ ᠪᠡᠯᠪᠡᠰᠦᠷᠡᠭᠰᠡᠳ ᠤᠨ ᠡᠪᠴᠢᠬᠦᠨ ᠳᠤᠨᠢ ᠬᠦᠷᠬᠦ ᠶᠢᠨ ᠰᠠᠴᠠᠭᠤ ᠴᠠᠷᠴᠠᠭᠰᠠᠭᠠᠷ ᠁ — ᠬᠦᠨᠳᠤᠳᠤ ᠭᠠᠰᠢᠭᠤᠳᠠᠯ ᠤᠨ ᠡᠩᠨᠡᠭᠡᠨ ᠤ ᠡᠮᠤᠨᠡᠬᠢ ᠮᠦᠡᠭᠬᠦᠨ ᠳᠤᠪᠤᠷᠤᠤ ᠰᠢᠭ᠋ ᠦᠵᠡᠭᠳᠡᠬᠦ ᠴᠠᠰᠤᠨ ᠤᠪᠤᠭ᠎ᠠ ᠤᠷᠤᠭᠤ ᠳᠤᠰ ᠬᠤᠷᠢᠶᠠᠨ ᠳᠠᠷᠤᠭ᠎ᠠ ᠨᠢ ᠰᠢᠭᠤᠳ ᠤᠴᠢᠪᠠ᠃ ᠦᠴᠦᠭᠡᠳᠦᠷ ᠦᠳᠡᠰᠢ ᠳᠠᠶᠢᠨ ᠤ ᠳᠠᠯᠠᠪᠠᠢ ᠶᠢ ᠱᠦᠬᠦᠷᠳᠡᠬᠦ ᠳᠤ ᠬᠦᠨᠳᠤᠳᠤ ᠴᠢᠨᠳᠠᠷ ᠢᠶᠠᠨ ᠦᠪᠡᠷ ᠤᠨ ᠭᠠᠷ ᠢᠶᠠᠷ ᠠᠮᠢᠯᠠᠭᠤᠯᠤᠭᠰᠠᠨ ᠪᠤᠯᠬᠤᠷ ᠰᠢᠭᠤᠳ ᠤᠴᠢᠭᠰᠠᠨ ᠨᠢ ᠳᠡᠷᠡ ᠪᠠᠶᠢᠪᠠ᠃ ᠳᠠᠶᠢᠨ ᠬᠦ ᠴᠠᠪᠴᠢᠮ᠎ᠠ ᠡᠩᠭᠡᠷ ᠲᠤ ᠭᠠᠷᠤᠭᠰᠠᠨ ᠦᠴᠦᠭᠡᠳᠦᠷ ᠤᠨ ᠬᠡᠷᠡᠭ ᠤᠨ ᠦᠨᠡᠨ ᠨᠢ ᠢᠯᠡᠷᠡᠪᠡ᠃ ᠵᠢᠡᠡᠰᠠᠭᠠᠯ  ᠳᠠᠬᠢ ᠪᠠᠶᠢᠯᠳᠤᠭᠴᠢᠳ ᠨᠢᠳᠤ ᠳᠠᠯᠳᠠᠷᠢᠭᠤᠯᠤᠨ ᠰᠠᠨᠠᠮᠰᠠᠷ ᠦᠭᠡᠢ ᠪᠦᠬᠦᠶᠢᠴᠡᠭᠡᠪᠡ᠃ ᠤᠯᠠᠨ ᠬᠦᠮᠦᠰ ᠢ ᠳᠡᠷᠢᠬᠦᠨ ᠡᠷᠬᠦᠨ ᠭᠤᠨᠢᠷᠬᠠᠨ ᠬᠠᠷᠠᠬᠤᠶ᠎ᠠ᠄ ᠵᠦᠪ ᠭᠠᠷ ᠤᠨ ᠬᠤᠮᠤᠬᠠᠢ ᠬᠤᠷᠤᠭᠤ ᠪᠠᠷ ᠶᠠᠭᠤ ᠶᠤᠮ ᠭᠤᠬᠠᠳᠠᠭᠰᠠᠨ ᠬᠡᠪ ᠲᠡᠭᠡᠨ ᠪᠠᠷᠠᠭᠤᠨ ᠴᠢᠮᠠᠷᠬᠠᠢ ᠶᠢᠨ ᠳᠡᠳᠦᠶᠢᠭᠡᠨ ᠠᠴᠠ ᠨᠠᠷᠢᠨ ᠴᠠᠷᠠᠭ᠎ᠠ ᠵᠡᠬᠦᠨᠰᠢ ᠳᠡᠯᠪᠡ ᠭᠠᠷᠤᠭᠰᠠᠨ ᠬᠡᠬᠦᠷ ᠢ ᠳᠠᠶᠢᠴᠢᠨ ᠳᠠᠷᠤᠭ᠎ᠠ ᠨᠠᠷ ᠨᠢ ᠡᠩᠬᠦᠷᠠᠶᠢᠯᠠᠨ ᠳᠡᠪᠡᠷᠢᠵᠦ ᠠᠪᠤᠭᠠᠳ ᠯᠠᠪᠠᠷᠢᠯᠠᠭᠰᠠᠨ ᠳᠠᠪᠴᠠᠩ ᠲᠠᠢ ᠰᠤᠪᠤᠷᠭᠠᠯᠠᠭᠰᠠᠨ ᠤᠪᠤᠭ᠎ᠠ ᠦᠭᠡᠳᠡ ᠠᠪᠠᠴᠢᠵᠦ ᠤᠷᠤᠰᠢᠭᠤᠯᠪᠠ᠃ ᠳᠡᠬᠦᠨ ᠤ ᠬᠦᠵᠦᠬᠦᠨ ᠳᠤᠨᠢ ᠠᠮᠢᠳᠤ ᠰᠡᠷᠡᠬᠦᠨ ᠪᠠᠶᠢᠬᠤ ᠳᠠᠭᠠᠨ ᠡᠭᠡᠯᠳᠦᠷᠭᠡᠯᠡᠭᠳᠡᠵᠦ ᠪᠠᠶᠢᠳᠠᠭ ᠮᠠᠦ᠋ᠽᠧᠷ ᠤᠨ ᠬᠢᠨᠢ ᠤᠭᠤᠰᠤᠷ ᠨᠢ ᠵᠠᠩᠬᠢᠯᠠᠭ᠎ᠠ ᠪᠠᠷ ᠢᠶᠠᠨ ᠳᠠᠰᠤᠷᠠᠭᠠᠳ ᠴᠢᠰᠤ ᠴᠠᠰᠤ ᠬᠤᠯᠢᠯᠳᠤᠨ ᠬᠦᠯᠳᠡᠵᠠᠢ᠃ ᠳᠡᠬᠦᠨ ᠤ ᠰᠢᠷᠬ᠎ᠠ ᠰᠡᠪ ᠨᠢ ᠴᠦ ᠬᠡᠰᠡᠨ ᠮᠤᠬᠤᠷᠳᠠᠳᠠᠯ᠎ᠠ ᠠᠯᠠᠨ ᠪᠠᠶᠢᠯᠳᠤᠵᠦ ᠪᠠᠶᠢᠭᠠᠳ ᠭᠤᠷᠢᠳᠠᠯ ᠦᠭᠡᠢ ᠪᠤᠯᠬᠤ  ᠳᠠᠭᠠᠨ ᠡᠴᠦᠰ ᠤᠨ ᠨᠠᠨᠳᠢᠨ ᠵᠤᠷᠢᠭ ᠪᠠᠷᠢᠭᠰᠠᠨ ᠢ ᠦᠵᠡᠬᠦᠯᠦᠨ᠎ᠠ᠃ ᠦᠴᠦᠭᠡᠳᠦᠷ ᠦᠳᠡᠰᠢ ᠦᠪᠡᠷ ᠢᠶᠠᠨ ᠢᠷᠠᠵᠦ ᠪᠠᠶᠢᠴᠠᠭᠠᠭᠰᠠᠨ ᠬᠤᠷᠢᠶᠠᠨ ᠳᠠᠷᠤᠭ᠎ᠠ ᠨᠢ ᠳᠡᠬᠦᠨ ᠤ ᠪᠠᠷᠠᠭᠤᠨ ᠠᠯᠠᠭ᠎ᠠ ᠶᠢᠨ ᠭᠡᠭᠵᠡᠷᠡᠭᠰᠡᠨ ᠪᠠ ᠮᠠᠦ᠋ᠽᠧᠷ ᠤᠨ ᠬᠢᠨᠢ ᠤᠭᠤᠰᠤᠷ ᠤᠨ ᠳᠠᠰᠤᠯᠤᠭᠳᠠᠭᠰᠠᠨ ᠢᠶᠠᠷ ᠴᠦ ᠬᠡᠰᠡᠨ ᠳᠠᠶᠢᠰᠤᠨ ᠤ ᠤᠬᠤᠷᠢᠯᠳᠠ ᠶᠢᠨ ᠪᠦᠷᠢᠶ᠎ᠠ ᠭᠡᠨᠭᠰᠢᠯᠡᠬᠦ ᠦᠶ᠎ᠠ  ᠪᠠᠷ ᠪᠤᠯᠤᠭᠰᠠᠨ ᠡᠯ᠎ᠡ ᠶᠠᠪᠤᠳᠠᠯ ᠢ ᠮᠡᠳᠡᠭᠡᠳ ᠦᠪᠡᠷ ᠤᠨ ᠮᠠᠶᠤᠤᠵᠠ ᠬᠢᠭᠰᠡᠨ ᠳᠠᠩᠽᠢ ᠪᠠᠷ ᠪᠦᠳᠡᠭᠡᠭᠰᠡᠨ ᠶᠤᠮ ᠪᠠᠶᠢᠵᠠᠢ᠃ ᠪᠠᠰᠠ ᠳᠡᠬᠦᠨ ᠤ ᠰᠤᠮᠤᠨ ᠤ ᠨᠢᠭᠡᠨ ᠶᠠᠳᠠᠷᠠᠭᠤ ᠪᠠᠶᠢᠯᠳᠤᠭᠴᠢ ᠶᠢᠨ ᠠᠪᠴᠢᠷᠠᠨ ᠳᠤᠰᠢᠶᠠᠭᠰᠠᠨ ᠪᠢᠴᠢᠬᠠᠨ ᠬᠠᠭᠤᠳᠠᠰᠤ ᠶᠢᠨ ᠳᠡᠭᠡᠷ᠎ᠡ᠄ ︽ᠠᠷᠪᠠᠨ ᠨᠢᠭᠡᠳᠦᠭᠡᠷ ᠰᠠᠷ᠎ᠠ ᠶᠢᠨ ᠬᠤᠪᠢᠨ ᠤ ᠨᠠᠮ ᠤᠨ ᠳᠠᠳᠠᠪᠤᠷᠢ᠂ ᠦᠨᠡᠨᠪᠠᠳᠤ ᠠᠴᠠ︾ ᠭᠡᠵᠦ ᠪᠢᠴᠢᠭᠰᠡᠨ ᠤ ᠳᠡᠷᠭᠡᠳᠡ ᠨᠢ ᠨᠠᠮᠠᠢᠢ ᠨᠠᠮ ᠤᠨ ᠵᠢᠩᠬᠢᠨᠢ ᠬᠡᠰᠢᠬᠦᠨ ᠳᠤ ᠤᠯᠠᠷᠢᠭᠤᠯᠤᠨ ᠦᠭᠬᠦ ᠶᠢ ᠁ ᠭᠡᠳ ᠬᠠᠷᠠᠨᠳᠠ ᠪᠠᠷ ᠪᠢᠴᠢᠭᠰᠡᠨ ᠠᠴᠠ ᠴᠦ ᠢᠯᠡᠳᠳᠡ᠃ ᠪᠠᠰᠠ ᠳᠦᠨᠳᠦᠭᠡᠷ ᠬᠠᠳᠠᠨ ᠤ ᠳᠡᠨᠳᠡ  ᠠᠴᠠ ᠬᠤᠸᠠ ᠮᠤᠷᠢᠨ ᠳᠠᠭᠠᠨ ᠮᠤᠷᠳᠠᠬᠤ ᠦᠶ᠎ᠠ ᠪᠡᠯᠡᠳᠭᠡᠨ ᠳᠠᠯᠪᠢᠵᠦ᠂ ᠤᠷᠳᠤ ᠫᠤᠤ ᠪᠠᠨ ᠴᠠᠰᠦᠨ ᠳᠤ ᠰᠢᠷᠭᠤᠭᠤᠯᠤᠨ ᠳᠠᠯᠪᠢᠭᠰᠠᠨ ᠨᠢ ᠳᠤᠳᠤᠷᠬᠠᠢ ᠠᠵᠢ᠃ ᠳᠠᠶᠢᠴᠢᠨ ᠨᠦᠬᠦᠷ ᠢᠶᠠᠨ ᠤᠷᠤᠰᠢᠭᠤᠯᠤᠭᠰᠠᠨ ᠳᠠᠪᠤᠳᠤᠭᠠᠷ ᠬᠤᠷᠢᠶᠠᠨ ᠳᠠᠷᠤᠭ᠎ᠠ ᠨᠢᠭᠡᠨ ᠦᠡᠭᠭᠡᠭᠳᠡᠭᠰᠡᠨ ᠪᠢᠴᠢᠬᠠᠨ ᠬᠠᠭᠤᠳᠠᠰᠤ ᠶᠢ ᠪᠠᠷᠢᠵᠦ ᠳᠦᠷᠦᠯᠬᠢ ᠰᠢᠷᠬᠢᠮᠠᠯ ᠬᠦᠨ ᠤᠬᠤᠷᠬᠠᠢ ᠪᠠᠨ ᠤᠳᠠᠳᠠᠯ᠎ᠠ ᠠᠨᠢᠪᠴᠢᠨ ᠵᠤᠭᠰᠤᠨ ᠪᠠᠶᠢᠭᠠᠳ ᠳᠠᠯᠠᠶᠢᠭᠴᠢ ᠶᠢᠨ ᠢᠶᠠᠨ ᠦᠢᠯᠡ ᠶᠠᠪᠤᠳᠠᠯ ᠢ ᠳᠤᠪᠴᠢᠯᠠᠨ ᠬᠡᠯᠡᠪᠡ᠄ — ᠦᠨᠡᠨᠪᠠᠳᠤ᠂ ᠵᠡᠬᠦᠨ ᠳᠦᠮᠡᠳ ᠤᠨ ᠮᠤᠩᠭᠤᠯ ᠬᠦᠮᠤᠨ᠃ ᠬᠤᠷᠢᠨ ᠬᠤᠶᠠᠷᠳᠠᠢ᠃ ᠳᠤᠮᠳᠠᠳᠤ ᠤᠯᠤᠰ ᠤᠨ ᠡᠪ ᠬᠠᠮᠳᠤ ᠨᠠᠮ ᠤᠨ ᠪᠡᠯᠡᠳᠭᠡᠯ ᠬᠡᠰᠢᠬᠦᠨ᠂ ᠦᠴᠦᠭᠡᠳᠦᠷᠭᠡᠨ ᠪᠤᠯᠳᠠᠯ᠎ᠠ ᠦᠪᠦᠷ ᠮᠤᠩᠭᠤᠯ ᠤᠨ ᠦᠪᠡᠰᠦᠪᠡᠨ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠤᠨ ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠳ᠋ᠢᠸᠢᠽᠢ ᠶᠢᠨ ᠳᠠᠪᠤᠳᠤᠭᠠᠷ ᠬᠤᠷᠢᠶᠠᠨ ᠤ ᠬᠤᠶᠠᠳᠤᠭᠠᠷ ᠰᠤᠮᠤᠨ ᠤ ᠳᠠᠷᠤᠭ᠎ᠠ ᠪᠠᠶᠢᠪᠠ᠃1945 ᠤᠨ ᠤ ᠨᠠᠮᠤᠷ᠂ ᠳᠡᠮᠤᠷ ᠤᠨ ᠦᠷᠳᠡᠭᠡ ᠭᠡᠳᠡᠭ ᠭᠠᠵᠠᠷ ᠬᠤᠪᠢᠰᠬᠠᠯ ᠳᠤ ᠤᠷᠤᠯᠴᠠᠨ᠂ ᠦᠪᠡᠷ ᠤᠨ ᠬᠠᠮᠳᠤ ᠰᠤᠷᠤᠭᠴᠢᠳ ᠢᠶᠠᠨ ᠴᠢᠯᠦᠭᠡᠯᠡᠬᠦ ᠪᠠᠷ ᠬᠠᠭᠤᠷᠮᠠᠭ ᠮᠤᠩᠭᠤᠯ ᠬᠢᠵᠠᠭᠠᠷ ᠤᠨ ᠴᠡᠷᠢᠭ ᠤᠨ ᠨᠤᠶᠠᠳ ᠤᠨ ᠰᠤᠷᠭᠠᠭᠤᠯᠢ ᠳᠤ ᠤᠴᠢᠭᠠᠳ ᠭᠤᠮᠢᠨᠳᠠᠩ ᠳᠤ ᠵᠠᠪᠰᠢᠶᠠᠨ ᠪᠤᠰᠤ ᠪᠠᠷᠢᠭᠳᠠᠵᠠᠢ᠃ ᠬᠦᠬᠡᠬᠤᠳᠠ᠂ ᠳ᠋ᠠᠲ᠋ᠦ᠋ᠡᠭ᠂ ᠴᠢᠭᠤᠯᠤᠯᠳᠤ ᠬᠤᠳᠠ ᠵᠡᠷᠭᠡ ᠶᠢᠨ ᠭᠠᠵᠠᠷ ᠮᠢᠬ᠎ᠠ ᠶᠠᠰᠤᠨ ᠳᠤ ᠳᠤᠯᠤᠭᠰᠠᠨ ᠬᠦᠨᠳᠤ ᠦᠴᠢᠭ ᠢ ᠵᠢᠯ ᠢᠯᠡᠬᠦᠦ ᠡᠳ᠋ᠯᠠᠨ ᠵᠤᠪᠠᠭᠰᠠᠨ ᠪᠤᠯᠪᠠᠴᠦ ᠬᠤᠪᠢᠰᠬᠠᠯ ᠢᠶᠠᠨ ᠬᠤᠳᠠᠯᠳᠤᠨ ᠦᠢᠯᠡᠰ ᠢᠶᠠᠨ ᠵᠠᠳᠠᠷᠠᠭᠤᠯᠬᠤ ᠶᠢ ᠶᠡᠷᠤ ᠰᠡᠳᠬᠢᠭᠰᠡᠨ ᠦᠭᠡᠢ ᠪᠠᠶᠢᠵᠠᠢ᠃ ᠳᠡᠬᠦᠨ ᠤ ᠠᠵᠢᠯᠯᠠᠭ᠎ᠠ ᠪᠠᠷ ᠭᠠᠷᠤᠭᠰᠠᠨ ᠨᠦᠬᠦᠳ ᠢᠶᠠᠨ ᠡᠬᠦᠪᠡᠷ ᠪᠠᠶᠢᠳᠠᠭ ᠢ ᠰᠤᠨᠤᠷ ᠰᠡᠷᠬᠦᠯᠠᠩ ᠵᠠᠯᠠᠭᠤ ᠬᠤᠪᠢᠰᠬᠠᠯᠴᠢ ᠮᠢᠨᠢ ᠰᠤᠨᠤᠰᠴᠦ᠂ ᠭᠤᠮᠢᠨᠳᠠᠩ ᠤᠨ ᠤᠷᠤᠨ ᠳᠤᠭ᠎ᠠ ᠪᠠᠨ ᠪᠦᠭᠯᠡᠬᠦ ᠪᠠᠷ ᠪᠤᠤᠴᠠᠩ ᠳᠤ ᠢᠯᠡᠭᠡᠭᠰᠡᠨ ᠢ ᠳᠠᠯᠢᠮᠳᠠᠭᠤᠯᠤᠨ ᠮᠠᠨ ᠤ ᠳ᠋ᠢᠸᠢᠽᠢ ᠳᠤ ᠡᠨᠡ ᠵᠢᠯ ᠤᠨ ᠨᠢᠭᠡᠳᠦᠭᠡᠷ ᠰᠠᠷ᠎ᠠ ᠶᠢᠨ ᠢᠷᠡᠭᠰᠡᠨ ᠶᠤᠮ᠃ ᠳᠠᠶᠢᠨ ᠬᠦ ᠱᠲ᠋ᠠᠪᠴᠢᠨ ᠠᠴᠠ ᠪᠠᠨ ᠰᠤᠮᠤᠨ ᠳᠠᠷᠤᠭ᠎ᠠ ᠳᠤ ᠰᠢᠯᠵᠢᠨ ᠳᠤᠯᠤᠯᠳᠤᠭᠠᠨ ᠪᠦᠷᠢ ᠯᠠ ᠭᠠᠪᠰᠢᠭᠠᠢ ᠪᠤᠶᠤ ᠬᠠᠶᠢᠭᠤᠯ ᠳᠤ ᠵᠢᠳᠬᠦᠵᠦ ᠪᠠᠶᠢᠭᠰᠠᠨ ᠢ ᠪᠢᠳᠡ ᠮᠡᠳᠡᠨ᠎ᠡ᠃ ᠦᠨᠡᠨᠪᠠᠳᠤ ᠪᠠᠭᠠᠳᠤᠷ ᠮᠢᠨᠢ ᠠᠷᠢᠭᠤᠨ ᠭᠡᠷᠢᠶᠠᠰ ᠦᠭᠡ ᠪᠠᠨ ᠦᠯᠡᠳᠡᠭᠡᠵᠠᠢ᠃ ᠤᠳᠤ ᠡᠨᠡ ᠬᠠᠭᠤᠳᠠᠰᠤᠨ ᠳᠤ ᠪᠢᠴᠢᠭᠰᠡᠨ ᠢ ᠳ᠋ᠢᠸᠢᠽᠢ ᠶᠢᠨ ᠤᠯᠤᠰ ᠳᠦᠷᠦ  ᠶᠢᠨ ᠭᠠᠵᠠᠷ ᠲᠤ ᠮᠡᠳᠡᠬᠦᠯᠦᠨ ᠠᠯᠪᠠᠨ ᠶᠤᠰᠤᠭᠠᠷ ᠵᠦᠪᠰᠢᠶᠡᠷᠡᠬᠦᠯᠬᠦ ᠶᠤᠮ᠃ ᠳᠡᠭᠡᠪᠠᠯ ᠦᠪᠦᠷ ᠮᠤᠩᠭᠤᠯ ᠤᠨ ᠹᠷᠤᠨ᠋ᠲ — ᠴᠠᠬᠠᠷ ᠨᠤᠳᠤᠭ ᠤᠨ ᠪᠤᠭᠤᠮᠳᠠ ᠪᠤᠯᠤᠭᠰᠠᠭᠠᠷ ᠪᠠᠶᠢᠭ᠎ᠠ ᠬᠠᠨ ᠬᠠᠶᠢᠷᠬᠠᠨ ᠳᠤ ᠤᠤᠯᠭᠠᠯᠠᠨ ᠳᠤᠪᠳᠤᠯᠤᠭᠰᠠᠨ ᠭᠤᠮᠢᠨᠳᠠᠩ ᠤᠨ ᠳᠡᠭᠡᠷᠡᠮ ᠲᠠᠢ ᠪᠠᠭᠠᠳᠤᠷᠯᠠᠨ ᠪᠠᠶᠢᠯᠳᠤᠵᠦ ᠨᠠᠰᠤ  ᠪᠠᠷᠠᠵᠠᠢ᠃ ᠳᠡᠬᠦᠨᠴᠢᠯᠠᠨ ᠠᠷᠠᠳ ᠳᠦᠮᠡᠨ ᠤ ᠨᠠᠶᠢᠳᠠᠪᠦᠷᠢ ᠶᠢ ᠶᠤᠰᠤᠴᠢᠯᠠᠨ ᠪᠡᠶᠡᠯᠡᠬᠦᠯᠦᠭᠰᠡᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠢᠯᠠᠩᠭᠤᠶ᠎ᠠ ᠡᠪ ᠬᠠᠮᠳᠤ ᠨᠠᠮ ᠤᠨ ᠰᠢᠯᠢᠳᠡᠭ ᠬᠡᠰᠢᠬᠦᠨ ᠤ ᠶᠤᠰᠤᠭᠠᠷ ᠨᠠᠮᠴᠢ ᠴᠢᠨᠠᠷ ᠢᠶᠠᠨ ᠦᠨᠡᠨ ᠪᠠᠳᠤ ᠲᠠᠢ ᠪᠠᠷ ᠦᠵᠡᠬᠦᠯᠵᠠᠢ᠃ ᠳᠡᠬᠦᠨ  ᠤ ᠠᠷᠢᠭᠤᠨ ᠦᠢᠯᠡᠰ ᠢ ᠵᠠᠯᠭᠠᠮᠵᠢᠯᠠᠨ ᠳᠡᠬᠦᠨ ᠤ ᠦᠰᠢᠶ᠎ᠠ ᠬᠤᠷᠤᠰᠤᠯ ᠢ ᠨᠡᠭᠡᠮᠵᠢᠯᠠᠨ ᠬᠦᠢᠴᠡᠳᠭᠡᠬᠦ ᠪᠠᠷ ᠪᠠᠭᠠᠳᠤᠷᠯᠠᠨ ᠪᠠᠶᠢᠯᠳᠤᠶ᠎ᠠ︕ ᠭᠡᠵᠦ ᠪᠢᠯᠡ᠃ ᠳᠡᠭᠡᠳᠡᠯ᠎ᠡ ᠠᠷᠪᠠᠨ ᠬᠤᠷᠤᠭᠤᠨ ᠤ ᠠᠯᠢᠨ ᠢ ᠤᠭᠳᠤᠯᠪᠠᠴᠦ ᠠᠶᠤᠤᠯᠢᠬᠠᠢ ᠰᠢᠮᠰᠢᠷᠠᠨ᠎ᠠ ᠭᠡᠳᠡᠭ ᠢᠶᠠᠷ ᠮᠠᠨ ᠤ ᠫᠠᠷᠲ᠋ᠢᠽᠠᠨ ᠤ ᠬᠢᠨ ᠦᠪᠡᠷ ᠤᠨ ᠳᠠᠶᠢᠴᠢᠨ ᠨᠦᠬᠦᠷ ᠠᠴᠠ ᠪᠠᠨ ᠦᠨᠢᠳᠡ ᠠᠩᠬᠢᠵᠢᠷᠠᠭᠰᠠᠨ ᠮᠡᠳᠦ ᠭᠠᠰᠢᠭᠤᠳᠠᠨ ᠪᠠᠶᠢᠪᠠ︕ ᠳᠡᠬᠦᠨ ᠤ ᠠᠮᠢᠳᠤ ᠰᠡᠷᠡᠬᠦᠨ ᠳᠡᠭᠡᠨ ᠶᠠᠷᠢᠳᠠᠭ ᠦᠭᠡ ᠶᠢ ᠪᠠ ᠨᠠᠰᠤ ᠪᠠᠷᠠᠬᠤ ᠶᠢᠨ ᠡᠮᠤᠨ᠎ᠠ ᠦᠵᠡᠬᠦᠯᠦᠭᠰᠡᠨ ᠠᠷᠢᠭᠤᠨ ᠦᠢᠯᠡᠰ ᠢ ᠰᠡᠳᠬᠢᠯ ᠳᠡᠭᠡᠨ ᠰᠢᠩᠭᠡᠭᠡᠨ ᠪᠤᠳᠤᠵᠦ ᠪᠠᠶᠢᠭᠰᠠᠨ ᠮᠢᠨᠤ ᠪᠡᠶ᠎ᠡ᠄ ᠳᠠᠯᠠᠶᠢᠭᠴᠢ ᠪᠠᠭᠠᠳᠤᠷ ᠦᠨᠡᠨᠪᠠᠳᠤ ᠮᠢᠨᠢ︕ ᠲᠠ ᠪᠤᠯ ᠬᠡᠯᠡᠳᠡᠭ ᠢᠶᠠᠨ ᠪᠡᠶᠡᠯᠡᠬᠦᠯᠵᠠᠢ᠃ ᠳᠡᠷᠡ ᠠᠭᠰᠠᠨ ᠳᠤ ᠠᠭᠤᠳᠠᠮ ᠳᠠᠯᠪᠢᠭᠤ ᠪᠠᠷ ᠪᠠᠶᠢᠯᠳᠤᠨ᠄ ︽ᠳᠦᠷᠦᠭᠰᠡᠨ ᠨᠢ ᠠᠭᠤᠤ᠂ ᠦᠬᠦᠭᠰᠡᠨ ᠨᠢ ᠠᠯᠳᠠᠷᠳᠠᠢ︾ ᠭᠡᠳᠡᠭ ᠢ ᠦᠵᠡᠬᠦᠯᠵᠠᠢ᠃ ᠴᠢᠨᠤ ᠮᠦᠡᠭᠭᠡ ᠳᠠᠭᠤᠷᠢᠰᠬᠠᠯᠳᠠᠢ ᠦᠢᠯᠡᠰ ᠴᠤᠬᠠᠭ ᠳᠡᠭᠡᠳᠦ ᠦᠵᠡᠯ ᠰᠤᠷᠳᠠᠯ ᠴᠢᠨᠢ ᠮᠢᠨᠤ ᠬᠠᠯᠠᠭᠤᠨ ᠴᠢᠰᠤ ᠶᠢ ᠡᠷᠬᠢᠯᠳᠤᠵᠦ ᠪᠠᠶᠢᠭᠰᠠᠨ ᠴᠠᠭ ᠲᠤ ᠨᠠᠳᠠ ᠰᠦᠯᠳᠠ ᠪᠤᠯᠤᠭ︕ ᠨᠠᠮ᠂ ᠠᠷᠠᠳ ᠳᠦᠮᠡᠨ᠂ ᠡᠭᠡ ᠤᠷᠤᠨ ᠤ ᠪᠠᠨ ᠡᠮᠤᠨ᠎ᠠ ᠴᠢᠮ᠎ᠠ ᠰᠢᠭ᠋ ᠰᠢᠯᠭᠠᠭᠤᠯᠬᠤ ᠳᠤ ᠪᠦᠷ ᠪᠡᠯᠡᠭᠡᠨ︕ ᠭᠡᠵᠦ ᠠᠮᠠᠯᠳᠠᠵᠦ ᠪᠠᠶᠢᠯ᠎ᠠ ᠭᠡᠳ ᠳᠠᠮᠪᠢ ᠶᠢ ᠰᠡᠬᠦᠷᠠᠰᠤ ᠠᠯᠳᠠᠬᠤ ᠪᠠᠷ ᠰᠠᠨᠳᠤᠷᠤᠭᠰᠠᠨ ᠰᠠᠮᠪᠠ ᠶᠠᠭᠠᠬᠢᠭᠰᠠᠨ ᠶᠤᠮ᠂ ᠬᠠᠷᠢᠭᠤ ᠳᠤᠨᠢ᠄ — ᠳᠠᠮᠪᠢ ᠭᠤᠸᠠᠢ ᠳᠠᠤᠯᠠᠢ ᠶᠢᠨ ᠭᠤᠤᠯ ᠳᠤ ᠳᠡᠷᠡ ᠳ᠋ᠢᠸᠢᠽᠢ ᠶᠢᠨ ᠰᠦᠢᠳᠦᠭᠰᠡᠨ ᠴᠢᠨᠢ ᠨᠠᠮᠤᠷ ᠤᠨ ᠬᠢᠨᠢ ᠬᠡᠷᠡᠭ ᠪᠢᠵᠠ︖ ᠭᠡᠪᠡ᠃ — ᠳᠡᠶᠢᠮᠤ᠂ ᠰᠠᠮᠪᠠ ᠮᠢᠨᠢ︕ ᠶᠠᠭᠤ ᠪᠤᠢ︖ — ᠳᠡᠷᠡ ᠨᠠᠮᠤᠷ᠂ ᠰᠢᠷᠬ᠎ᠠ ᠲᠠᠢ ᠬᠠᠷᠢᠵᠦ ᠢᠷᠡᠭᠰᠡᠨ ᠨᠠᠭᠠᠴᠦ ᠠᠬ᠎ᠠ ᠮᠢᠨᠢ ᠨᠠᠳᠠ ᠶᠠᠷᠢᠭᠰᠠᠨ ᠶᠤᠮ ᠭᠡᠵᠦ ᠨᠢᠯᠪᠤᠰᠤ ᠡᠷᠬᠢᠯᠳᠤᠬᠦᠯᠦᠨ ᠬᠡᠯᠡᠵᠠᠢ᠃ — ᠨᠠᠭᠠᠴᠦ ᠭᠡᠭᠡ ᠲᠠᠢ ᠴᠢᠨᠢ ᠠᠭᠤᠯᠵᠠᠪᠠᠯ ᠳᠡᠬᠦᠨ ᠤ ᠳᠤᠬᠠᠢ ᠮᠡᠳᠡᠨ᠎ᠡ ᠪᠠᠶᠢᠨ᠎ᠠ ᠰᠢᠥ᠃ — ᠨᠠᠭᠠᠴᠦ ᠮᠢᠨᠢ ᠳᠡᠷᠡ ᠴᠢᠭ ᠢᠶᠠᠷ ᠢᠶᠠᠨ ᠰᠢᠷᠬ᠎ᠠ ᠪᠠᠨ ᠳᠠᠭᠠᠭᠠᠭᠰᠠᠨ ᠦᠭᠡᠢ ᠪᠠᠷ ᠨᠠᠰᠤ ᠪᠠᠷᠠᠭᠰᠠᠨ ᠪᠢᠯᠡ᠃ ᠳᠠᠨ ᠤ ᠶᠠᠷᠢᠵᠦ ᠪᠠᠶᠢᠭ᠎ᠠ ᠦᠨᠡᠨᠪᠠᠳᠤ ᠪᠠᠭᠠᠳᠤᠷ ᠢ ᠳᠤᠷᠠᠰᠤᠭᠠᠳ ᠳᠡᠷᠡ ᠦᠭᠡᠢ ᠪᠤᠯ ᠳᠡᠬᠡᠳᠦᠬᠦᠯᠡ ᠶᠢᠨ ᠢᠶᠠᠨ ᠶᠠᠹᠠᠨ ᠳᠤ ᠶᠠᠰᠤ ᠳᠠᠯᠪᠢᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠳ ᠶᠠᠷᠢᠳᠠᠭ ᠢ ᠮᠠᠷᠳᠠᠭᠠᠳᠤᠢ ᠪᠠᠶᠢᠨ᠎ᠠ᠃ — ᠳᠡᠶᠢᠮᠤ᠂ ᠳᠡᠭᠡᠪᠠᠯ ᠳᠡᠷᠡ ᠤᠳᠠᠭ᠎ᠠ ᠳᠠᠶᠢᠰᠤᠨ ᠤ ᠮᠠᠰᠢᠨ ᠳᠤ ᠠᠪᠳᠠᠬᠤ ᠰᠢᠬᠠᠭᠰᠠᠨ ᠬᠤᠷᠢᠶ᠎ᠠ ᠶᠠᠮᠤᠨ ᠢᠶᠠᠨ ᠦᠨᠡᠨᠪᠠᠳᠤ ᠪᠤᠯ ᠮᠡᠨᠳᠤ ᠭᠠᠷᠭᠠᠭᠰᠠᠨ ᠢ ᠬᠡᠯᠡᠭᠰᠡᠨ ᠪᠠᠶᠢᠯᠬᠦᠢ᠃ — ᠪᠠᠭᠠᠳᠤᠷᠯᠢᠭ ᠰᠦᠰᠦᠷᠭᠡᠭ ᠳᠠᠷᠤᠭ᠎ᠠ ᠪᠠᠶᠢᠯ᠎ᠠ ᠭᠡᠳᠡᠭ᠃ ᠳᠡᠷᠡ ᠨᠠᠮᠤᠷ ᠳᠠᠶᠢᠰᠤᠨ ᠤ ᠮᠠᠰᠢᠨ ᠢ ᠦᠪᠡᠷ ᠢᠶᠠᠨ ᠪᠦᠭᠯᠡᠨ ᠬᠠᠰᠢᠵᠦ᠂ ᠬᠤᠷᠢᠶ᠎ᠠ ᠶᠠᠮᠤᠨ ᠤ ᠬᠤᠯᠪᠤᠭᠠᠴᠢᠳ ᠳᠤ ᠪᠠᠶᠢᠭᠰᠠᠨ ᠮᠢᠨᠤ ᠨᠠᠭᠠᠴᠦ ᠠᠬ᠎ᠠ ᠶᠢ ᠰᠢᠷᠬᠠᠳᠤᠭᠠᠳ ᠪᠠᠶᠢᠬᠤ ᠳᠤ ᠳᠦᠡᠭᠭᠡᠵᠦ ᠠᠮᠢᠳᠤ ᠭᠠᠷᠭᠠᠯ᠎ᠠ ᠭᠡᠳᠡᠭ ᠶᠤᠮ᠃ — ᠳᠡᠷᠡ ᠦᠶ᠎ᠠ ᠬᠠᠨ ᠬᠠᠶᠢᠷᠬᠠᠨ ᠤ ᠤᠷᠴᠢᠮ ᠤᠨ ᠮᠠᠯᠴᠢᠳ ᠡᠩᠬᠦᠷᠠᠢ ᠪᠠᠭᠠᠳᠤᠷ ᠤᠨ ᠢᠶᠠᠨ ᠠᠷᠢᠭᠤᠨ ᠦᠢᠯᠡᠰ  ᠢ ᠬᠦᠨᠳᠤᠳᠭᠡᠨ ᠡᠷᠬᠦᠮᠵᠢᠯᠡᠬᠦ ᠭᠡᠯ᠎ᠡ᠃ ᠦᠪᠦᠷ ᠮᠤᠩᠭᠤᠯ ᠤᠨ ᠨᠠᠮ ᠤᠨ ᠬᠤᠷᠢᠶ᠎ᠠ ᠠᠴᠠ ᠴᠤᠬᠤᠯᠠᠨ ᠪᠠᠳᠤᠯᠠᠵᠦ ᠪᠢᠯᠡ᠃ ᠪᠠᠰᠠ ᠦᠨᠡᠨᠪᠠᠳᠤ ᠶᠢᠨ ᠱᠠᠷᠢᠯ ᠢ ᠤᠯᠠᠭᠠᠬᠤᠳᠠ ᠳᠠᠬᠢ ᠦᠷᠡᠭᠳᠡᠭᠰᠡᠨ ᠪᠠᠭᠠᠳᠤᠷ ᠤᠨ ᠰᠤᠪᠤᠷᠭ᠎ᠠ ᠳᠤ ᠰᠢᠯᠵᠢᠬᠦᠯᠦᠨ ᠦᠪᠦᠷ ᠮᠤᠩᠭᠤᠯ ᠤᠨ ᠰᠢᠯᠢᠳᠡᠭ ᠬᠦᠪᠡᠬᠦᠳ ᠤᠨ ᠠᠯᠳᠠᠨ ᠬᠠᠭᠤᠳᠠᠰᠤᠨ᠎ᠠ ᠦᠨᠢᠳᠡ ᠳᠡᠮᠳᠡᠭᠯᠡᠪᠡ᠃ ᠡᠷᠭᠡ ᠴᠢᠯᠦᠭᠡᠨ ᠤ ᠳᠡᠮᠡᠴᠡᠯ ᠤᠨ ᠭᠡᠷᠡᠴᠢ ᠠᠰᠢᠳᠠ ᠶᠢᠨ ᠮᠠᠭᠳᠠᠭᠠᠯ ᠤᠨ ᠤᠬᠢ ᠪᠤᠯᠤᠭᠰᠠᠨ ᠦᠨᠡᠨᠪᠠᠳᠤ ᠶᠢᠨ ᠦᠢᠯᠡ ᠶᠠᠪᠤᠳᠠᠯ ᠪᠠ ᠬᠠᠨ ᠬᠠᠶᠢᠷᠬᠠᠨ ᠤ ᠠᠤᠭ᠎ᠠ ᠰᠦᠷᠯᠢᠭ ᠨᠢ ᠬᠤᠤᠰᠯᠠᠨ ᠰᠢᠯᠦᠭᠯᠡᠭᠳᠡᠵᠦ ᠪᠠᠶᠢᠨ᠎ᠠ᠃ ᠮᠠᠨ ᠤ ᠠᠷᠠᠳ ᠳᠦᠮᠡᠨ ᠦᠪᠡᠷ ᠤᠨ ᠰᠢᠳᠦᠭᠡᠨ ᠪᠤᠯᠤᠭᠰᠠᠨ ᠬᠠᠨ ᠬᠠᠶᠢᠷᠬᠠᠨ ᠢᠶᠠᠨ ᠪᠠᠭᠠᠳᠤᠷ ᠤᠨ ᠢᠶᠠᠨ ᠨᠡᠷ᠎ᠡ ᠪᠠᠷ ᠨᠡᠷᠡᠶᠢᠳᠦᠭᠡᠳ ᠬᠠᠨᠤᠭᠰᠠᠨ ᠦᠭᠡᠢ ᠤᠳᠤ ᠰᠢᠯᠤᠭᠤᠨ ᠴᠠᠭᠠᠨ ᠬᠤᠰᠢᠭᠤᠨ ᠤ ᠶᠡᠭᠡᠨᠭᠬᠢ ᠨᠤᠳᠤᠭ ᠢ ᠬᠠᠮᠤᠷᠤᠭᠰᠠᠨ ᠵᠠᠬᠢᠷᠭ᠎ᠠ ᠦᠨᠡᠨᠪᠠᠳᠤ ᠰᠤᠮᠤ ᠭᠡᠰᠡᠨ ᠨᠢ ᠳᠠᠪᠬᠤᠷ ᠤᠳᠬ᠎ᠠ ᠲᠠᠢ ᠶᠤᠮ᠃ ᠬᠤᠶᠠᠭᠤᠯᠠ ᠠᠷᠠᠳ ᠤᠨ ᠵᠦᠪᠯᠠᠯ ᠳᠤ ᠰᠠᠨᠠᠯ ᠳᠠᠯᠪᠢᠵᠦ᠂ ᠳᠡᠷᠡ ᠰᠤᠮᠤᠨ ᠳᠤ ᠠᠵᠢᠯᠯᠠᠬᠤ ᠪᠠᠷ ᠭᠤᠶᠤᠶ᠎ᠠ᠃ ᠠᠶᠢᠮᠠᠭ᠂ ᠤᠷᠤᠨ᠂ ᠤᠯᠤᠰ ᠲᠠᠭᠠᠨ ᠡᠷᠬᠦᠮᠵᠢᠯᠡᠭᠳᠡᠭᠰᠡᠨ ᠦᠨᠡᠨᠪᠠᠳᠤ ᠠᠭᠤᠯᠠ ᠶᠢᠨ ᠨᠤᠶᠠᠨ ᠤᠷᠬᠢᠯ ᠳᠤ ᠭᠠᠷᠴᠦ ᠪᠠᠶᠢᠭᠠᠳ ᠡᠵᠡᠨ ᠤ ᠬᠢᠨᠢ ᠳᠤᠬᠠᠢ ᠳᠠᠬᠢᠵᠦ ᠶᠠᠷᠢᠯᠴᠠᠶ᠎ᠠ᠃ ᠴᠤᠬᠤᠮ ᠦᠭᠡᠨ ᠠᠴᠠ ᠪᠤᠯᠵᠦ ᠪᠠᠶᠢᠭᠠᠳ᠂ ᠦᠨᠡᠨᠪᠠᠳᠤ ᠰᠤᠮᠤᠨ ᠳᠤ ᠢᠷᠠᠵᠠᠢ᠃ — ᠨᠡᠭᠡᠷᠡᠨ ᠡᠷ᠎ᠡ ᠬᠦᠮᠦᠨ ᠤ ᠵᠤᠷᠢᠭ ᠪᠠᠳᠠᠷᠠᠮ᠎ᠠ ᠦᠯᠢᠭᠡᠷ ᠲᠤ᠂ ᠡᠨᠡ ᠵᠠᠮ ᠤᠨ ᠬᠤᠯᠠ ᠶᠢ ᠠᠩᠵᠢᠶᠠᠷᠠᠭᠰᠠᠨ ᠦᠭᠡᠢ ᠪᠠᠷ ᠶᠠᠪᠤᠯ᠎ᠠ᠃ ᠤᠷᠬᠢᠯ ᠳᠤᠨᠢ ᠭᠠᠷᠬᠤ ᠦᠭᠡᠢ ᠴᠦ ᠭᠡᠰᠡᠨ ᠳᠡᠷᠭᠡᠳᠡ ᠨᠢ ᠬᠦᠷᠴᠦ ᠯᠠᠪᠯᠠᠨ ᠬᠠᠷᠠᠭᠠᠳ ᠳᠠᠬᠢᠨ ᠬᠡᠯᠡᠬᠦᠯᠦᠨ᠎ᠡ ᠭᠡᠰᠡᠨ ᠰᠡᠮᠪᠠ ᠮᠤᠷᠢᠨ ᠳᠤ ᠴᠠᠭᠠᠷᠠᠭᠰᠠᠨ ᠠᠴᠠ ᠦᠦ︖ ᠦᠷᠯᠦᠭᠡᠬᠦᠷ ᠪᠤᠳᠤᠯᠢᠭᠰᠠᠨ ᠦᠭᠡᠢ ᠰᠢᠭ ᠢᠶᠠᠷ ᠤᠡᠭᠭᠤᠷᠠᠶᠢᠳᠤᠨ ᠳᠦᠷᠦᠬᠦᠯᠡᠵᠠᠢ᠃ ᠰᠠᠮᠪᠠ ᠶᠢᠨ ᠴᠢᠰᠤ ᠬᠠᠯᠠᠭᠤᠷᠠᠨ ᠪᠠᠭᠠᠳᠤᠷ ᠤᠨ ᠦᠯᠢᠭᠡᠷ ᠲᠤ ᠤᠮᠤᠭᠰᠢᠭᠰᠠᠨ ᠢ ᠦᠵᠡᠭᠡᠳ ᠪᠠᠶᠠᠷᠯᠠᠭᠰᠠᠨ ᠳᠠᠮᠪᠢ ᠠᠷᠤ ᠠᠴᠠ ᠨᠢ ᠱᠠᠯᠠᠪᠳᠠᠨ ᠮᠤᠷᠢ ᠪᠠᠨ ᠬᠠᠳᠠᠷᠢᠭᠤᠯᠪᠠ
 
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠡᠭᠡ ᠤᠷᠤᠨ ᠤ ᠮᠢᠨᠢ ᠬᠠᠶᠢᠷᠠᠯᠠᠭᠰᠠᠨ᠁
ᠪᠤᠯᠠᠭᠠᠨᠳᠤᠬᠤᠢ
ᠦᠨᠳᠤᠰᠤᠳᠡᠨ ᠤ ᠪᠦᠵᠢᠭᠳᠦ ᠵᠦᠴᠦᠭᠡ ︽ᠮᠢᠩᠭᠠᠳᠤ︾
ᠣᠳᠬ᠎ᠠ ᠣᠷᠠᠯᠢᠭ ᠤᠨ ᠠᠮᠵᠢᠯᠳᠠ
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号