ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠴᠠᠬᠠᠷ ᠰᠣᠶᠣᠯ
ᠬᠤᠨᠢ ︵ᠦᠭᠦᠯᠡᠯᠭᠡ︶          — ᠡᠷᠳᠡᠨᠢᠳᠤᠭᠳᠠᠬᠤ ᠵᠤᠬᠢ᠊
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/2/24
 ᠬᠤᠨᠢ ︵ᠦᠭᠦᠯᠡᠯᠭᠡ︶          — ᠡᠷᠳᠡᠨᠢᠳᠤᠭᠳᠠᠬᠤ ᠵᠤᠬᠢᠶᠠᠪᠠ     ᠪᠤᠷᠤᠨᠢᠳᠤᠨ ᠪᠠᠭ᠎ᠠ ᠳᠤ ᠪᠠᠨ ᠬᠤᠨᠢᠨ ᠠᠴᠠ ᠶᠡᠭᠡ ᠠᠶᠤᠳᠠᠭ ᠬᠡᠥᠭᠡᠳ ᠪᠠᠶᠢᠵᠠᠢ᠃ ᠬᠤᠷᠠᠭᠠᠨ ᠠᠷᠠᠰᠤᠨ ᠬᠤᠴᠢᠯᠭ᠎ᠠ ᠪᠠᠨ ᠬᠠᠷᠠᠭᠰᠠᠭᠠᠷ ᠪᠠᠶᠢᠵᠦ ᠨᠢᠳᠤ ᠨᠢ ᠰᠢᠯᠤᠨ ᠪᠦᠮᠪᠦᠭᠡ ᠰᠢᠭ ᠳᠤᠭᠳᠠᠴᠢᠬᠠᠬᠤ ᠪᠦᠭᠡᠳ ᠬᠡᠨᠡᠳᠳᠡ ᠯᠠ ᠬᠠᠷᠠᠭᠰᠠᠨ ᠶᠠᠭᠤᠮᠠᠨ ᠠᠴᠠ ᠪᠠᠨ ᠠᠶᠤᠨ ᠴᠢᠴᠢᠭ᠎ᠠ ᠠᠯᠳᠠᠳᠠᠯ᠎ᠠ ᠤᠬᠢᠯᠠᠨ᠎ᠠ᠃ ᠡᠬᠦᠳᠡ ᠪᠠᠷ ᠬᠤᠨᠢ ᠱᠠᠭᠠᠶᠢᠵᠦ ᠪᠠᠶᠢᠬᠤ ᠶᠢ ᠦᠵᠡᠭᠰᠡᠭᠡᠷ ᠯᠠ ᠠᠶᠤᠬᠤ ᠳᠤ ᠪᠠᠨ ᠨᠢᠳᠤ ᠪᠠᠨ ᠳᠠᠭᠯᠠᠨ ᠪᠠᠷᠬᠢᠷᠠᠵᠦ ᠠᠪᠤ ᠡᠵᠢ ᠪᠠᠨ ᠰᠠᠨᠳᠤᠷᠭᠠᠬᠤ ᠠᠵᠢ᠃     ᠠᠪᠤ ᠨᠢ ᠠᠷᠭ᠎ᠠ ᠶᠠᠳᠠᠬᠤ ᠳᠤ ᠪᠠᠨ ᠦᠵᠡᠯᠭᠡ ᠳᠤᠮ ᠬᠢᠳᠡᠭ ᠬᠦᠮᠦᠨ ᠳᠤ ᠬᠦᠷᠴᠦ ᠵᠤᠪᠠᠯᠠᠩ ᠢᠶᠠᠨ ᠳᠤᠭᠠᠴᠠᠬᠤ ᠳᠤ     — ᠬᠦᠦ ᠶᠢᠨ ᠴᠢᠨᠢ ᠰᠦᠨᠡᠰᠦ ᠶᠡᠷᠤ ᠪᠤᠰᠤ ᠶᠢᠨ ᠠᠷᠢᠭᠤᠨ ᠶᠤᠮ ᠪᠠᠶᠢᠨ᠎ᠠ᠂ ᠨᠡᠷ᠎ᠡ ᠶᠢ ᠨᠢ ᠰᠤᠯᠢᠵᠦ᠂ ᠠᠶᠤᠭᠰᠠᠨ ᠶᠠᠭᠤᠮᠠᠨ ᠤ ᠬᠢᠨᠢ ᠨᠡᠷ᠎ᠡ ᠪᠠᠷ ᠨᠡᠷᠡᠯᠡᠪᠠᠯ ᠰᠠᠶᠢᠨ ᠪᠤᠯᠤᠨ᠎ᠠ︕ ᠬᠡᠰᠡᠨ ᠢᠶᠠᠷ ᠳᠡᠬᠦᠨ  ᠳᠤ ᠪᠤᠷᠤᠨᠢᠳᠤᠨ ᠬᠡᠭᠴᠢ ᠨᠡᠷ᠎ᠡ ᠦᠭᠬᠦᠭᠰᠡᠨ ᠪᠠᠶᠢᠪᠠ᠃    ᠨᠡᠷ᠎ᠡ ᠶᠢ ᠨᠢ ᠰᠤᠯᠢᠭᠰᠠᠨ ᠠᠴᠠ ᠬᠤᠶᠢᠰᠢ ᠪᠤᠷᠤᠨᠢᠳᠤᠨ ᠬᠤᠨᠢᠨ ᠠᠴᠠ ᠠᠶᠤᠬᠤ ᠪᠠᠨ ᠪᠤᠯᠢᠵᠦ᠂ ᠬᠤᠨᠢᠨ ᠤ ᠰᠡᠬᠦᠯ ᠢ ᠠᠮᠳᠠᠷᠬᠠᠨ ᠬᠦᠬᠦᠵᠦ ᠨᠡᠩ ᠴᠤ ᠬᠤᠨᠢᠨ ᠤ ᠪᠦᠭᠡᠷ᠎ᠡ ᠶᠢ ᠪᠤᠯ ᠴᠢᠨᠠᠵᠦ ᠪᠤᠯᠤᠭ᠎ᠠ ᠦᠭᠡᠢ ᠪᠠᠶᠢᠳᠠᠯ᠎ᠠ ᠢᠳᠡᠨ᠎ᠡ ᠬᠡᠵᠦ ᠤᠷᠢᠯᠠᠨ᠎ᠠ᠃     ᠪᠤᠷᠤᠨᠢᠳᠤᠨ᠂ ᠠᠷᠪᠠ ᠬᠦᠷᠬᠦ ᠳᠤ ᠯᠠ ᠬᠤᠨᠢ ᠳᠦᠰᠢᠵᠦ ᠦᠭᠬᠦ ᠴᠢᠳᠠᠯ ᠲᠠᠢ ᠪᠤᠯᠪᠠ᠃ ᠬᠡᠬᠦ ᠳᠡᠭᠡᠨ ᠬᠤᠨᠢ ᠳᠦᠰᠢᠬᠦ ᠪᠤᠯ ᠳᠡᠬᠦᠨ ᠤ ᠬᠠᠮᠤᠭ ᠤᠨ ᠬᠢᠬᠦ ᠳᠤᠷ᠎ᠠ ᠦᠭᠡᠢ ᠠᠵᠦ ᠨᠢ ᠶᠤᠮ᠃ ᠡᠨ᠋ᠨ ᠬᠡᠥᠭᠡᠳ ᠭᠠᠷ ᠲᠠᠭᠠᠨ ᠴᠢᠰᠤ ᠪᠢᠯᠳᠠᠬᠤ ᠳᠤᠷ᠎ᠠ ᠦᠭᠡᠢ ᠮᠦᠷᠳᠡᠭᠡᠨ ᠰᠡᠪᠡᠰᠦ ᠪᠠᠭᠠᠰᠤ᠂ ᠴᠢᠰᠤᠨ ᠤ ᠦᠨᠦᠷ ᠲᠤ ᠳᠤᠳᠤᠷ᠎ᠠ ᠪᠤᠯᠬᠢᠬᠤ ᠶᠢ ᠶᠠᠭᠠᠬᠢᠶ᠎ᠠ ᠃ ᠳᠡᠭᠡᠪᠡᠴᠦ ᠦᠭᠡᠷ᠎ᠠ ᠬᠦᠮᠦᠨ ᠤᠯᠳᠠᠬᠤ ᠦᠭᠡᠢ ᠪᠤᠯᠬᠤᠷ ᠡᠨ᠋ᠨ ᠠᠵᠦ ᠨᠢ ᠳᠡᠬᠦᠨ ᠳᠤ ᠠᠷᠭ᠎ᠠ ᠦᠭᠡᠢ ᠤᠨᠤᠭᠳᠠᠨ᠎ᠠ᠃ ᠳᠡᠳᠡᠨ ᠤ ᠬᠤᠳᠠᠨ ᠳᠤ ᠬᠦᠬᠡᠪᠤᠬ᠎ᠠ ᠬᠡᠭᠴᠢ ᠮᠠᠯ ᠵᠠᠷᠤᠳᠠᠭ ᠬᠦᠮᠦᠨ ᠪᠠᠶᠢᠳᠠᠭ᠃ ᠡᠨ᠋ᠨ ᠬᠦᠮᠦᠨ ᠤ ᠠᠵᠢᠯᠯᠠᠬᠤ ᠬᠡᠭᠴᠢ ᠬᠤᠷᠳᠤᠨ᠂ ᠬᠤᠨᠢ ᠪᠠᠨ ᠤᠨᠠᠭᠠᠮᠠᠭᠴᠠ ᠯᠠ ᠦᠷᠦᠴᠢᠯᠠᠨ᠎ᠠ᠂ ᠭᠠᠷ ᠢᠶᠠᠨ ᠤᠷᠤᠭᠤᠯᠵᠦ ᠭᠤᠤᠯ  ᠢ ᠨᠢ ᠳᠠᠰᠤᠯᠠᠮᠠᠭᠴᠠ ᠯᠠ ᠬᠤᠨᠢ ᠨᠢ ᠦᠬᠦᠴᠢᠭᠡᠳᠡᠭ᠃ ᠳᠡᠬᠦᠨ ᠤ ᠵᠠᠷᠤᠭᠰᠠᠨ ᠮᠠᠯ᠂ ᠦᠭᠡᠷ ᠬᠤᠨᠢ ᠬᠡᠰᠡᠨ ᠦᠭᠡᠢ ᠶᠠᠭᠠᠬᠢᠵᠦ ᠴᠦ ᠠᠮᠵᠢᠯ ᠦᠭᠡᠢ ᠬᠤᠷᠳᠤᠨ ᠦᠬᠦᠨ᠎ᠠ᠃ ᠳᠡᠭᠡᠭᠡᠳ ᠬᠡᠳᠦᠭᠡᠨ ᠨᠢᠳᠤᠷᠠᠮᠠᠭᠴᠠ ᠯᠠ ᠠᠷᠠᠰᠦ ᠶᠢ ᠨᠢ ᠦᠪᠴᠢᠵᠦ ᠶᠠᠭᠤ ᠶᠠᠭᠤ ᠦᠭᠡᠢ ᠬᠦᠵᠡᠭᠡ ᠶᠢ ᠨᠢ ᠭᠠᠷᠭᠠᠴᠢᠬᠠᠭᠰᠠᠨ ᠪᠠᠶᠢᠳᠠᠭ᠃ ᠪᠤᠷᠤᠨᠢᠳᠤᠨ ᠠᠳᠡ ᠳᠡᠨᠳᠡ ᠨᠢ ᠭᠠᠷᠴᠦ ᠳᠦᠰᠢᠵᠦ ᠦᠭᠬᠦᠨ᠎ᠡ᠃ ᠭᠠᠷ ᠲᠠᠭᠠᠨ ᠴᠢᠰᠤ ᠪᠢᠯᠳᠠᠬᠤ  ᠠᠴᠠ ᠬᠢᠴᠢᠶᠠᠨ ᠬᠦᠨᠳᠡᠶᠢᠭᠡᠨ ᠪᠠᠷᠢᠨ᠎ᠠ᠃      ᠬᠦᠬᠡᠪᠤᠬ᠎ᠠ ᠤᠴᠠᠭᠠᠷᠳᠠᠵᠦ      — ᠮᠢᠬ᠎ᠠ ᠢᠳᠡᠵᠦ ᠴᠢᠳᠠᠨ᠎ᠠ ᠦᠦ︖ ᠬᠡᠵᠦ ᠵᠠᠩᠨᠠᠨ᠎ᠠ᠃    ᠬᠦᠬᠡᠪᠤᠬ᠎ᠠ ᠮᠠᠯ ᠵᠠᠷᠤᠬᠤ ᠳᠤ ᠪᠠᠨ ᠰᠠᠶᠢᠨ ᠮᠦᠷᠳᠡᠭᠡᠨ ᠢᠳᠡᠭᠡ ᠵᠤᠭᠤᠭᠯᠠᠬᠤ ᠳᠤ ᠪᠠᠨ ᠴᠤ ᠰᠠᠶᠢᠨ᠃ ᠦᠭᠡᠬᠦ ᠴᠢᠰᠤ ᠨᠠᠭᠠᠯᠳᠤᠭᠰᠠᠨ ᠬᠢᠳᠤᠭ᠎ᠠ ᠪᠠᠨ ᠭᠤᠳᠤᠯ ᠤᠨ ᠳᠦᠷᠠᠢ ᠳᠤ ᠪᠠᠨ ᠬᠡᠳᠦ ᠦᠷᠦᠭᠡᠳ ᠯᠠ ᠤᠷᠤᠭᠰᠢ ᠰᠠᠭᠤᠪᠠᠯ ᠪᠦᠳᠦᠬᠦᠨ ᠦᠭᠡᠷ ᠤᠨ ᠠᠮᠠᠨ ᠬᠦᠵᠦᠬᠦᠦ᠂ ᠰᠡᠭᠡᠷ ᠬᠠᠪᠢᠷᠭ᠎ᠠ ᠲᠠᠢ ᠨᠢ ᠳᠠᠯᠪᠢᠭᠠᠳ ᠤᠷᠤᠭᠤᠯᠴᠢᠬᠠᠳᠠᠭ᠃ ᠳᠡᠭᠡᠭᠡᠳ ᠯᠠ ︽ᠤᠷᠢᠳᠤ ᠮᠠᠨ ᠤ ᠬᠢᠨ ᠳᠤ ᠨᠢᠭᠡ ᠵᠢᠩᠴᠢᠨ ᠪᠠᠶᠢᠭᠰᠠᠨ᠂ ᠠᠶᠠᠨ ᠵᠢᠩ ᠳᠤ ᠶᠠᠪᠤᠬᠤ ᠠᠴᠠ ᠡᠮᠤᠨ᠎ᠠ ᠰᠢᠳᠤᠯᠠᠩ ᠬᠤᠨᠢ ᠵᠠᠷᠤᠵᠦ ᠮᠢᠬ᠎ᠠ ᠶᠢ ᠨᠢ ᠪᠦᠬᠦᠨ ᠢ ᠢᠳᠡᠴᠢᠭᠡᠭᠡᠳ ᠱᠦᠯᠦᠨ ᠳᠤ ᠨᠢ ᠪᠠᠰᠠ ᠨᠢᠭᠡ ᠸᠠᠭᠠᠷ ᠭᠤᠯᠢᠷ ᠴᠢᠨᠠᠵᠦ ᠢᠳᠡᠴᠢᠭᠡᠭᠡᠳ ᠭᠠᠷᠪᠠᠯ ᠳᠤᠯᠤᠭᠠᠨ ᠬᠤᠨᠤᠭ ᠬᠡᠯᠡᠨ ᠳᠡᠭᠡᠷ᠎ᠡ ᠪᠠᠨ ᠬᠠᠷ᠎ᠠ ᠴᠠᠢ ᠠᠴᠠ ᠦᠭᠡᠷ᠎ᠡ ᠶᠠᠭᠤᠮ᠎ᠠ ᠳᠠᠯᠪᠢᠳᠠᠭ ᠦᠭᠡᠢ ᠁︾ ᠬᠡᠴᠢᠭᠡᠭᠰᠡᠨ ᠱᠦᠯᠦᠨ ᠳᠤ ᠴᠢᠨᠠᠭᠰᠠᠨ ᠭᠤᠯᠢᠷ ᠢ ᠬᠤᠨᠢ ᠦᠷᠬᠦᠮᠡᠷ ᠳᠠᠭᠤ ᠲᠠᠢ ᠬᠡᠭᠴᠢ ᠤᠭᠤᠴᠢᠨ᠎ᠠ᠃ ᠪᠤᠷᠤᠨᠢᠳᠤᠨ ᠪᠤᠯ ᠴᠢᠰᠤ ᠬᠠᠷᠠᠯ᠎ᠠ ᠯᠠ ᠬᠡᠪᠠᠯ ᠶᠠᠭᠤᠮ᠎ᠠ ᠢᠳᠡᠵᠦ ᠴᠢᠳᠠᠳᠠᠭ ᠦᠭᠡᠢ᠃ ᠬᠦᠵᠡᠭᠡ ᠴᠦᠯᠳᠤ ᠶᠢᠨ ᠪᠤᠴᠠᠯᠬᠤ ᠦᠨᠦᠷ  ᠢᠶᠠᠷ ᠤᠭᠰᠢᠭᠤᠯᠵᠦ ᠪᠦᠭᠡᠯᠵᠢᠭᠡᠳ ᠭᠠᠷᠤᠭᠠᠳ ᠶᠠᠪᠤᠨ᠎ᠠ᠃ ᠦᠯᠦᠰᠬᠦ ᠶᠢᠨ ᠡᠷᠭᠡᠨ ᠳᠤ ᠦᠳᠡᠰᠢ ᠨᠢ ᠵᠢᠭᠠᠯ ᠵᠢᠭᠤᠯ ᠰᠦ ᠤᠭᠤᠴᠢᠵᠦ᠂ ᠬᠤᠶᠠᠷ ᠭᠤᠷᠪᠠᠨ ᠬᠤᠨᠤᠭ ᠪᠤᠯᠤᠭᠠᠳ ᠱᠦᠯᠦ ᠬᠤᠭᠤᠯᠠᠨ ᠳᠤ ᠤᠷᠤᠳᠠᠭ ᠪᠠᠶᠢᠪᠠ᠃     ᠪᠤᠷᠤᠨᠢᠳᠤᠨ ᠤ ᠵᠠᠯᠠᠭᠤ ᠪᠠᠭ᠎ᠠ ᠨᠠᠰᠤᠨ ᠳᠠᠬᠢ ᠬᠠᠮᠤᠭ ᠤᠨ ᠬᠢᠬᠦ ᠳᠤᠷ᠎ᠠ ᠦᠭᠡᠢ ᠠᠵᠦ ᠪᠤᠯ  ᠬᠤᠨᠢ ᠳᠦᠰᠢᠬᠦ ᠠᠵᠦ ᠶᠤᠮ᠃ ᠳᠡᠭᠡᠬᠦ ᠳᠤ ᠬᠦᠬᠡᠪᠤᠬ᠎ᠠ ᠤᠤᠯ ᠤᠨ ᠠᠳᠠᠯᠢ ᠠᠶᠢᠯ ᠳᠤᠭᠤᠷᠢᠵᠦ ᠮᠠᠯ ᠵᠠᠷᠤᠵᠦ ᠮᠢᠬ᠎ᠠ ᠵᠤᠭᠤᠭᠯᠠᠴᠢᠬᠠᠭᠰᠠᠨ ᠶᠠᠪᠤᠨ᠎ᠠ᠃ ︽ᠬᠤᠨᠢ ᠦᠭᠡᠷ ᠤᠨ ᠠᠮᠢ ᠭᠤᠤᠯ ᠢ ᠳᠠᠰᠤᠯᠬᠤ ᠨᠢ ᠳᠡᠬᠦᠨ ᠤ ᠬᠠᠮᠤᠭ ᠤᠨ ᠬᠢᠬᠦ ᠳᠤᠷ᠎ᠠ ᠲᠠᠢ ᠠᠵᠢᠯ ᠨᠢ ᠪᠠᠶᠢᠬᠤ ᠡ ᠁︾ ᠬᠡᠵᠦ ᠪᠤᠷᠤᠨᠢᠳᠤᠨ ᠪᠤᠳᠤᠳᠠᠭ ᠪᠤᠯᠬᠤᠷ ᠬᠠᠷᠠᠬᠠᠨ ᠪᠠᠭ᠎ᠠ ᠠᠴᠠ ᠪᠠᠨ ᠬᠦᠬᠡᠪᠤᠬ᠎ᠠ ᠭᠡᠳᠡᠭ ᠬᠦᠮᠦᠨ ᠳᠤ ᠳᠠᠭᠠᠬᠦᠢ᠃ ᠨᠢᠭᠡ ᠤᠳᠠᠭ᠎ᠠ ᠬᠦᠬᠡᠪᠤᠬ᠎ᠠ ᠠᠶᠢᠯ ᠳᠤ ᠢᠳᠡᠰᠢ ᠭᠠᠷᠭᠠᠵᠦ ᠶᠠᠳᠠᠷᠠᠭᠠᠳ ᠤᠷᠤ ᠳᠦᠰᠢᠨ ᠬᠤᠷᠬᠢᠷᠠᠵᠦ ᠪᠠᠶᠢᠬᠤ ᠲᠠᠢ ᠪᠤᠷᠤᠨᠢᠳᠤᠨ ᠳᠠᠭᠠᠷᠠᠯᠳᠤᠵᠦ ᠳᠡᠬᠦᠨ ᠤ ᠳᠦᠷᠠᠢ ᠳᠤ ᠪᠠᠶᠢᠭᠰᠠᠨ ᠮᠠᠯ ᠵᠠᠷᠤᠳᠠᠭ ᠬᠢᠳᠤᠭ᠎ᠠ ᠶᠢ ᠨᠢ ᠰᠡᠮᠡᠭᠡᠨ ᠠᠪᠤᠭᠠᠳ ᠭᠠᠯ ᠳᠤ ᠬᠢᠴᠢᠭᠡᠭᠰᠡᠨ ᠪᠠᠶᠢᠪᠠ᠃ ᠬᠦᠬᠡᠪᠤᠬ᠎ᠠ ᠰᠠᠶᠢᠨ ᠬᠢᠳᠤᠭ᠎ᠠ ᠪᠠᠨ ᠠᠯᠳᠠᠵᠦ ︽ᠬᠠᠶᠢᠷᠠᠨ ᠬᠢᠳᠤᠭ᠎ᠠ᠂ ᠬᠠᠶᠢᠷᠠᠨ ᠬᠢᠳᠤᠭ᠎ᠠ ᠁︾ ᠬᠡᠮᠡᠨ ᠬᠡᠳᠦᠨ ᠡᠳᠦᠷ ᠬᠠᠷᠠᠮᠰᠠᠨ ᠦᠭᠡᠶᠢᠯᠡᠭᠰᠡᠨ ᠪᠤᠯᠪᠠᠴᠦ ᠳᠡᠮᠡᠢ ᠤᠳᠠᠯ ᠦᠭᠡᠢ ᠳᠠᠷᠬᠠᠨ ᠢᠶᠠᠷ ᠪᠠᠰᠠ ᠨᠢᠭᠡ ᠰᠠᠶᠢᠨ ᠬᠢᠳᠤᠭ᠎ᠠ ᠳᠠᠪᠳᠠᠭᠤᠯᠵᠦ ᠠᠪᠴᠠᠢ᠃ ᠳᠡᠭᠡᠭᠡᠳ ᠯᠠ ᠠᠶᠢᠯ ᠳᠤ ᠵᠠᠯᠠᠭᠳᠠᠵᠦ ᠶᠠᠪᠤᠨ᠎ᠠ᠂ ᠪᠤᠷᠤᠨᠢᠳᠤᠨ ᠦᠰᠬᠦ ᠳᠤᠳᠤᠮ ᠬᠦᠬᠡᠪᠤᠬ᠎ᠠ ᠶᠢ ᠦᠵᠡᠨ ᠶᠠᠳᠠᠬᠤ ᠪᠤᠯᠪᠠ᠃     ᠪᠤᠷᠤᠨᠢᠳᠤᠨ᠂ ᠰᠤᠷᠭᠠᠭᠤᠯᠢ ᠰᠤᠶᠤᠯ ᠤᠨ ᠮᠦᠷ ᠢ ᠳᠤᠨᠳᠠᠭᠤᠷ ᠬᠦᠭᠡᠭᠡᠵᠦ ᠬᠡᠨᠡᠳᠳᠡ ᠨᠢᠭᠡ ᠡᠳᠦᠷ ᠠᠯᠠᠭ᠎ᠠ ᠪᠤᠯᠵᠠᠢ᠃ ᠬᠡᠵᠢᠶ᠎ᠠ ᠰᠡᠬᠦᠯ ᠳᠤ ᠨᠢ ᠬᠦᠮᠪᠤᠮ ᠬᠡᠶᠢᠳ ᠲᠤ ᠨᠤᠮ ᠰᠤᠷᠴᠦ ᠪᠠᠶᠢᠭ᠎ᠠ ᠬᠡᠳᠡᠭ ᠢ ᠰᠤᠨᠤᠰᠤᠭᠠᠳ ᠬᠡᠷ ᠤᠨ ᠬᠦᠮᠦᠰ ᠨᠢ ᠰᠠᠨᠠᠭ᠎ᠠ ᠠᠮᠠᠷᠠᠭᠰᠠᠨ ᠠᠵᠢ᠃ ᠬᠡᠳᠦᠨ ᠵᠢᠯ ᠤᠨ ᠬᠢᠨᠢ ᠳᠠᠷᠠᠭ᠎ᠠ᠂ ᠬᠤᠷᠤᠭ᠎ᠠ ᠪᠠᠯᠭᠠᠰᠤᠨ ᠳᠠᠬᠢ ᠭᠠᠨᠵᠤᠤᠷ ᠰᠦᠮ᠎ᠡ ᠵᠠᠰᠠᠭᠳᠠᠵᠦ᠂ ᠬᠤᠰᠢᠭᠤᠨ ᠤ ᠱᠠᠰᠢᠨ ᠰᠤᠷᠳᠠᠬᠤᠨ ᠤ ᠬᠠᠮᠢᠶ᠎ᠠ ᠲᠠᠢ ᠨᠢᠭᠡᠴᠡ ᠠᠴᠠ ᠪᠤᠷᠤᠨᠢᠳᠤᠨ ᠢ ᠭᠠᠨᠵᠤᠤᠷ ᠰᠦᠮ᠎ᠡ ᠶᠢᠨ ᠱᠠᠪᠷᠤᠩ ᠬᠡᠭᠡᠨ ᠢᠶᠠᠷ ᠵᠠᠯᠠᠵᠦ ᠠᠪᠴᠢᠷᠠᠪᠠ᠃     ᠡᠶᠢᠨᠬᠦ ᠪᠤᠷᠤᠨᠢᠳᠤᠨ ᠬᠤᠷᠤᠭ᠎ᠠ ᠪᠠᠯᠭᠠᠰᠤᠨ ᠳᠠᠬᠢ ᠬᠠᠮᠤᠭ ᠤᠨ ᠬᠦᠨᠳᠦᠳᠠᠢ ᠬᠦᠮᠦᠨ ᠪᠤᠯᠵᠦ ᠬᠠᠷ᠎ᠠ ᠳᠡᠷᠢᠬᠦᠳᠡᠳ ᠳᠡᠬᠦᠨ ᠳᠤ ᠢᠷᠠᠵᠦ ᠮᠦᠷᠬᠦᠨ᠎ᠠ᠃ ᠮᠦᠷᠬᠦᠯ ᠬᠢᠵᠦ ᠪᠠᠶᠢᠭ᠎ᠠ ᠰᠦᠰᠦᠭᠳᠡᠳ ᠤᠨ ᠳᠤᠳᠤᠷ᠎ᠠ ᠵᠢᠷ ᠤᠨ ᠢᠷᠭᠡᠳ᠂ ᠵᠡᠷᠭᠡ ᠪᠠᠨ ᠠᠬᠢᠭᠤᠯᠬᠤ ᠬᠡᠰᠡᠨ ᠳᠤᠰᠢᠶᠠᠯᠳᠠᠨ᠂ ᠮᠦᠡᠭᠬᠦ ᠠᠬᠤᠶᠢᠯᠠᠬᠤ ᠷᠢᠳᠢ ᠬᠦᠰᠡᠭᠴᠢᠳ ᠬᠡᠳ ᠯᠠ ᠶᠢᠷᠳᠢᠨᠴᠦ ᠶᠢᠨ ᠶᠢᠰᠦᠨ ᠰᠢᠳᠢ ᠶᠢᠨ ᠬᠦᠮᠦᠰ ᠪᠠᠶᠢᠯᠴᠠᠨ᠎ᠠ᠃     ᠨᠠᠷᠠ ᠪᠢᠳᠡᠬᠦᠦ ᠨᠢᠭᠡᠨ ᠦᠷᠯᠦᠭᠡ᠂ ᠪᠤᠷᠤᠨᠢᠳᠤᠨ ᠰᠦᠮ᠎ᠡ ᠶᠢᠨ ᠡᠬᠦᠳᠡ ᠪᠠᠨ ᠨᠡᠭᠡᠭᠡᠬᠦ ᠳᠤ ᠳᠡᠬᠦᠨ ᠤ ᠪᠠᠭ᠎ᠠ ᠶᠢᠨ ᠨᠠᠶᠢᠵᠠ ᠢᠰᠢᠭᠡᠳᠠᠢ ᠮᠦᠷᠬᠦᠯ ᠬᠢᠬᠦ ᠪᠠᠷ ᠢᠷᠡᠭᠡᠳ ᠬᠦᠯᠢᠶᠠᠨ ᠵᠤᠭᠰᠤᠵᠦ ᠪᠠᠶᠢᠪᠠ᠃ ᠦᠨᠦ ᠦᠷᠯᠦᠭᠡ ᠶᠢᠨ ᠠᠩᠬᠠᠨ ᠤ ᠮᠦᠷᠬᠦᠯᠴᠢ ᠨᠢ ᠳᠡᠬᠦᠨ ᠤ ᠤᠨᠠᠭᠠᠨ ᠪᠠᠭ᠎ᠠ ᠶᠢᠨ ᠨᠠᠶᠢᠵᠠ ᠪᠤᠯᠤᠭᠰᠠᠨ ᠳᠤ ᠪᠤᠷᠤᠨᠢᠳᠤᠨ ᠦᠪᠡᠷ ᠤᠨ ᠡᠷᠭᠡ ᠦᠭᠡᠢ ᠳᠤᠭᠳᠤᠯᠤᠨ ᠪᠠᠶᠠᠷᠯᠠᠭᠰᠠᠨ ᠢ ᠶᠠᠭᠠᠬᠢᠨ᠎ᠠ᠃ ᠮᠦᠷᠬᠦᠯ ᠪᠠᠷᠠᠭᠠᠳ ᠬᠤᠶᠠᠷ ᠨᠠᠶᠢᠵᠠ ᠴᠠᠢ ᠤᠤᠭᠤᠨ ᠵᠤᠭᠤᠭᠳᠠᠵᠦ ᠰᠠᠭᠤᠪᠠ᠃     — ᠬᠦᠬᠡᠪᠤᠬ᠎ᠠ ᠭᠤᠸᠠᠢ ᠰᠠᠶᠢᠨ ᠪᠠᠶᠢᠨ᠎ᠠ ᠦᠦ︖ ᠬᠡᠵᠦ ᠪᠤᠷᠤᠨᠢᠳᠤᠨ ᠠᠰᠠᠭᠤᠯ᠎ᠠ᠃     — ᠡᠪᠦᠭᠡᠨ ᠬᠠᠨᠭ᠍ᠬᠢ ᠯᠠ ᠰᠠᠭᠤᠵᠦ ᠪᠠᠶᠢᠨ᠎ᠠ᠃     — ᠡᠪᠦᠭᠡᠨ ᠭᠤᠸᠠᠢ ᠮᠠᠯ ᠵᠠᠷᠤᠬᠤ ᠪᠠᠨ ᠪᠤᠯᠢᠭᠰᠠᠨ ᠪᠢᠵᠠ︖    — ᠡᠪᠦᠭᠡᠨ ᠪᠠᠰᠠ ᠯᠠ ᠮᠠᠯ ᠵᠠᠷᠤᠵᠦ ᠪᠠᠶᠢᠨ᠎ᠠ᠃ ᠶᠠᠭᠠᠬᠢᠭᠠᠳ ᠬᠡᠪᠠᠯ ᠮᠠᠨ ᠤ ᠳᠡᠨᠳᠡ ᠮᠠᠯ ᠦᠷᠦᠴᠢᠯᠠᠵᠦ ᠴᠢᠳᠠᠬᠤ ᠬᠦᠮᠦᠨ ᠦᠭᠡᠢ ᠪᠤᠯᠵᠠᠢ᠃ ᠵᠠᠯᠠᠭᠤᠴᠤᠳ ᠮᠢᠬ᠎ᠠ ᠵᠤᠭᠤᠭᠯᠠᠬᠤ ᠶᠢ ᠮᠡᠳᠡᠬᠦ ᠠᠴᠠ ᠪᠢᠰᠢ ᠮᠠᠯ ᠵᠠᠷᠤᠬᠤ ᠳᠤᠷ᠎ᠠ ᠦᠭᠡᠢ᠃     ᠢᠰᠢᠭᠡᠳᠠᠢ᠂ ᠬᠦᠬᠡᠪᠤᠬ᠎ᠠ ᠡᠪᠦᠭᠡᠨ ᠠᠴᠠ ᠮᠠᠯ ᠦᠷᠦᠴᠢᠯᠠᠵᠦ ᠵᠠᠷᠤᠬᠤ ᠶᠢ ᠰᠤᠷᠤᠭᠰᠠᠨ ᠬᠡᠨ᠎ᠡ᠃ ᠳᠡᠭᠡᠭᠡᠳ ᠠᠮᠢᠳᠤᠷᠠᠬᠤ ᠶᠢᠨ ᠡᠷᠭᠡᠨ ᠳᠤ ᠢᠰᠢᠭᠡᠳᠠᠢ ᠬᠤᠷᠤᠭ᠎ᠠ ᠪᠠᠯᠭᠠᠰᠤᠨ᠎ᠠ ᠨᠡᠬᠦᠵᠦ ᠢᠷᠡᠭᠡᠳ ᠪᠠᠭᠠᠬᠠᠨ ᠬᠡᠷ ᠳᠦᠷᠢᠶᠠᠰᠤᠯᠠᠵᠦ ᠮᠠᠯ ᠵᠠᠷᠤᠨ ᠮᠢᠬ᠎ᠠ ᠬᠤᠳᠠᠯᠳᠤᠵᠦ ᠠᠮᠢ ᠵᠢᠭᠤᠵᠦ ᠪᠠᠶᠢᠭ᠎ᠠ ᠶᠤᠮ ᠪᠠᠶᠢᠨ᠎ᠠ᠃ ᠪᠤᠷᠤᠨᠢᠳᠤᠨ ᠳᠠᠬᠢᠭᠠᠳ ᠳᠡᠬᠦᠨ ᠲᠠᠢ ᠶᠠᠷᠢᠯᠴᠠᠬᠤ ᠳᠤᠷ᠎ᠠ ᠦᠭᠡᠢ ᠪᠤᠯᠵᠦ᠂ ᠦᠨᠦᠳᠦᠷ  ᠤᠨ ᠠᠩᠬᠠᠨ  ᠤ ᠮᠦᠷᠬᠦᠯᠴᠢ ᠪᠠᠨ ᠦᠳᠡᠨ ᠮᠤᠷᠳᠠᠭᠤᠯᠵᠦ ᠪᠢᠯᠡ᠃     ᠳᠡᠬᠦᠨ ᠠᠴᠠ ᠬᠤᠶᠢᠰᠢ ᠡᠨᠡ ᠬᠤᠶᠠᠷ ᠪᠠᠭ᠎ᠠ ᠶᠢᠨ ᠠᠨᠳᠠ ᠨᠢᠭᠡ ᠨᠢᠭᠡᠨ ᠳᠤ ᠪᠠᠨ ᠳᠡᠳᠦᠢ ᠯᠠ ᠬᠡᠷᠡᠭᠰᠡᠬᠦ ᠦᠭᠡᠢ ᠶᠢᠨ ᠰᠢᠯᠳᠠᠭ ᠢᠶᠠᠷ ᠵᠢᠯ ᠰᠢᠬᠠᠮ ᠠᠭᠤᠯᠵᠠᠭᠰᠠᠨ ᠦᠭᠡᠢ ᠶᠠᠪᠤᠯ᠎ᠠ᠃ ᠬᠠᠷᠢᠨ᠂ ᠬᠠᠪᠤᠷ ᠤᠨ ᠡᠬᠢ ᠪᠠᠷ ᠪᠤᠷᠤᠨᠢᠳᠤᠨ ᠱᠠᠰᠢᠨ ᠤᠨ ᠳᠠᠯ᠎ᠠ ᠶᠢᠨ ᠳᠦᠯᠦᠭᠡᠯᠡᠭᠴᠢ ᠶᠢᠨ ᠬᠤᠪᠢ ᠪᠠᠷ ᠬᠤᠰᠢᠭᠤᠨ ᠤ ᠤᠯᠤᠰ ᠳᠦᠷᠦ ᠶᠢᠨ ᠵᠦᠪᠯᠡᠯᠭᠡᠨ ᠤ ᠬᠡᠰᠢᠬᠦᠨ ᠪᠤᠯᠵᠦ ᠬᠤᠷᠠᠯ ᠳᠤ ᠤᠷᠤᠯᠴᠠᠬᠤ ᠳᠤ ᠪᠠᠨ ᠢᠰᠢᠭᠡᠳᠠᠢ ᠲᠠᠢ ᠠᠭᠤᠯᠵᠠᠭᠰᠠᠨ ᠶᠤᠮ᠃ ᠢᠰᠢᠭᠡᠳᠠᠢ ᠬᠤᠳᠠ ᠤᠷᠤᠵᠦ ᠦᠢᠯᠡᠰ ᠪᠦᠳᠦᠭᠡᠭᠰᠡᠨ ᠮᠠᠯᠴᠢᠨ ᠤ ᠬᠤᠪᠢ ᠪᠠᠷ ᠳᠤᠰ ᠬᠤᠷᠠᠯ ᠳᠤ ᠤᠷᠤᠯᠴᠠᠵᠦ ᠪᠠᠶᠢᠭ᠎ᠠ ᠶᠤᠮ ᠬᠡᠨ᠎ᠡ᠃ ᠢᠰᠢᠭᠡᠳᠠᠢ ᠶᠢᠨ ᠬᠡᠶᠢᠮᠤᠷᠢ ᠮᠠᠨᠳᠤᠵᠦ ᠳᠦᠷᠦᠯ ᠵᠦᠢᠯ ᠤᠯᠤᠭᠠᠳ ᠤᠯᠠᠭᠠᠨ ᠢᠳᠡᠭᠡᠨ ᠪᠤᠯᠪᠠᠰᠤᠷᠠᠭᠤᠯᠬᠤ ᠦᠢᠯᠡᠳᠪᠦᠷᠢ ᠲᠠᠢ ᠪᠤᠯᠵᠦ ᠤᠷᠤᠯᠭ᠎ᠠ ᠨᠢ ᠴᠤ ᠶᠡᠭᠡ ᠰᠠᠶᠢᠨ ᠬᠡᠨ᠎ᠡ᠃       — ᠶᠠᠭᠠᠬᠢᠵᠦ ᠦᠢᠯᠡᠳᠪᠦᠷᠢᠯᠡᠳᠡᠭ ᠪᠤᠢ︖ ᠬᠡᠵᠦ ᠪᠤᠷᠤᠨᠢᠳᠤᠨ ᠭᠠᠶᠢᠬᠠᠨ ᠠᠰᠠᠭᠤᠯ᠎ᠠ᠃     — ᠦᠢᠯᠡᠳᠪᠦᠷᠢ ᠳᠤ ᠤᠳᠤ ᠬᠤᠨᠢ ᠶᠢ ᠦᠷᠦᠴᠢᠯᠠᠵᠦ ᠵᠠᠷᠤᠬᠤ ᠪᠠᠨ ᠪᠤᠯᠢᠭᠰᠠᠨ᠂ ᠠᠯᠠᠭᠠᠴᠢ ᠬᠡᠳᠡᠭ ᠳᠤᠰᠬᠠᠢ ᠬᠦᠮᠦᠨ ᠵᠠᠷᠤᠵᠦ ᠪᠠᠶᠢᠨ᠎ᠠ᠃ ᠬᠤᠨᠢ ᠶᠢ ᠨᠢᠭᠡ ᠨᠢᠭᠡ ᠪᠠᠷ ᠦᠷᠦᠴᠢᠯᠠᠵᠦ ᠵᠠᠷᠤᠬᠤ ᠬᠡᠭᠴᠢ ᠶᠠᠷᠰᠢᠭ ᠲᠠᠢ ᠮᠦᠷᠳᠡᠭᠡᠨ ᠦᠢᠯᠡᠳᠪᠦᠷᠢ ᠶᠢᠨ ᠠᠷᠭ᠎ᠠ ᠬᠡᠯᠪᠡᠷᠢ ᠲᠠᠢ ᠵᠤᠬᠢᠴᠠᠬᠤ ᠦᠭᠡᠢ᠂ ᠳᠠᠬᠢᠭᠠᠳ ᠬᠡᠯᠡᠪᠠᠯ ᠦᠷᠦᠴᠢᠯᠠᠵᠦ ᠴᠢᠳᠠᠬᠤ ᠬᠦᠮᠦᠨ ᠴᠤ ᠦᠭᠡᠢ ᠪᠤᠯᠵᠠᠢ᠃     — ᠠᠯᠠᠭᠠᠴᠢ ᠬᠡᠳᠡᠭ ᠴᠢᠨᠢ ᠬᠡᠨ ᠪᠤᠢ︖     — ᠬᠤᠨᠢᠨ ᠤ ᠬᠤᠭᠤᠯᠠᠢ ᠤᠭᠳᠤᠯᠳᠠᠭ ᠳᠤᠰᠬᠠᠢ ᠬᠦᠮᠤᠨ ᠪᠤᠢ᠃ ᠮᠠᠨ ᠤ ᠦᠢᠯᠡᠳᠪᠦᠷᠢ ᠤᠳᠤ ᠡᠳᠦᠷ ᠲᠤ ᠬᠡᠳᠦᠨ ᠵᠠᠭᠤᠨ ᠬᠤᠨᠢ ᠳᠦᠬᠦᠭᠡᠷᠴᠦ ᠴᠢᠳᠠᠬᠤ ᠴᠢᠳᠠᠮᠵᠢ ᠲᠠᠢ ᠪᠤᠯᠤᠭᠰᠠᠨ᠃ ᠶᠠᠷᠤᠨᠢ ᠳᠠᠨ ᠲᠠᠢ ᠨᠢᠭᠡ ᠠᠭᠤᠯᠵᠠᠶ᠎ᠠ ᠬᠡᠵᠦ ᠪᠤᠳᠤᠵᠦ ᠪᠠᠶᠢᠭᠰᠠᠨ ᠶᠤᠮ᠂ ᠠᠮᠵᠢᠪᠦᠷᠢ ᠮᠠᠭᠤᠳᠠᠢ ᠪᠤᠯᠤᠭᠠᠳ ᠡᠳᠦᠢ ᠬᠦᠷᠴᠢᠭᠡᠯ᠎ᠡ᠃ ᠡᠳᠦᠷ ᠲᠤ ᠬᠡᠳᠦᠨ ᠵᠠᠭᠤᠨ ᠠᠮᠢ ᠬᠤᠷᠤᠭᠠᠵᠦ ᠪᠠᠶᠢᠨ᠎ᠠ᠂ ᠡᠶᠢᠮᠤ ᠠᠴᠠ ᠪᠠᠭ᠎ᠠ ᠶᠢᠨ ᠠᠨᠳᠠ ᠮᠢᠨᠢ ᠬᠦᠴᠦᠳᠠᠢ ᠨᠤᠮ ᠤᠡᠭᠰᠢᠵᠦ ᠡᠳᠡᠭᠡᠷ ᠠᠮᠢᠨ ᠤ ᠰᠦᠨᠡᠰᠦ ᠨᠤᠭᠤᠳ ᠢ ᠵᠦᠪ ᠤᠷᠤᠨ ᠲᠤᠨᠢ ᠵᠠᠯᠠᠵᠦ ᠨᠠᠳᠠ ᠳᠤ ᠬᠤᠷᠠᠵᠦ ᠮᠡᠳᠡᠬᠦ ᠨᠢᠬᠦᠯ ᠤᠳ ᠢ ᠠᠷᠢᠯᠭᠠᠵᠦ ᠦᠭᠬᠦ ᠪᠤᠯᠪᠠᠦ︕     — ᠪᠢ ᠠᠷᠠᠢ ᠳᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠶᠢᠬᠤ᠂ ᠳᠡᠶᠢᠮᠤ ᠳᠡᠬᠦᠰ ᠴᠢᠳᠠᠪᠦᠷᠢ ᠬᠡᠵᠦ ᠨᠡᠳᠠ ᠳᠤ ᠦᠭᠡᠢ︕     — ᠶᠠᠭᠤ ᠴᠤ ᠬᠡᠰᠡᠨ ᠮᠢᠨᠤ ᠳᠦᠯᠦᠭᠡ ᠨᠤᠮ ᠤᠡᠭᠰᠢᠵᠦ ᠪᠠᠶᠢᠭᠠᠷᠠᠢ᠂ ᠪᠢ ᠦᠭᠯᠢᠭᠡ ᠶᠢ ᠨᠢ ᠭᠤᠮᠤᠳᠠᠭᠠᠯ ᠦᠭᠡᠢ ᠰᠠᠶᠢᠨ ᠦᠭᠬᠦᠨ᠎ᠠ᠃     — ᠳᠠᠨ ᠤ ᠬᠢᠨ ᠶᠤᠰᠤ ᠨᠤᠮ ᠲᠠᠢ ᠤᠯᠤᠰ ᠰᠢᠥ︕ ᠬᠡᠳᠡᠯ᠎ᠡ ᠳᠠᠨ ᠠᠴᠠ ᠴᠢᠰᠤᠨ ᠤ ᠦᠨᠦᠷ ᠬᠠᠨᠭ᠍ᠬᠤᠯᠵᠦ ᠪᠠᠶᠢᠬᠤ ᠰᠢᠭ︕     — ᠠᠷᠠᠢ ᠦᠭᠡᠢ ᠪᠠᠶᠢᠬ᠎ᠠ᠂ ᠪᠢ ᠶᠡᠭᠡᠨᠭᠬᠢ ᠳᠤ ᠪᠠᠨ ᠦᠢᠯᠡᠳᠪᠦᠷᠢ ᠳᠤ ᠪᠤᠰᠤ ᠠᠯᠪᠠᠨ ᠬᠡᠷ ᠲᠤ ᠠᠵᠢᠯᠯᠠᠳᠠᠭ ᠪᠤᠯᠬᠤᠷ ᠴᠢᠰᠤ ᠨᠦᠵᠢ ᠲᠠᠢ ᠬᠠᠪᠢᠳᠠᠳᠠᠭ ᠦᠭᠡᠢ᠂ ᠦᠷᠯᠦᠭᠡ ᠪᠠᠰᠠ ᠪᠡᠶ᠎ᠡ ᠪᠠᠨ ᠤᠬᠢᠶᠠᠭᠠᠳ ᠭᠠᠷᠴᠦ ᠢᠷᠡᠭᠰᠡᠨ ᠶᠤᠮ ᠯᠠ ᠳ᠋ᠠ᠃      ᠢᠰᠢᠭᠡᠳᠠᠢ ᠳᠠᠩᠭᠠᠶᠢᠨ ᠰᠠᠭᠤᠵᠦ ᠦᠨᠳᠦᠷ ᠳᠠᠭᠤ ᠪᠠᠷ ︽ᠮᠢᠨᠤ ᠳᠦᠯᠦᠭᠡ ᠨᠤᠮ ᠤᠡᠭᠰᠢᠵᠦ ᠪᠠᠢ︾ ᠬᠡᠳᠡᠭ ᠦᠭᠡ ᠪᠠᠨ ᠳᠠᠬᠢᠨᠳᠠ ᠬᠡᠯᠡᠭᠰᠡᠨ ᠢᠶᠠᠨ ᠪᠤᠰᠤᠭᠠᠳ ᠡᠮᠤᠨ᠎ᠠ ᠬᠠᠪᠢ ᠪᠠᠷ ᠰᠠᠭᠤᠳᠠᠯ ᠡᠷᠢᠨ ᠰᠠᠭᠤᠪᠠ᠃     ᠪᠤᠷᠤᠨᠢᠳᠤᠨ ᠬᠦᠨ ᠤᠶᠢᠮᠤᠷᠠᠯ ᠳᠤ ᠠᠪᠳᠠᠨ ᠬᠤᠷᠠᠯ ᠤᠨ ᠡᠬᠢᠯᠠᠯᠳᠠ ᠳᠤ ᠶᠠᠭᠤ ᠶᠠᠷᠢᠭᠰᠠᠨ ᠢ ᠠᠩᠵᠠᠭᠠᠷᠠᠭᠰᠠᠨ ᠦᠭᠡᠢ᠃ ᠬᠤᠷᠠᠯ ᠳᠦᠷ ᠵᠠᠪᠰᠠᠷᠯᠠᠬᠤ ᠳᠤ ᠳᠡᠷᠡᠪᠡᠷ ᠠᠳᠡ ᠠᠴᠠ ᠭᠠᠷᠴᠦ ᠪᠠᠨᠳᠢ ᠠᠴᠠ ᠪᠠᠨ ᠨᠢᠭᠡ ᠶᠢ ᠳᠠᠭᠤᠳᠠᠭᠠᠳ ᠬᠤᠶᠠᠭᠤᠯᠠ ᠢᠰᠢᠭᠡᠳᠠᠢ ᠶᠢᠨ ᠬᠦᠢᠳᠡᠨ ᠬᠦᠮᠦᠷᠭᠡ ᠶᠢ ᠴᠢᠭᠯᠡᠪᠠ᠃     ᠵᠡᠭᠡᠯᠢ ᠳᠡᠭᠡᠷ᠎ᠡ ᠠᠳᠡ ᠳᠡᠨᠳᠡ ᠦᠭᠡᠢ ᠮᠠᠯ ᠨᠢᠳᠤᠯᠠᠬᠤ ᠨᠢ ᠬᠠᠷᠠᠭᠳᠠᠨ᠎ᠠ᠃ ᠨᠢᠭᠡ ᠬᠤᠨᠢᠨ ᠤ ᠠᠷᠠᠰᠦ ᠶᠢ ᠨᠢ ᠳᠡᠯᠡᠵᠦ ᠬᠡᠨᠭᠬᠦᠳᠡᠭ ᠢ ᠨᠢ ᠢᠷᠠᠨ ᠪᠠᠶᠢᠳᠠᠭ ᠢ ᠨᠢ ᠭᠠᠷᠭᠠᠵᠦ ᠪᠠᠶᠢᠬᠤ ᠳᠤ ᠬᠠᠵᠠᠭᠤ ᠳᠤ ᠨᠢ ᠤᠶᠠᠭ᠎ᠠ ᠲᠠᠢ ᠪᠠᠶᠢᠭᠰᠠᠨ ᠬᠤᠨᠢ ᠨᠢᠳᠤ ᠨᠢ ᠪᠦᠯᠳᠡᠶᠢᠴᠢᠭᠡᠭᠰᠡᠨ ᠮᠠᠶᠢᠯᠠᠵᠦ ᠵᠤᠭᠰᠤᠨ᠎ᠠ᠃ ᠬᠠᠷᠠᠴᠠ ᠪᠤᠷᠤᠭᠤᠯᠤᠨ ᠰᠢᠷᠤᠬᠦᠭᠡᠨ ᠠᠯᠬᠤᠵᠦ ᠪᠠᠶᠢᠭᠰᠠᠨ ᠪᠤᠷᠤᠨᠢᠳᠤᠨ ᠵᠡᠭᠡᠯᠢ ᠶᠢᠨ ᠬᠠᠵᠠᠭᠤ ᠳᠠᠬᠢ ᠴᠢᠰᠤ ᠲᠠᠢ ᠪᠠᠷᠢᠯᠳᠤᠨ ᠬᠦᠯᠳᠡᠭᠰᠡᠨ ᠮᠦᠰᠦᠨ ᠳᠡᠭᠡᠷ᠎ᠡ ᠬᠠᠯᠳᠤᠷᠢᠵᠦ ᠤᠨᠠᠭᠰᠠᠨ ᠳᠤ ᠪᠠᠨᠳᠢ ᠨᠢ ᠳᠡᠬᠦᠨ ᠢ ᠳᠦᠰᠢᠵᠦ ᠪᠤᠰᠬᠠᠯ᠎ᠠ᠃    ᠢᠰᠢᠭᠡᠳᠠᠢ ᠶᠢᠨ ᠬᠦᠢᠳᠡᠨ ᠬᠦᠮᠦᠷᠭᠡ ᠶᠢᠨ ᠭᠠᠳᠠᠨ᠎ᠠ ᠮᠠᠯ ᠳᠡᠭᠡᠭᠡᠭᠰᠡᠨ ᠳᠡᠷᠭᠡ ᠪᠠᠭᠠᠷᠴᠤᠭᠯᠠᠵᠦ ᠬᠤᠨᠢ ᠦᠭᠡᠷ ᠮᠠᠶᠢᠯᠠᠵᠦ ᠮᠦᠭᠡᠷᠡᠨ ᠬᠦᠮᠦᠨ ᠬᠠᠷ᠎ᠠ ᠤᠷᠢᠯᠠᠯᠳᠤᠵᠦ ᠤᠴᠢᠷ ᠨᠢ ᠤᠯᠳᠠᠬᠤ ᠦᠭᠡᠢ ᠳᠡᠪᠵᠢᠶᠠᠨ᠃ ᠮᠠᠯ ᠨᠢᠳᠤᠯᠬᠤ ᠯᠤᠵᠤᠷ ᠳᠤᠮᠤ ᠪᠠᠶᠢᠰᠢᠩ ᠳᠤ ᠳᠤᠭ᠎ᠠ ᠦᠭᠡᠢ ᠤᠯᠠᠨ ᠬᠤᠨᠢ ᠶᠢ ᠰᠢᠬᠢᠷ᠎ᠠ ᠠᠴᠠ ᠨᠢ ᠭᠤᠬᠠᠳᠠᠵᠦ ᠮᠧᠬᠠᠨᠢᠭ ᠡᠯᠬᠦᠬᠦᠷ ᠠᠴᠠ ᠡᠯᠬᠦᠵᠠᠢ᠃ ᠴᠠᠭᠠᠨ ᠪᠦᠰ ᠢᠶᠠᠷ ᠳᠤᠯᠤᠭᠠᠢ ᠠᠮᠠ ᠬᠠᠮᠠᠷ ᠢᠶᠠᠨ ᠪᠦᠭᠯᠡᠭᠰᠡᠨ ᠴᠤᠯᠤ ᠴᠠᠭᠠᠨ ᠬᠤᠪᠴᠠᠰᠦ ᠲᠠᠢ ᠨᠢᠭᠡ ᠬᠦᠮᠦᠨ ᠮᠧᠬᠠᠨᠢᠭ ᠡᠯᠬᠦᠬᠦᠷ ᠢᠶᠠᠷ ᠡᠷᠬᠢᠯᠳᠤᠨ ᠢᠷᠡᠬᠦ ᠬᠤᠨᠢ ᠪᠦᠷᠢ ᠶᠢᠨ ᠬᠤᠭᠤᠯᠠᠢ ᠶᠢ ᠢᠷ  ᠨᠢ ᠬᠢᠯᠠᠯᠵᠠᠭᠰᠠᠨ ᠬᠢᠳᠤᠭ᠎ᠠ ᠪᠠᠷ ᠭᠠᠭᠴᠠ ᠵᠦᠰᠦᠭᠡᠳ ᠠᠪᠬᠤ ᠳᠤ ᠳᠠᠷᠠᠭᠠᠴᠢ ᠶᠢᠨ ᠬᠤᠨᠢ ᠨᠢ ᠡᠷᠬᠢᠯᠳᠤᠭᠡᠳ ᠬᠦᠷᠦᠭᠡᠳ ᠢᠷᠡᠨ᠎ᠡ᠃ ᠬᠤᠭᠤᠯᠠᠢ ᠪᠠᠨ ᠤᠭᠳᠤᠯᠤᠭᠤᠯᠤᠭᠰᠠᠨ ᠬᠤᠨᠢ ᠮᠧᠬᠠᠨᠢᠭ ᠤᠨ ᠬᠦᠴᠦ ᠪᠠᠷ ᠴᠢᠰᠤ ᠪᠠᠨ ᠭᠤᠭᠤᠵᠢᠭᠤᠯᠤᠨ ᠴᠠᠰᠢ ᠬᠦᠷᠬᠦ ᠳᠤ ᠬᠤᠶᠠᠷ ᠬᠦᠮᠦᠨ ᠭᠤᠤᠯ ᠨᠢ ᠳᠠᠰᠤᠷᠠᠭ᠎ᠠ ᠦᠭᠡᠢ ᠠᠮᠢᠳᠠᠨ ᠤ ᠠᠷᠠᠰᠤ ᠶᠢ ᠨᠢ ᠬᠠᠥ ᠳᠠᠳᠠᠵᠦ ᠪᠠᠶᠢᠪᠠ᠃     ᠰᠢᠬᠢᠷ᠎ᠠ ᠶᠢᠨ ᠰᠢᠷᠪᠤᠰᠤ ᠳᠠᠰᠤᠷᠠᠵᠦ ᠨᠢᠭᠡ ᠬᠤᠨᠢ ᠬᠠᠷᠠᠯᠠᠨ ᠤᠷᠤᠰᠬᠤ ᠴᠢᠰᠤᠨ ᠤ ᠳᠤᠮᠳᠠ ᠤᠨᠠᠪᠠ᠃ ᠤᠨᠠᠭᠰᠠᠨ ᠬᠤᠨᠢ ᠳᠡᠯᠴᠢᠯᠠᠨ ᠪᠤᠰᠤᠭᠰᠠᠨ ᠪᠤᠯᠪᠠᠴᠦ ᠬᠦᠯ ᠨᠢ ᠴᠡᠴᠡᠷᠡᠭᠡᠳ ᠠᠯᠬᠤᠵᠦ ᠴᠢᠳᠠᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠪᠤᠷᠤᠨᠢᠳᠤᠨ ᠢ ᠬᠠᠷᠠᠭᠠᠳ ᠮᠠᠶᠢᠯᠠᠵᠦ ᠠᠪᠬᠤ ᠳᠤ ᠪᠤᠷᠤᠨᠢᠳᠤᠨ ᠤ ᠡᠪᠦᠳᠦᠭ ᠴᠦ ᠴᠡᠴᠡᠷᠡᠵᠦ ᠨᠢᠳᠤ ᠨᠢ ᠬᠠᠷᠠᠯᠠᠭᠠᠳ ᠶᠠᠪᠤᠴᠢᠬᠠᠯ᠎ᠠ᠃     ᠪᠤᠷᠤᠨᠢᠳᠤᠨ ᠳᠠᠷᠤᠶᠢᠬᠠᠨ ᠰᠦᠮ᠎ᠡ ᠳᠤ ᠪᠠᠨ ᠬᠠᠷᠢᠵᠦ ᠤᠬᠢᠶᠠᠯ ᠬᠢᠭᠡᠳ᠂ ᠦᠳᠡ ᠶᠢᠨ ᠬᠤᠶᠢᠨ᠎ᠠ ᠨᠢ ᠰᠦᠮ᠎ᠡ ᠶᠢᠨ ᠪᠦᠬᠦ ᠯᠠᠮᠠ ᠵᠢᠴᠢ ᠬᠡᠰᠡᠭ ᠮᠦᠷᠬᠦᠯᠴᠢᠨ ᠤᠷᠤᠯᠴᠠᠭᠰᠠᠨ ᠬᠤᠷᠠᠯ ᠬᠤᠷᠠᠯᠳᠤᠵᠦ ᠪᠦᠷᠦᠢ ᠪᠤᠯᠳᠠᠯ᠎ᠠ ᠨᠠᠮᠠᠨᠴᠢᠯᠠᠪᠠ᠃ ᠰᠦᠨᠢ ᠨᠢ ᠪᠤᠷᠤᠨᠢᠳᠤᠨ ᠤᠯᠤᠰ ᠳᠦᠷᠦ ᠶᠢᠨ ᠵᠦᠪᠯᠡᠯᠭᠡᠨ ᠤ ᠬᠡᠰᠢᠬᠦᠨ ᠤ ᠰᠠᠨᠠᠯ ᠳᠤᠷᠠᠳᠤᠯᠭ᠎ᠠ ᠪᠠᠨ ᠪᠢᠴᠢᠵᠦ᠂ ᠰᠠᠨᠠᠯ ᠳᠤᠷᠠᠳᠤᠯᠭ᠎ᠠ ᠳᠤ ᠪᠠᠨ ︽ᠵᠡᠭᠡᠯᠢ ᠳᠦᠬᠦᠷᠠᠩ ᠴᠢᠰᠤ ᠨᠦᠵᠢ ᠤᠷᠤᠰᠬᠠᠨ ᠬᠡᠥᠭᠡᠳ ᠪᠠᠭᠠᠴᠤᠳ ᠤᠨ ᠤᠢ ᠤᠬᠠᠭᠠᠨ ᠳᠤ ᠭᠭᠢᠷ ᠰᠠᠭᠤᠯᠭᠠᠵᠦ᠂ ᠪᠤᠷᠤᠭᠤ ᠠᠯᠠᠯᠭ᠎ᠠ ᠨᠢᠳᠤᠯᠭ᠎ᠠ ᠬᠦᠮᠦᠨ ᠠᠮᠢᠳᠠᠨ ᠤ ᠰᠡᠳᠬᠢᠯ ᠢ ᠰᠡᠪᠳᠦᠭᠡᠪᠡ︾ ᠬᠡᠳᠡᠭ ᠰᠡᠳᠦᠪ ᠢᠶᠠᠷ ᠵᠡᠭᠡᠯᠢ ᠳᠡᠭᠡᠷ᠎ᠡ ᠬᠠᠷᠠᠭᠰᠠᠨ ᠵᠢᠴᠢ ᠢᠰᠢᠭᠡᠳᠠᠢ ᠶᠢᠨ ᠬᠦᠢᠳᠡᠨ ᠬᠦᠮᠦᠷᠭᠡ ᠳᠠᠬᠢ ᠪᠤᠳᠠᠳᠤ ᠪᠠᠶᠢᠳᠠᠯ ᠢᠶᠠᠷ ᠵᠢᠱᠢᠶ᠎ᠠ ᠪᠤᠯᠭᠠᠵᠦ ᠨᠠᠯᠢᠶᠠᠳ ᠬᠦᠨ ᠦᠬᠦᠯᠡᠭᠡᠳ ᠬᠡᠰᠢᠬᠦᠨ ᠤ ᠬᠤᠷᠠᠯ ᠳᠤ ᠳᠤᠰᠢᠶᠠᠪᠠ᠃      ᠪᠤᠷᠤᠨᠢᠳᠤᠨ ᠤ ᠡᠨᠡᠬᠦ ᠰᠠᠨᠠᠯ ᠳᠤᠷᠠᠳᠤᠯᠭ᠎ᠠ ᠳᠡᠷᠤᠢ ᠳᠤ ᠪᠠᠨ ᠨᠡᠶᠢᠭᠡᠮ ᠨᠡᠶᠢᠳᠡ ᠳᠤ ᠴᠢᠩᠭ᠎ᠠ ᠳᠤᠰᠬᠠᠯ ᠭᠠᠷᠴᠦ᠂ ᠤᠯᠤᠰ ᠳᠦᠷᠦ ᠶᠢᠨ ᠵᠦᠪᠯᠡᠯᠭᠡᠨ ᠪᠤᠯᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠠᠴᠠ ᠬᠤᠳᠠ ᠶᠢᠨ ᠪᠦᠳᠦᠭᠡᠨ ᠪᠠᠶᠢᠭᠤᠯᠤᠯᠳᠠ ᠶᠢᠨ ᠳᠤᠪᠴᠢᠶ᠎ᠠ ᠳᠤ ᠡᠨᠡ ᠬᠦ ᠦᠢᠯᠡ ᠬᠡᠷᠡᠭ ᠢ ᠳᠠᠭᠠᠭᠠᠨ ᠰᠢᠢᠳᠪᠦᠷᠢᠯᠡᠬᠦᠯᠬᠦ ᠪᠠᠷ ᠪᠤᠯᠵᠦ᠂ ᠬᠤᠳᠠ  ᠶᠢᠨ ᠪᠦᠳᠦᠭᠡᠨ ᠪᠠᠶᠢᠭᠤᠯᠤᠯᠳᠠ ᠶᠢᠨ ᠳᠤᠪᠴᠢᠶ᠎ᠠ ᠨᠢᠭᠡ ᠯᠠ ᠭᠠᠷᠠᠭ ᠤᠨ ᠳᠤᠳᠤᠷ᠎ᠠ ᠵᠡᠭᠡᠯᠢ ᠳᠡᠭᠡᠷ᠎ᠡ ᠮᠠᠯ ᠨᠢᠳᠤᠯᠬᠤ  ᠶᠢ ᠴᠠᠭᠠᠵᠠᠯᠠᠵᠦ ᠴᠢᠰᠤ ᠨᠦᠵᠢᠨ ᠤ ᠤᠷᠤᠮ ᠦᠭᠡᠢ ᠪᠤᠯᠳᠠᠯ᠎ᠠ ᠴᠡᠪᠡᠷᠯᠠᠪᠠ᠃ ᠢᠷᠡᠬᠦ ᠵᠢᠯ ᠠᠴᠠ ᠪᠠᠯᠭᠠᠰᠤᠨ ᠤ ᠳᠡᠬᠦᠷᠭᠡ ᠳᠤ ᠮᠠᠯ ᠨᠢᠳᠤᠯᠬᠤ ᠳᠤᠰᠬᠠᠢ ᠵᠠᠬ᠎ᠠ ᠪᠠᠶᠢᠭᠤᠯᠬᠤ ᠪᠠᠷ ᠪᠠᠶᠢᠭ᠎ᠠ ᠬᠡᠳᠡᠭ ᠢᠶᠠᠨ ᠬᠤᠳᠠ ᠶᠢᠨ ᠪᠦᠳᠦᠭᠡᠨ ᠪᠠᠶᠢᠭᠤᠯᠤᠯᠳᠠ ᠶᠢᠨ ᠳᠤᠪᠴᠢᠶ᠎ᠠ ᠠᠴᠠ ᠪᠤᠷᠤᠨᠢᠳᠤᠨ ᠳᠤ ᠮᠡᠳᠡᠭᠳᠡᠵᠦ ᠪᠢᠯ᠎ᠡ᠃      ᠨᠢᠭᠡ ᠡᠳᠦᠷ ᠪᠤᠷᠤᠨᠢᠳᠤᠨ ᠢᠰᠢᠭᠡᠳᠠᠢ ᠶᠢᠨ ᠤᠳᠠᠰᠤ ᠶᠢ ᠳᠤᠰᠤᠯ᠎ᠠ᠃    — ᠪᠠᠭ᠎ᠠ ᠶᠢᠨ ᠠᠨᠳᠠ ᠮᠢᠨᠢ︕ ᠮᠢᠨᠤ ᠳᠦᠯᠦᠭᠡ ᠢᠯᠡᠬᠦᠭᠡᠨ ᠨᠤᠮ ᠤᠡᠭᠰᠢᠵᠦ ᠦᠭᠬᠦ ᠪᠤᠯᠪᠠᠦ︕ ᠪᠢ ᠦᠭᠯᠢᠭᠡ ᠶᠢ ᠴᠢᠮᠠᠯᠠᠯ ᠦᠭᠡᠢ ᠦᠭᠬᠦ ᠪᠠᠷ ᠪᠤᠢ᠃     — ᠨᠢᠬᠦᠯ ᠤᠨ ᠡᠵᠡᠨ ᠮᠢᠨᠢ︕ ᠬᠡᠵᠦ ᠪᠤᠷᠤᠨᠢᠳᠤᠨ ᠦᠪᠡᠷ  ᠤᠨ ᠡᠷᠭᠡ ᠦᠭᠡᠢ ᠦᠬᠦᠯᠡᠪᠠ᠃    — ᠠᠷᠭ᠎ᠠ ᠦᠭᠡᠢ ᠰᠢᠥ ᠳ᠋ᠠ᠂ ᠪᠢ ᠴᠤ ᠬᠡᠰᠡᠨ ᠦᠢ ᠤᠯᠠᠨ ᠬᠦᠮᠦᠨ ᠤ ᠳᠦᠯᠦᠭᠡ ᠨᠢᠬᠦᠯ ᠦᠢᠯᠡᠳᠴᠦ ᠪᠠᠶᠢᠭ᠎ᠠ᠃    — ᠳᠡᠭᠡᠬᠦ ᠳᠤ ᠬᠤᠨᠢᠨ ᠤ ᠬᠢᠨᠢ ᠳᠡᠷᠭᠡᠳᠡ ᠬᠤᠨᠢ ᠶᠢ ᠨᠢ ᠨᠢᠳᠤᠯᠬᠤ ᠬᠡᠭᠴᠢ ᠬᠡᠳᠦᠯᠵᠦ ᠳᠡᠶᠢᠯᠦᠰᠢ ᠦᠭᠡᠢ ᠨᠢᠬᠦᠯ ᠶᠤᠮ᠃     ᠴᠠᠭᠠᠳᠤᠬᠢ  ᠶᠢᠨ ᠬᠢᠨᠢ ᠳᠠᠭᠤ ᠬᠡᠨᠡᠳᠳᠡ ᠦᠨᠳᠦᠷ ᠪᠤᠯᠵᠦ     — ᠪᠠᠭ᠎ᠠ ᠶᠢᠨ ᠨᠠᠶᠢᠵᠠ ᠬᠡᠰᠡᠨ ᠢᠶᠠᠷ  ᠢᠶᠠᠨ ᠳᠠᠨ ᠳᠤ ᠤᠳᠠᠰᠤᠳᠠᠭᠰᠠᠨ ᠶᠤᠮ᠂ ᠦᠭᠡᠢ ᠪᠤᠯ ᠰᠦᠮ᠎ᠡ ᠤᠯᠳᠠᠬᠤ ᠯᠠ᠂ ᠴᠢᠮ᠎ᠠ  ᠠᠴᠠ ᠶᠡᠭᠡ ᠬᠡᠭᠡᠨ ᠴᠤ ᠪᠠᠶᠢᠬᠤ ᠯᠠ ᠁ ᠬᠡᠳ ᠤᠳᠠᠰᠤ ᠪᠠᠨ ᠬᠠᠭᠠᠪᠠ᠃     ᠵᠡᠭᠡᠯᠢ ᠳᠡᠭᠡᠷ᠎ᠡ ᠬᠠᠷ᠎ᠠ ᠪᠤᠷᠤ ᠦᠭᠡᠢ ᠴᠡᠪᠡᠷᠭᠡᠨ ᠪᠤᠯᠤᠯ᠎ᠠ᠃ ᠳᠡᠯ ᠰᠤᠯᠠ ᠨᠢᠳᠤᠯᠬᠤ ᠦᠢᠯᠡ ᠶᠢ ᠬᠤᠳᠠ ᠶᠢᠨ ᠳᠡᠬᠦᠷᠭᠡ ᠳᠠᠬᠢ ᠰᠢᠨᠡᠭᠡᠨ ᠪᠠᠶᠢᠭᠤᠯᠤᠭᠰᠠᠨ ᠳᠤᠮᠤᠬᠠᠨ ᠤᠷᠤᠴᠠᠨ ᠳᠤ ᠳᠦᠪᠯᠡᠷᠡᠬᠦᠯᠪᠠ᠃ ᠪᠤᠷᠤᠨᠢᠳᠤᠨ ᠤ ᠤᠯᠠᠨ ᠤᠳᠠᠭᠠᠨ ᠤ ᠰᠠᠨᠠᠯ ᠳᠡᠪᠰᠢᠬᠦᠯᠦᠭᠰᠡᠨ ᠤ ᠳ᠋ᠦᠡᠭ ᠳᠤ ᠬᠤᠳᠠ ᠶᠢᠨ ᠪᠦᠳᠦᠭᠡᠨ ᠪᠠᠶᠢᠭᠤᠯᠤᠯᠳᠠ ᠶᠢᠨ ᠳᠤᠪᠴᠢᠶ᠎ᠠ᠂ ᠱᠠᠰᠢᠨ ᠰᠤᠷᠳᠠᠬᠤᠨ ᠤ ᠳᠤᠪᠴᠢᠶ᠎ᠠ᠂ ᠤᠳᠬ᠎ᠠ ᠤᠷᠠᠯᠢᠭ ᠤᠨ ᠬᠤᠯᠪᠤᠭ᠎ᠠ ᠵᠡᠷᠭᠡ ᠰᠠᠯᠠᠭ᠎ᠠ ᠮᠦᠴᠢᠷ ᠠᠴᠠ ᠢᠰᠢᠭᠡᠳᠠᠢ ᠶᠢᠨ ᠬᠦᠢᠳᠡᠨ ᠪᠤᠯᠤᠨ ᠮᠠᠯ ᠨᠢᠳᠤᠯᠬᠤ ᠵᠠᠬ᠎ᠠ ᠳᠤ ︽ᠬᠤᠨᠢᠨ ᠤ ᠳᠡᠷᠭᠡᠳᠡ ᠬᠤᠨᠢ ᠶᠢ ᠨᠢ ᠨᠢᠳᠤᠯᠵᠦ ᠪᠤᠯᠬᠤ ᠦᠭᠡᠢ︾ ᠬᠡᠰᠡᠨ ᠳᠦᠷᠢᠮ ᠳᠤᠭᠳᠠᠭᠠᠵᠦ ᠦᠭᠬᠦᠯ᠎ᠠ᠃ ᠤᠳᠬ᠎ᠠ ᠤᠷᠠᠯᠢᠭ ᠤᠨ ᠬᠤᠯᠪᠤᠭ᠎ᠠ ᠨᠢ ᠵᠠᠩ ᠦᠢᠯᠡ ᠶᠢᠨ ᠨᠡᠶᠢᠭᠡᠮᠯᠢᠭ ᠤᠨ ᠠᠵᠢᠯ ᠤᠨ ᠳᠠᠯ᠎ᠠ ᠠᠴᠠ ᠡᠨᠡ ᠬᠦ ᠠᠵᠢᠯᠯᠠᠭ᠎ᠠ ᠳᠤ ᠤᠷᠤᠯᠴᠠᠭᠰᠠᠨ ᠶᠤᠮ ᠬᠡᠨ᠎ᠡ᠃ ᠡᠨᠡ ᠬᠡᠳᠦᠨ ᠰᠠᠯᠠᠭ᠎ᠠ ᠮᠦᠴᠢᠷ ᠤᠨ ᠬᠢᠨ ᠢᠰᠢᠭᠡᠳᠠᠢ ᠶᠢᠨ ᠬᠦᠢᠳᠡᠨ ᠬᠦᠮᠦᠷᠭᠡ ᠳᠤ ᠬᠠᠶᠠ ᠨᠢᠭᠡ ᠬᠦᠷᠴᠦ ᠳᠦᠷᠢᠮ ᠶᠤᠰᠤᠭᠠᠷ ᠬᠢᠨᠠᠨ ᠪᠠᠶᠢᠴᠠᠭᠠᠯᠳᠠ ᠬᠢᠨ᠎ᠠ᠃ ᠪᠠᠶᠢᠴᠠᠭᠠᠬᠤ ᠪᠦᠯᠬᠦᠮ ᠬᠦᠷᠴᠦ ᠤᠴᠢᠬᠤ ᠰᠤᠷᠠᠭ ᠢᠶᠠᠷ ᠢᠰᠢᠭᠡᠳᠠᠢ ᠶᠢᠨ ᠬᠦᠢᠳᠡᠨ ᠬᠦᠮᠦᠷᠭᠡ ᠪᠤᠯᠤᠨ ᠮᠢᠬᠠᠨ ᠤ ᠵᠠᠬ᠎ᠠ ᠨᠢ ᠬᠤᠨᠢ ᠶᠢ ᠨᠢᠭᠡ ᠨᠢᠭᠡ ᠪᠠᠷ ᠳᠤᠰᠠᠭᠠᠷ ᠨᠢ ᠳᠦᠬᠦᠭᠡᠷᠴᠦ ᠬᠠᠷᠢᠭᠤ ᠳᠦᠷᠢᠮ ᠦᠵᠡᠬᠦᠯᠦᠨ᠎ᠠ᠃ ᠪᠠᠶᠢᠴᠠᠭᠠᠬᠤ ᠪᠦᠯᠬᠦᠮ ᠶᠠᠪᠤᠴᠢᠬᠠᠪᠠᠯ ᠳᠤᠤᠷ᠎ᠠ ᠪᠠᠨ ᠭᠠᠥᠯᠢ ᠨᠢ ᠭᠠᠷᠤᠨ᠎ᠠ᠃     ︽ᠬᠤᠨᠢᠨ ᠤ ᠳᠡᠷᠭᠡᠳᠡ ᠬᠤᠨᠢ ᠶᠢ ᠨᠢ ᠨᠢᠳᠤᠯᠬᠤ ᠪᠤᠯ ᠴᠡᠭᠡᠷ ᠲᠠᠢ ᠶᠠᠪᠤᠳᠠᠯ ᠮᠥᠨ︾ ᠬᠡᠳᠡᠭ ᠰᠠᠨᠠᠯ ᠳᠤᠷᠠᠳᠤᠯᠭ᠎ᠠ ᠪᠠᠨ ᠪᠤᠷᠤᠨᠢᠳᠤᠨ ᠳᠦᠷᠪᠠᠨ ᠵᠢᠯ ᠳᠠᠷᠠᠭᠠᠯᠠᠨ ᠳᠡᠪᠰᠢᠬᠦᠯᠦᠭᠰᠡᠨ ᠶᠤᠮ᠃ ᠳᠦᠷᠪᠡᠨ ᠵᠢᠯ ᠤᠨ ᠳᠤᠷᠰᠢ ᠢᠰᠢᠭᠡᠳᠠᠢ ᠬᠢᠳᠡᠭ ᠢᠶᠠᠨ ᠬᠢᠵᠦ ᠤᠯᠳᠠᠭ ᠢᠶᠠᠨ ᠤᠯᠵᠦ᠂ ᠪᠠᠭ᠎ᠠ ᠶᠢᠨ ᠨᠠᠶᠢᠵᠠ ᠪᠤᠷᠤᠨᠢᠳᠤᠨ ᠲᠠᠢ ᠬᠠᠷᠭᠤᠪᠠᠯ ᠳᠤᠤᠭᠠᠷᠬᠤ ᠶᠢ ᠪᠤᠤ ᠬᠡᠯᠡ ᠬᠠᠷᠠᠵᠦ ᠴᠦ ᠦᠵᠡᠬᠦ ᠦᠭᠡᠢ ᠶᠠᠪᠤᠳᠠᠭ ᠪᠠᠶᠢᠯ᠎ᠠ᠃     ᠳᠠᠪᠤᠳᠤᠭᠠᠷ ᠵᠢᠯ ᠨᠢ ᠤᠯᠤᠰ ᠳᠦᠷᠦ ᠶᠢᠨ ᠵᠦᠪᠯᠡᠯᠭᠡᠨ ᠳᠤ ᠰᠢᠨ᠎ᠡ ᠳᠡᠷᠢᠬᠦᠯᠡᠭᠴᠢ ᠢᠷᠠᠵᠦ᠂ ᠪᠤᠷᠤᠨᠢᠳᠤᠨ ᠱᠠᠰᠢᠨ ᠤ ᠳᠦᠯᠦᠭᠡᠯᠡᠭᠴᠢ ᠶᠢᠨ ᠬᠤᠪᠢ ᠪᠠᠷ ᠪᠠᠰᠠ ᠨᠢᠭᠡ ᠬᠤᠭᠤᠴᠠᠭᠠᠨ ᠤ ᠬᠡᠰᠢᠬᠦᠨ ᠢᠶᠠᠷ ᠰᠤᠩᠭᠤᠭᠳᠠᠯ᠎ᠠ᠃ ᠬᠤᠷᠠᠯ ᠳᠡᠭᠡᠷ᠎ᠡ ᠪᠤᠷᠤᠨᠢᠳᠤᠨ ᠮᠥᠨ ᠯᠠ ᠦᠨᠦ ᠬᠠᠭᠤᠴᠢᠨ ᠰᠠᠨᠠᠯ ᠳᠤᠷᠠᠳᠤᠯᠭ᠎ᠠ ᠪᠠᠨ ᠳᠡᠪᠰᠢᠬᠦᠯᠪᠠ᠃ ᠳᠡᠭᠡᠬᠦ ᠳᠤ ᠳᠡᠬᠦᠨ ᠤ ᠡᠨᠡ ᠬᠦ ᠰᠠᠨᠠᠯ ᠳᠤᠷᠠᠳᠤᠯᠭ᠎ᠠ ᠶᠢ ᠭᠡᠨᠡᠳᠳᠡ ᠯᠠ ᠰᠠᠨᠠᠯ ᠳᠤᠷᠠᠳᠤᠯᠭ᠎ᠠ ᠬᠡᠵᠦ ᠦᠵᠡᠬᠦ ᠪᠠᠨ ᠪᠤᠯᠢᠭᠰᠠᠨ ᠠᠵᠢ᠃        — ᠶᠠᠭᠠᠬᠢᠭᠠᠳ︖ ᠬᠡᠵᠦ ᠪᠤᠷᠤᠨᠢᠳᠤᠨ ᠢ ᠤᠬᠤᠴᠢᠯᠠᠬᠤ ᠳᠤ      — ᠮᠠᠯ ᠠᠵᠦ ᠠᠬᠤᠢ ᠶᠢᠨ ᠠᠵᠦ ᠦᠢᠯᠡᠰᠵᠢᠯᠳᠠ ᠪᠤᠯ ᠮᠠᠰᠢ ᠤᠯᠠᠨ ᠮᠠᠯᠴᠢᠨ ᠤ ᠠᠵᠦ ᠠᠮᠢᠳᠤᠷᠠᠯ ᠲᠠᠢ ᠬᠤᠯᠪᠤᠭᠳᠠᠬᠤ ᠤᠴᠢᠷ ᠶᠤᠮ᠂ ᠮᠠᠯ ᠠᠵᠦ ᠠᠬᠤᠢ ᠶᠢᠨ ᠠᠵᠦ ᠦᠢᠯᠡᠰᠵᠢᠯᠳᠠ ᠶᠢ ᠪᠡᠶᠡᠯᠡᠬᠦᠯᠬᠦ ᠳᠤ ᠵᠡᠪᠠᠯ ᠬᠦᠢᠳᠡᠨ ᠬᠦᠮᠦᠷᠭᠡ ᠶᠢ ᠳᠦᠰᠢᠭᠯᠡᠵᠦ ᠮᠠᠨ ᠤ ᠬᠤᠰᠢᠭᠤ ᠨᠢ ᠪᠠᠰᠠ ᠬᠦᠢᠳᠡᠨ ᠬᠦᠮᠦᠷᠭᠡ ᠶᠢ ᠨᠡᠮᠡᠵᠦ ᠪᠠᠶᠢᠭᠤᠯᠬᠤ ᠬᠡᠷᠡᠭᠳᠠᠢ ᠪᠠᠶᠢᠨ᠎ᠠ᠃ ᠳᠠᠬᠢᠭᠠᠳ ᠬᠡᠯᠡᠪᠠᠯ ᠬᠤᠨᠢ ᠪᠤᠯ ᠡᠵᠡᠨ ᠤ ᠪᠠᠨ ᠬᠦᠷᠦᠩᠭᠡ᠂ ᠡᠰᠡᠪᠠᠰᠦ ᠬᠤᠳᠠᠯᠳᠤᠵᠦ ᠠᠪᠤᠭᠰᠠᠨ ᠬᠦᠮᠦᠨ ᠤ ᠬᠦᠷᠦᠩᠭᠡ᠂ ᠡᠶᠢᠮᠤ ᠠᠴᠠ ᠬᠤᠨᠢ ᠶᠢ ᠶᠠᠭᠠᠬᠢᠵᠦ ᠠᠯᠠᠬᠤ ᠳᠤᠷᠠᠳᠠᠢ ᠪᠤᠯ ᠳᠡᠭᠡᠵᠦ ᠠᠯᠠᠵᠦ ᠪᠤᠯᠤᠨ᠎ᠠ ᠁ ᠬᠡᠰᠡᠨ ᠪᠠᠶᠢᠵᠠᠢ᠃      ᠳᠠᠬᠢᠭᠠᠳ ᠯᠠ ᠵᠡᠭᠡᠯᠢ ᠳᠡᠭᠡᠷ᠎ᠡ ᠴᠢᠰᠤ ᠨᠦᠵᠢ ᠤᠯᠠᠶᠢᠵᠦ᠂ ᠳᠦᠬᠦᠭᠡ ᠦᠭᠡᠢ ᠬᠡᠥᠭᠡᠳ ᠤᠳ ᠴᠢᠰᠤ ᠬᠤᠯᠢᠯᠳᠤᠭᠰᠠᠨ ᠴᠠᠰᠦ ᠪᠠᠷ ᠴᠠᠰᠦᠨ ᠬᠦᠮᠦᠨ ᠪᠠᠷᠢᠵᠦ ᠨᠠᠭᠠᠳᠬᠤ ᠪᠤᠯᠪᠠ᠃ ᠬᠤᠨᠢ ᠨᠢᠳᠤᠯᠬᠤ ᠳᠤ ᠬᠦᠮᠦᠨ ᠬᠦᠯᠦᠰᠦᠯᠡᠳᠡᠭ ᠪᠤᠯᠬᠤᠷ ᠨᠢᠭᠡ ᠮᠠᠩᠭᠠᠷ ᠡᠷ᠎ᠡ ᠮᠦᠡᠭᠬᠦ ᠪᠠᠨ ᠭᠠᠮᠨᠠᠭᠠᠳ ᠬᠤᠨᠢ ᠶᠢ ᠴᠤᠬᠢᠵᠦ ᠠᠯᠠᠬᠤ ᠪᠤᠶᠤ ᠰᠦᠭᠡᠳᠡᠵᠦ ᠠᠯᠠᠵᠦ ᠪᠤᠯᠬᠤ ᠰᠢᠨ᠎ᠡ ᠠᠷᠭ᠎ᠠ ᠶᠢ ᠡᠬᠦᠳᠦᠭᠰᠡᠨ ᠬᠡᠪᠡ ᠪᠢᠯᠡ᠃      ᠁ ᠬᠠᠪᠤᠷ ᠤᠨ ᠨᠢᠭᠡᠨ ᠡᠳᠦᠷ ᠪᠤᠷᠤᠨᠢᠳᠤᠨ᠂ ᠬᠦᠬᠡᠪᠤᠬ᠎ᠠ ᠡᠪᠦᠭᠡᠨ ᠢ ᠡᠷᠬᠢᠵᠦ ᠦᠵᠡᠯ᠎ᠠ᠃ ᠬᠦᠬᠡᠪᠤᠬ᠎ᠠ ᠡᠪᠤᠭᠡᠨ ᠤ ᠬᠦᠳᠡᠷ ᠴᠢᠬᠢᠷᠠᠭ ᠪᠡᠶ᠎ᠡ ᠨᠢ ᠬᠦᠳᠦᠰᠦᠨ ᠳᠡᠪᠠᠯ ᠳᠤ ᠪᠠᠨ ᠳᠠᠷᠤᠭᠳᠠᠭᠰᠠᠨ ᠬᠠᠷᠠᠭᠳᠠᠨ᠎ᠠ᠃ ᠪᠤᠷᠤᠨᠢᠳᠤᠨ  ᠢ ᠤᠷᠤᠵᠦ ᠤᠴᠢᠬᠤ ᠳᠤ ᠡᠪᠤᠭᠡᠨ ᠮᠤᠳᠤᠨ ᠳᠡᠷ᠎ᠡ ᠳᠡᠷᠡᠯᠡᠭᠡᠳ ᠵᠡᠬᠦᠷᠮᠡᠭᠯᠡᠵᠦ ᠪᠠᠶᠢᠪᠠ᠃       — ᠬᠦᠬᠡᠪᠤᠬ᠎ᠠ ᠭᠤᠸᠠᠢ︕       — ᠲᠠ ᠮᠢᠨᠢ ᠡᠪᠡᠳᠴᠢᠯᠡᠭᠡ ᠦᠦ︖      ᠬᠤᠶᠠᠭᠤᠯᠠ ᠤᠳᠠᠳᠠᠯ᠎ᠠ ᠵᠤᠭᠤᠭᠳᠠᠵᠦ ᠰᠠᠭᠤᠪᠠ᠃ ᠨᠢᠭᠡ ᠤᠳᠠᠭ᠎ᠠ ᠵᠠᠷᠤᠭᠰᠠᠨ ᠬᠤᠨᠢ ᠨᠢ ᠳᠠᠯ᠎ᠠ ᠪᠦᠭᠡᠷ᠎ᠡ  ᠲᠠᠢ ᠬᠤᠨᠢ ᠳᠠᠭᠠᠷᠠᠵᠠᠢ᠃ ᠳᠠᠯ᠎ᠠ ᠪᠦᠭᠡᠷ᠎ᠡ ᠲᠠᠢ ᠬᠤᠨᠢ ᠳᠠᠭᠠᠷᠠᠪᠠᠯ ᠳᠠᠬᠢᠵᠦ ᠮᠠᠯ ᠵᠠᠷᠤᠵᠦ ᠪᠤᠯᠳᠠᠭ ᠦᠭᠡᠢ ᠳᠤᠯᠠ ᠬᠦᠬᠡᠪᠤᠬ᠎ᠠ ᠮᠠᠯ ᠵᠠᠷᠤᠬᠤ ᠪᠠᠨ ᠪᠤᠯᠢᠭᠠᠳ ᠬᠡᠳᠦᠨ ᠵᠢᠯ ᠪᠤᠯᠤᠭᠰᠠᠨ ᠶᠤᠮ ᠬᠡᠨ᠎ᠡ᠃ ᠨᠢᠭᠡ ᠨᠠᠰᠤᠨ ᠳᠠᠭᠠᠨ ᠳᠤᠭ᠎ᠠ ᠦᠭᠡᠢ ᠤᠯᠠᠨ ᠠᠮᠢ ᠬᠤᠷᠤᠭᠠᠭᠰᠠᠨ ᠡᠨᠡ ᠬᠦᠮᠦᠨ ᠮᠤᠳᠤ ᠪᠠᠷ ᠬᠤᠶᠠᠷ ᠬᠤᠨᠢ ᠱᠤᠭᠤᠭᠠᠳ᠂ ᠱᠤᠭᠤᠮᠠᠯ ᠬᠤᠨᠢᠨ ᠤ  ᠪᠠᠨ ᠡᠮᠤᠨ᠎ᠠ ᠰᠠᠩ ᠳᠠᠯᠪᠢᠵᠦ ᠪᠠᠶᠢᠪᠠ᠃ ᠪᠤᠷᠤᠨᠢᠳᠤᠨ ᠬᠦᠬᠡᠪᠤᠬ᠎ᠠ ᠶᠢᠨ ᠳᠤ ᠬᠤᠨᠤᠭᠤᠳᠠ ᠪᠠᠷ ᠰᠠᠭᠤᠵᠦ ᠠᠶᠠᠷᠯᠠᠬᠤ ᠳᠤ ᠪᠠᠨ ᠡᠪᠤᠭᠡᠨ ᠠᠴᠠ ᠨᠢᠭᠡ ᠱᠤᠭᠤᠮᠠᠯ ᠬᠤᠨᠢ ᠶᠢ ᠨᠢ ᠰᠦᠮ᠎ᠡ ᠳᠡᠭᠡᠨ ᠠᠪᠠᠴᠢᠵᠦ ᠳᠠᠬᠢᠬᠤ ᠶᠢ ᠭᠤᠶᠤᠴᠢᠯᠠᠭᠰᠠᠨ ᠳᠤ ᠡᠪᠤᠭᠡᠨ ᠬᠤᠨᠢ ᠪᠠᠨ ᠳᠤᠷᠠᠳᠠᠢ ᠦᠭᠪᠠ᠃      ᠬᠡᠳᠦᠨ ᠬᠤᠨᠤᠭ ᠤᠨ ᠬᠢᠨᠢ ᠳᠠᠷᠠᠭ᠎ᠠ ᠪᠤᠷᠤᠨᠢᠳᠤᠨ ᠪᠠᠷ᠎ᠠ ᠰᠤᠷᠠᠭ ᠦᠭᠡᠢ ᠠᠯᠠᠭ᠎ᠠ ᠪᠤᠯᠵᠠᠢ᠃ ᠬᠠᠷᠢᠨ ᠭᠠᠨᠵᠤᠤᠷ ᠰᠦᠮ᠎ᠡ ᠶᠢᠨ ᠭᠤᠤᠯ ᠪᠤᠷᠬᠠᠨ ᠤ ᠳᠡᠷᠭᠡᠳᠡ ᠱᠤᠭᠤᠮᠠᠯ ᠮᠤᠳᠤᠨ ᠬᠤᠨᠢ ᠳᠠᠬᠢᠭᠳᠠᠵᠦ ᠮᠦᠷᠬᠦᠯᠴᠢᠳ ᠳᠡᠷᠡ ︽ᠬᠤᠨᠢᠨ ᠪᠤᠷᠬᠠᠨ︾ ᠳᠤ ᠪᠠᠰᠠ ᠳᠠᠭᠠᠳᠬᠠᠬᠤ ᠪᠤᠯᠤᠯ᠎ᠠ ᠁
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠣᠯᠠᠭᠠᠨ᠎ᠠ ᠪᠣᠯᠪᠠᠰᠣᠷᠠᠬᠤ ᠦᠶ᠎ᠡ ᠳᠤ ︵ᠨᠠᠶᠢᠷᠠᠭᠤᠯᠤᠯ︶᠁
ᠨᠤᠲᠤᠭ ᠭᠠᠨᠭ᠍ᠲᠠᠲᠠᠭ ᠥᠭᠡᠢ᠁
ᠮᠦᠡᠭᠭᠡ ᠭᠱᠠᠨ ᠤ ᠳᠠᠳᠠᠯᠠᠪᠦᠷᠢ᠁
ᠬᠠᠨ ᠬᠠᠶᠢᠷᠬᠠᠨ ᠳᠤ ᠠᠪᠠᠷᠢᠯ᠎ᠠ ᠁
ᠳᠤᠷᠭᠠᠨ ᠴᠠᠬᠠᠷ᠁
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号